ކުޅުދުއްފުށީ ސިޓީގައި ނުރައްކާތެރި އަލިފާނުގެ ހާދިސާއެއްގައި  ބޮޑެތި ގެއްލުންތަކެއް ލިބިއްޖެއެވެ.

އެމްއެންޑީއެފްއިން ބުނީ ކުޅުދުއްފުށީ ސިޓީގައި އަލިފާނުގެ ހާދިސާ ހިނގާފައިވަނީ އެރަށުގައި ހުންނަ ”މެސްކޮޓް ގަރާޖް“ ގައި ކަމަށާ އަލިފާނުގެ ހާދިސާގެ  ރިޕޯޓް އެމްއެންޑީއެފް ލިބިފައިވަނީ ރޭ 02:48 ހާއިރުކަމަށެވެ.

މި ހާދިސާގެ ރިޕޯޓް ލިބުމާއެކު ކުޅުދުއްފުށި ފަޔަރ ސްޓޭޝަންގެ ފަޔަރފައިޓަރުން ވަގުތުން ހަރަކާތްތެރިވާން ފެށިކަމަށާއި، މިގޮތުން ކުރި މަސައްކަތުން ރޭ 03:45 ހާއިރު ވަނީ އަލިފާން ނިއްވާލާފައިކަމަށް އެމްއެންޑީއެފުން މައުލޫމާތު ދެއެވެ.

އެމްއެންޑީއެފްން ބުނީ  އަލިފާނުގެ ހާދިސާ ހިނގި ސަރަހައްދުން އަލިފާން ކޮންޓްރޯލް ކުރިފަހުން އެސަރަހައްދުން ދުން އަރާތީ މިއަދު ހެނދުނު 06:30 ހާއިރު އެ ސަރަހައްދަށް ގޮސް އެތަނަށް ފެން ޖަހާ ދުންގަނޑު ކޮންޓްރޯލް ކޮށްފައިވާކަމަށެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވިނަމަވެސް އަލިފާން ރޯވި ގަރާޖަށް ވަނީ ވަރަށް ބޮޑަށް ގެއްލުން ލިބިފައެވެ.

މިހާދިސާގައި އެ ގަރާޖްގައި ވެހިކަލް ދޮންނަން ބޭނުންކުރާ ބައި ބޭނުން ނުކުރެވޭވަރަށް އަނދާހުލިވެފައިވާއިރު، ސްޕެއާޕާޓްސް ބަހައްޓާފައި ހުންނަ ބަޔަށްވެސް ވަނީ ބޮޑެތި ގެއްލުންތަކެއް ލިބިފައެވެ.

މިހާދިސާ ހިނގަން މެދުވެރިވި ސަބަބެއް އަދި ނޭނގެއެވެ.