މި ގައުމުގައި މިވަގުތު ތިއްބެވި ސިޔާސީ ލީޑަރުންގެ ތެރެއިން ކޮރަޕްޝަނާއި ފަސާދައާއި އަނިޔާވެރިކަމުގެ ލިސްޓުން އިސްތިސްނާވާ ބޭފުޅަކަށް މެނުވީ ގައުމުގެ އެންމެ މަތީވެރިކަން ދީގެން ނުވާނެއެވެ. އަދި އެބޭފުޅަކު ވާންޖެހޭނީ ގައުމުގެ އިގުތިސާދު ފުޅާކޮށް ގައުމު ދަރާފައިވާ ދަރަނިތަކުން ސަލާމަތްކޮށް ދެވޭ ވަރުގެ އިގުތިސާދީ މާހިރަކަށެވެ.

ވައްކަމާއި ފަސާދައާއި އިސްރާފު ބޮޑުވެ ގައުމުގެ ޚާޒާނާ ހުސްވުމުން އޭގެ ނޭދެވޭ އަސަރު ތަޙައްމަލް ކުރަން ޖެހެނީ ރައްޔިތުންނަށެވެ. ތަރައްގީގެ ނަމުގައި ހިންގާ މަޝްރޫޢުތަކަކީ ވެރިންގެ ޖީބުތައް ފުރާލުމަށް ޓަކައި ހިންގާ މަޝްރޫޢު ތަކަށް ވެގެން ނުވާނެއެވެ. އޭސީސީ އާއި އޮޑިޓަރ ޖެނެރަލްއާއި ދައުލަތުގެ އެންމެހައި ތަހުގީގީ އިދާރާތަކަކީ ރިޝްވަތާއި ފަސާދައިން ރައްކާތެރި ކުރެވިފައިވާ މުސްތަގިއްލު ތަންތަނަށް ވާންޖެހޭނެއެވެ. ދައުލަތުގެ ކަމާ ބެހޭ އެންމެހައި އިދާރާތައް ބައިވެރިކޮށްގެން މިފަދަ ބޮޑެތި ވައްކަން ކުރެވޭނެ ފަދަ ނިޒާމެއް އޮތުމަކީ ރައްޔިތުންގެ ހަލާކެވެ. ވައްކަމާއި ޖަރީމާތަކުގައި ބައެއް ތަހުގީގީ އިދާރާތަކުން ބައިވެރިވެ، ހެކި ތައްތާލާފައިވާ ކަން ފާހަގަކުރެވެއެވެ. މިހެން ވަންޏާ ރައްޔިތުންނަށް އިންސާފެއް ނުލިބޭތާއެވެ!

ރައްޔިތުން ވިސްނާން ވެއްޖެ ނޫންހެއްޔެވެ؟ ގައުމެއް ކުރިއަރައި ދާނީ ރައްޔިތުންގެ ހޭލުންތެރިކަން އިތުރުވާ ނިސްބަތަކުންނެވެ.

ރައްޔިތުން ފައިސާއަށް ގަނެލެވޭނަމަ ގައުމުގެ ކުރިމަގު އުޖާލާ ވުމަށް ގިނަގުނަ ހުރަސްތަކާ ކުރިމަތިވާނެކަން ޔަގީނެވެ.

ރައްޔިތުންގެ ތެރެއިން ބައެއް މީހުން ބުނަނީ 500 ރުފިޔާ ދިނުމުން ތިންގަޑި އެއްހާއިރު ގޮނޑިއެއްގައި އިށީދެލާފައި ސައިބޮއިގެން ގެއަށް އެނބުރި އައުމަކީ މައްސަލައެއް ހެއްޔެވެ؟ ޖަލްސާއަށް ވަދެލިއަސް ވޯޓެއް ނުދޭނަމެވެ. މިއީ ވެސް ބައެއް ރައްޔިތުންގެ ފިކުރެވެ.

އިންތިޚާބުތަކާ ގާތްވުމުން ސިޔާސީ ވެރިން ކުރާ ކެމްޕޭނަކީ ވޯޓު ގަތުމެވެ. ރައްޔިތުންނަށް ވިއްކާނެ އެއްޗެއް އެވެރިންގެ އަތަކު ނުއޮވެއެވެ. މިކަކަމަށް ރައްޔިތުން ހޭލާން އެބަ ޖެހެއެވެ.

ރައްޔިތުންގެ ދިރިއުޅުމުގެ ޙާލަތު ރަނގަޅުކޮށް ރައްޔިތު މީހާއަކީ ފުދުންތެރި މީހަކަށް ހަދައި ދިނުމަށް ޚާއްޞަކޮށް އެމް.ޑީ.ޕީއިން ވަނީ ވަކާލާތު ކޮށް ވެރިކަން ލިބުމުން މިކަން ތަންފީޒު ކުރާނެ ކަމަށް ވަޢުދު ވެފައެވެ. އެހެނަސް ވެރިކަން ލިބުމުން އެހެން ޕާޓީތަކުގެ ވެރިކަން ހިނގައިދިޔަ ގޮތަށް ވަޢުދުގެ ބާބު ހަނދާނުން ފިލައި ދިޔަ ކަހަލައެވެ.

އަބުރަކީ ކޮންމީހަކު ވެސް އަމިއްލައަށް ރައްކާތެރި ކުރަން ޖެހޭ އަމިއްލަ ހައްގެކެވެ. އެންމެންގެ ކުރިމަތީގައި އަމިއްލައަށް އޮރިޔާންވެ ބަރަހަނާ ވުމުން އަބުރު ޙިމާޔަތެއް ނުވާނެ ކަން ނޭނގުމަކީ ވިސްނުމުގެ އުނިކަމެވެ.

މިރާއްޖޭގެ ރައްޔިތުން ވައްކަމާއި އަނިޔާވެރިކަމަށް އޯކޭއެއް ނޫނެވެ. ހިނގަމުން މިދަނީ އެމް.ޑީ.ޕީ.ގެ ހަގީގީވެރިކަމެއް ނޫނެވެ. އެމްޑީޕީގެ އެއްވެސް ފިކުރެއް މި ވެރިކަމުގެ ތެރެއަކު ނެތެވެ. ރައްޔިތުންގެ ހައްގުގައި ވަކާލާތުކުރި ސިޔާސީ ލީޑަރު އެކަހެރި ކޮށްގެން ގައުމުގެ ރައްޔިތުންގެ އުންމީދު ގެ ހުޅުކޮޅު ނިވިދިއުން ނޫން އެހެން ގޮތެއް ނުފެންނާނެއެވެ

އިސްލާމީ އުންމަތެއްގެ ވެރިއެއްގެ ކިބައިގާ އިޚުލާޞް ތެރިކަމާއި އަމާނާތް ތެރިކަމާއި ރައްޔިތުންގެ ހައްގަށް އިޙުތިރާމް ކުރުންފަދަ ކަންކަން ނެތްނަމަ އެ އުންމަތެއް ފަނާވެ ހިނގައިދާނެއެވެ. އެވޭލާ ޒަމާނުއްސުރެ ރައްޔިތު މީހާގެ ހައްގުތަކަށް އިޙުތިރާމް ކުރާ ވެރިޔަކު މިގައުމުން ފެނިފައި ނެތީ ރައްޔިތުންގެ ހޭލުން ތެރިކަން ނެތީމައެވެ. އެހެން ކަމުން މަދުބައެއްގެ ޖީބުތަށް ފުރާލައި ފަގީރުން އިތުރަށް ފަގީރުވުން ދަނީ އިތުރުވަމުންނެވެ. އަނިޔާވެރިޔަކާ ގުޅޭނީ އަނިޔާ އަށް އޯކޭ ވާ މީހުންކަމާމެދަކު ޝައްކެއް ނެތެވެ.

ގައުމެއްގެ ތަރައްގީ އަކީ އެގައުމެއް ރައްޔިތުމީހާއަށް ވާގޮތެކެވެ. ރައްޔިތުމީހާ ސަލާން ޖަހާ އިރު ވަށައިގެން މައްޗަށް އަރާ ކޮންކްރީޓް ޢިމާރާތްތަކުގެ ސަބަބުން ރައްޔިތުމީހާއަށް ކުރަނީ ނޭދެވޭ އަސަރުތަކެވެ. އަޅާ ބުރިޖަކުން އަޅާ އުސް އިމާރާތަކުން ރައްޔިތުމީހާ ފުދުންތެރި ނުވާކަން އެނގޭ ރައްޔިތުން މިހާރު ގިނަވާނެއެވެ.

ފުދުންތެރިންނަށް ފަސޭހަވެ ގަންނާނެ ފުލެޓްތައް އެޅުމުން ފުދުންތެރި މީހާ އިތުރަށް މުއްސަނދި ވާނެއެވެ.

ގައުމެއްގެ އެންމެ މުހިންމު ބަހާއަކީ ނިކަމެތި ރައްޔިތު މީހާ އެވެ. އެމީހާއާ މެދު ނުވިސްނައި މަހުޖަނުންނަށް ބަރޯސާވާ ވެރިންގެ ކިބައިން މިގައުމު ސަލާމަތް ކުރުމުގެ ވިސްނުމުގައި ވޯޓް ދީގެން މެނުވީ ގައުމު ތަރައްގީއެއް ނުވާނެއެވެ.

ތިމާއާއި ތިމާގެ އަނބިދަރީންނާއި ޢާއިލާއާ މެދު ފުންކޮށް ވިސްނުމަށްފަހު މެނުވީ ގައުމަށް ވެރިޔަކު އިޚްތިޔާރު ނުކުރާށެވެ.