ގައުމަށް ޚިދުމަތް ކުރެއްވުމާއި އަމިއްލަފުޅު ދިރިއުޅުއްވުމުގައި ލާމަސީލު ރީތި މިސާލުތަކެއް ދެއްކެވި ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢުމަރު ޒާހިރު 85އ ކޮވިޑް ބައްޔަށް ފަރުވާ ހޯއްދަވަމުން ގެންދަވަނިކޮށް ދަރުމަވަންތަ ހޮސްޕިޓަލްގައި މިއަދު މެންދުރު ދޭއްޖެހި ފަހުން އަވަހާރަވެއްޖެއެވެ.
މަރުޙޫމް ޢުމަރު ޒާހިރުގެ ކަންތައްތައް ވަރަށް ގާތުން އެނގިވަޑައިގަންނަވާ ބޭފުޅަކު ވިދާޅުވި ގޮތުގައި ކޮވިޑުގެ އާލަސްކަންފުޅު އުމަރު ޒާހިރަށް ޖެހިވަޑައިގެންނެވިކަން ފާހަގަ ކުރެވުނީ އެމަނިކުފާނުގެ ޚަރަދުގައި ފުވައްމުލަކުގައި އިމާރާތްކުރި މިސްކިތް ހުޅުވުމަށް އެރަށަށް ކުރެއްވި ދަތުރުފުޅަށްފަހު މާލެވަޑައިގެންނެވިފަހުންނެވެ.
ޢުމަރު ޒާހިރު ދަރުމަވަންތަ ހޮސްޕިޓަލުގައި އެނދުމަތި ކުރެވުނީ ޑިސެމްބަރު މަހު 11 ގައެވެ. އަވަހާރަވީ މާބޮޑަށް ހާލުކޮޅު ދެރަފުޅުވެގެން އާދީއްތަ ދުވަހުގެ މެންދުރު ފަހުން ފެށިގެން އައިސީޔޫގައި ފަރުވާ ދެމުން ދަނިކޮށެވެ.
އުމަރު ޒާހިރު ސަރުކާރަށް ޚިދުމަތް ކުރެއްވުމުގައި 50 އަހަރު ހޭދަކުރައްވާފައިވެއެވެ. އެ 50 އަހަރުގެ ތެރޭގައި 26 އަށް ވުރެ ގިނަ ވަޒީފާ އަދާކުރެއްވިއެވެ. މިނިސްޓަރގެ ނާއިބުކަމާއި މިނިސްޓަރ ކަން ވެސް އެތައް އަހަރެއް ވާނދެން އަދާކުރައްވާފައި ވެއެވެ. ސަރުކާރަށް ޚިދުމަތް ކުރެއްވުމުގައި ޢުމަރު ޒާހިރު ހޭދަ ކުރެއްވި ދިގު މުއްދަތުގައި އެންމެ ބޮޑަށް ފާހަގަވެގެން ގޮސްފައި ވަނީ ވަފާތެރިކަމާއި ގިނަ ވަގުތު މަސައްކަތުގައި ދެމިހުންނެވުމާއި މަސައްކަތުގެ ސުލޫކީ މިންގަނޑެއް ހިފެހެއްޓެވުމެވެ. ޢުމަރު ޒާހިރު މަޖީދިއްޔާ ސްކޫލާއި ކުޅިވަރުގެ ދާއިރާގައި ވެސް އަށަގަންނަވަން ބޭނުންފުޅުވީ ރީތި ސުލޫކެވެ.
”އެއީ ލާމަސީލު މިސާލެއް.“ ޢުމަރު ޒާހިރު އަރިހުގައި ހޯމް މިނިސްޓްރީގައި މަސައްކަތް ކުރެއްވި ބޭފުޅަކު ވިދާޅުވިއެވެ.
އުމަރު ޒާހިރު ޖަމާޢަތަށް ކޮށްދެއްވި އެންމެ ފަހު ޚިދުމަތަކީ އެމަނިކުފާނުގެ ޚަރަދުގައި ފުވައްމުލަކުގައި ބިނާކުރެއްވި މިސްކިތް ހުޅުވުމުގެ ރަސްމިއްޔާތުގައި ބައިވެރިވެވަޑައިގަތުމެވެ. މި މަހު ކުރީކޮޅު ފުވައްމުލަކަށް ކުރެއްވި ދަތުރުފުޅަށްފަހު ކުރިމަތިވެވަޑައިގެންނެވި އާލާސްކަންފުޅަށް ޝިފާއެއް ލިބިވަޑައިނުގެން ދަތުރުކުރެއްވީ ދެމިއޮތުގެ ޢާލަމަށެވެ.
ފާއިތުވި ފަންސާހަކަށް އަހަރުގެ ތެރޭގައި އަދި ޚާއްޞަކޮށް ރައީސް މައުމޫން ރާއްޖެއަށް ގެންނެވި ޢުމްރާނީ ތަރައްގީގައި ޢުމުރު ޒާހިރު އަދާކުރެއްވި ދައުރަކީ ވެސް ލާމަސީލު މިސާލެކެވެ.
One Response
އަސްލުަވެސް ޢުމަރު ޒާހިރު ވަރެއް ނެތް. ތިލަފުށި ހިއްކުވާ އެތަން އިންޑަސްޓްރިއަލް ތަނަކަށް ހަދާ ކޮންފަދަ ބޮދު ޚިދުމަތެއް ކުރެއްވީ. މިއުޅޭ މީހުންހެން ރިޝްވަތުނަގާ ރައްޔަތުންނަށް ޙަރާންކޯރުނުވޭ. މާތް އަޚުލާގެއްގެ ވެރިއެކެވެ. ވެރިންނަކީ އެއީ އެވެ. އަޅުގަނޑުމެން މަޖީދިއްޔާގެ ސުކޫލް ދުވަސްވަރު ބެލެހެއްޓެވި ހުރިހާ ދަރިވަރުންގެ އަޚުލާގަށް ބަލާލިޔަސް ޢުމަރު ޒާހިރުގެ ތަރުބިއްޔަތަށް ހަމަ ފަށްފަށުން ޝުކުރުވެރި ވާންޖެހެއެވެ. މާތްﷲ ޢުމަރުޒާހިރު ފުރާނަ ފުޅަށް ސުވަރުގެ މިންވަރުކުރަށްވާށިއެވެ. އާމީން!