އޮނަރަބްލް ގާސިމް އިބްރާހީމް ރާއްޖޭގެ ފިނޭންސް މިނިސްޓަރަކަށް ވަޑައި ގެންނެވި އިރު އާމުދަނީގެ ގޮތުގައި ރާއްޖެއަށް ލިބެނީ 7 ބިލިއަން ރުފިޔާއެވެ. މި މިންވަރަކީ ރައްޔިތުންނަށް ކަށަވަރު ކޮށްދޭން ޖެހޭ އަސާސީ ހައްގުތައް ފުއްދައި ދެވޭވަރުގެ އާމުދަނީއެއް ނޫނެވެ. އެހެންކަމާއެކު އެމަނިކުފާނު ފިނޭންސް މިނިސްޓަރު ކަމުގައި އެކިގޮތް ގޮތުން ރާއްޖޭގެ އިގުތިސާދީ ދުވެލި ބާރު ކުރުމުގެ ޢަމަލީމަސައްކަތް ފައްޓަވައި ދެއްވިއެވެ. ޓޫރިޒަމް ދާއިރާއިންނާއި ވައިގެ ދަތުރުފަތުރު ކުރާ ފަރާތްތަކުން ޓެކްސް ނެންގެވުމަށް ނިންމަވައި ގާނޫނުތަކާއި ގަވާއިދުތައްތައް ހެއްދެވިއެވެ.

މީގެ އިތުރުން ފަގީރުންނަށް ބާރުބޮޑުނުވާނޭ ހެން ފޯރުން ތެރީންގެ ޓެކްސް ނެންގެވިއެވެ. މިގޮތުން އެމަނިކުފާނު ކުރެއްވި މަސައްކަތް ޕުޅުގެ ތެރެއިން ރާއްޖެއަށް ލިބޭ އާމްދަނީ 7 ބިލިއަނުން 12 ބިލިޔަނަށް އިތުރު ކޮށްދެއްވިއެވެ. ގާސިމް އިބްރާހީމަކީ ވިޔާފާރި ކުރެއްވުމުގެ ތަޖުރިބާ ލިބިވަޑައިގެން ހުންނެވި އިގުތިސާދީ މާހިރެކެވެ. މިއަދު އެމަނިކުފާނަކީ މިލިއަނަރެއްވެސް މެއެވެ. އިގުތިސާދީ ގޮތުން ގައުމެއް ކުރިއަށް ގެންދެވޭނީ ވިޔާފާރި ކުރުމުގެ ހުނަރާއި ތަޖްރިބާ ލިބިވަޑައިގެން ހުންނެވި ބޭފުޅަކަށެވެ.

ތިމާ ދިރިއުޅޭ ގައުމު ފުދުންތެރި ގައުމަކަށް ވެގެން މެނުވީ ފުދުންތެރި ރައްޔިތު މީހާ އެއް ނުފެންނާނެއެވެ. މީގެ އިތުރުން ގާސިމް އިބުރާހީމަކީ މިގައުމަށް ޑިމޮކްރެސީ ގެނައުމަށްޓަކާ ބުރަ މަސައްކަތް ކުރެއްވި ބޭފުޅެއްވެސް މެއެވެ. އެގޮތުން ރާއްޖެއަށް ޑިމޮކްރަސީ ގެނައުމަށްޓަކާ ރާއްޖޭގައި އުފެދިގެން ދިޔަ ފުރަތަމަ ސިޔާސީ ޕާޓީ އެމް.ޑީ.ޕީ އުފެއްދުމުގައި ފައުންޑަރ މެންބަރެއްގެ ގޮތުން ވަރަށް ބުރަ މަސައްކަތް ޕުޅުތަކެއް ކުރެއްވި ބޭފުޅެއްވެސް މެއެވެ.

ގާސިމް އިބްރާހީމްގެ ފިކުރަކީ އެމްޑީޕީގެ ފިކުރެވެ. އޭގެ ފަހުން ގާސިމް ވަނީ އަމިއްލަފުޅު ޕާޓީ ޖުމްހޫރީ ޕާޓީ (ޖޭޕީ) އުފައްދަވާފައެވެ.

ގާސިމް އިބްރާހީމަކީ މާކުރިންވެސް ރައްޔިތުންގެ ހާލަތު ބައްލަވައި އެހީތެރިކަން ބޭނުންވާފަރާތްތަކަށް ގިނަގުނަ އެހީތެރިކަން ފޯރުކޮށްދެއްވާ ދީލަތި ބޭފުޅެކެވެ. އެގޮތުން ރާއްޖެއިން ލިބެން ނެތް ބޭސް ފަރުވާތަކަށް ދިވެހިން އިންޑިއާއާއި ސްރީލަންކާ ފަދަ ގައުމުތަކަށް ފޮނުވައިދެއްވައި އެމަނިކުފާނުގެ އަމިއްލަ ފުޅު ޚަރަދުގައި ބޭސް ފަރުވާ ކޮށްދެއްވާފައި ވެއެވެ.

ރާއްޖޭގެ ތަޢުލީމަށް ވެސް ގާސިމް އިބްރާހީމް ވަނީ އިންގިލާބެއް ގެނެސް ދެއްވާފައެއެވެ. އެމަނިކުފާނުގެ އެހީފުޅުގެ ދަށުން ދިވެހި އެތައް ސަތޭކަ ދަރިވަރުންނަށް މަތީ ތަޢުލީމް ބޭރުގެ ގައުމުތަކުން ހޯއްދަވައި ދެއްވާފައިވެއެވެ. އަދި އެއީ އަމިއްލަފުޅު ޔުނިވަރސިޓީއެއް ވެސް ގާއިމު ކޮށްދެއްވާ ފައިވާ ހިތް ހެޔޮ އޯގާވެރި ބޭފުޅެކެވެ.

ގާސިމް އިބްރާހީމުގެ ފަރާތްޕުޅުން ދިވެހި އުންމަތަށް ލިބިފައި ވަނީ އަގުނުކުރެވޭފަދަ އެތަކެއް ދީލަތި އެހީތެރިކަމެވެ. އެހެންކަމުން އެމަނިކުފާނަށް ދިވެހި އުންމަތް ޝުކުރު ވެރިވާން ޖެހެއެވެ.

ގައުމެއްގެ ވެރިއަކަށް ރައްޔިތުން ޚިޔާރު ކުރަން އެންމެ އެކަށޭނަ އެއްބޭފުޅަކީ ގާސިމް އިބްރާހީމު ކަމާމެދު ޝައްކެތް ނެތެވެ.

ގާސިމް އިބްރާހީމަކީ ފުދުންތެރި ތަނަވަސް ބޭފުޅަކަށް ވުމުން ދައުލަތުން އެމަނިކުފާނު ވައްކަން ކުރައްވަން ޖެހިވަޑައެއް ނުގަންނަވާނެއެވެ.

ރާއްޖޭގެ ރައީސްކަމާއި ނާއިބު ރައީސްކަން ފިޔަވައި ސަރުކާރުގެ މުހިންމު އެތައް މަގާމެއް ފުރުއްވާފައިވާ ގާސިމް އިބްރާހީމް ރާއްޖޭގެ އެންމެ މަތީ ވެރިޔާގެ މަގާމަށް ވަޑައިގަތުމަށް ޓަކައި މިފަހަރު ދޭތިން އެކައްޗަށް މަސައްކަތް ކުރައްވާނެއެވެ. އެމަނިކުފާނަށް ބޭނުންފުޅު ވަނީ ލިބިވަޑައިނުގެން އޮތް ރައީސުލް ޖުމްހޫރިއްޔާ ކަމުގެ ޝަރަފެވެ. ނޫން ނަމަ ބޮޑުވަޒީރު ކަމުގެ ޝަރަފެވެ. އެނޫން އެއްވެސް މަންފާއެއް މަގާމެއް އެމަނިކުފާނު މިއަދު ބޭނުން ފުޅެއް ނޫނެވެ.

ގާސިމް އިބްރާހީމަށް ރާއްޖޭގެ ރައީސްކަން ލިބިވަޑައިގެންފިނަމަ އޯގާވެރި ހިންގުންތެރި ތަރައްގީގެ ވެރިކަމެއް ރާއްޖޭގެ ހުރިހާ ރައްޔިތުންނަށް ލިބިގެންދާނެކަން ކަށަވަރެވެ. އަދި ރާއްޖޭގެ ހަގީގީ އިގުތިސާދީ މާހިރަކީ ގާސިމް އިބްރާހީމްކަން މުޅި ރާއްޖެއަށް ހާމަވެގެންދާނެއެވެ.