2018ވަނަ އަހަރުގައި ބޭއްވި ރިޔާސީ އިންތިހާބު އޮޅުވައި ލައިފައި ނުވާނެކަމަށް ވިދާޅުވެ އިލެކްޝަން ކޮމިޝަނުގެ ކުރީގެ ނާއިބުރައީސް އަހުމަދު އަކްރަމް މިއަދު ﷲގަންދީ ހުވާކުރައްވައިފިއެވެ.
ރިޔާސީ އިންތިހާބު އޮޅުވައި ނުލާކަމަށް ﷲގަންދީ ހުވާކުރައްވައި އަކްރަމް ކުރެެއްވި ޓްވީޓެއްގައި ވިދާޅުވީ އިންތިހާބުގެ ނަތީޖާ ރައްޔިތުންނަށް ފޯރުކޮށްދިނީ ރައްޔިތުން ވޯޓުލާފައިވާ ގޮތަށް އެއްވެސް ބަދަލުކުރުމަކާ ނުލައި ކަމަށެވެ.
”އަނެއްކާވެސް 2018 ގެ ރިޔާސީ އިންތިހާބުގެ ވާހަކަތަކެވެ. ﷲ ގަންދީ ބުނަމެވެ. އެ އިންތިހާބުގެ ނަތީޖާ ރައްޔިތުންނަށް ފޯރުކޮށްދިނީ ބަދަލުކުރުމަކާއިނުލާ، ރައްޔިތުން ވޯޓުލީ ގޮތަށެވެ.“ އަކްރަމް ވިދާޅުވެފައިވެއެވެ.
އަދި ދުލާއި ގަލަމުގެ ބޭނުން ހެޔޮގޮތުގައި ހިފާ ﷲގެ އަޒާބަށް ބިރުވެތުވުމަށް ވެސް އަކްރަމްގެ ޓްވީޓްގައި އޭނާ ވަނީ ގޮވާލައްވާފައެވެ.
އަނެއްކާވެސް 2018 ގެ ރިޔާސީ އިންތިހާބުގެ ވާހަކަ ތަކެވެ.
ﷲ ގަންދީ ބުނަމެވެ. އެއިންތިހާބުގެ ނަތީޖާ ރައްޔިތުންނަށް ފޯރުކޮށްދިނީ ބަދަލުކުރމަކާއިނުލާ،ރައްޔިތުން ވޯޓުލީ ގޮތަށެވެ.
ދުލާއި ގަލަމުގެ ބޭނުން ތެދު ގޮުތުގައި ނޫނީ ނުހިފާށެވެ.ﷲގެ އަޒާބައް ބިރުވެތިވާށެވެ— Ahmed Akram (@akram4535) December 12, 2021
ރިޔާސީ އިންތިހާބު އޮޅުވާލާފައި ނުވާނެ ކަމަށް ވިދާޅުވެ އަކްރަމް ހުވާކުރައްވާ ވާހަކަފުޅު ދައްކަވާފައި މިވަނީ އެ އިންތިހާބް އޮޅުވާލައިފައިވާ ކަމަށް ބުނެ އިދިކޮޅު ފަރާތްތަކުން ވަރުގަދަ ބަހުގެ ހަމަލާތަކެއް އިލެކްޝަން ކޮމިނަށް ރައްދުކޮށްފައިވާ ދަނޑިވަޅެއްގައެވެ.
އެގޮތުން އިލެކްޝަން ކޮމިޝަނުގެ ކުރީގެ ރައީސް އަހުމަދު ޝަރީފް ވަނީ އިންތިހާބު އޮޅުވާލައިފައި ކަމަށް ވިދާޅުވެ އިދިކޮޅު ލީޑަރު ރައީސް އަބްދުއްﷲ ޔާމިން އަބްދުލް ގައްޔޫމްވަނީ ޝަރީފަކީ ޚާއިނެއްކަމަށް ސިފަކުރައްވާ މިދިޔަ ހަފްތާގައ ވަނީ ވާހަަކަފުޅު ދައްކަވާފައެވެ.
އަދި އެ ވާހަކަފުޅު ތަކަށް ބާރުލިބޭ ރިޕޯޓެއް ކަމަށްބުނާ ލިއުމެއް ލީކުވެފައިވާ ކަމަށް ރާއްޖޭގެ ބައެއް މީޑިއާތަކުން ރިޕޯޓް ކޮށްފައިވެސް ވެއެވެ.
2018ވަނަ އަހަރުގައި އޮތް ރިޔާސީ އިންތިހާބުގައި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން ލިބިވަޑައިގެންފައިވަނީ 96،052 ވޯޓެވެ. އަދި އިންތިހާބު ކާމިޔާބުކުރެއްވި އެމްޑީޕީގެ ކެންޑިޑޭޓް އިބްރާހީމް މުހައްމަދު ސާލިހަށް ލިބިވަޑައިގެންފައިވަނީ 134،705 ވޯޓެވެ.