ޗައިނާގެ ކަނޑުގެ އަސްކަރީ ފްލީޓްގައި ހިމެނޭ ހަނގުރާމަމަތީ އުޅަނދުތަކާއި ސަބްމެރިންތަކުގެ އަދަދު 400 އަށްވުރެ މައްޗަށް އަރައިފިއެވެ. މިއާއެކު އުޅަނދުފަހަރުގެ އަދަދުގެ ގޮތުން ޗައިނާއިން އެމެރިކާއަށްވުރެ ކުރިހޯދާފައިވާއިރު، މިއީ އެމެރިކާގެ އަސްކަރީ ޕްލޭނަރުންގެ މެދުގައި ކަންބޮޑުވުން އުފެދިފައިވާ ކަމެކެވެ.

’ދަ ވޯލް ސްޓްރީޓް ޖާނަލް‘ އިން ދިރާސާކޮށްފައިވާ އެމެރިކާގެ ރަސްމީ ހިސާބުތަކުން ދައްކާގޮތުގައި، އުޅަނދުފަހަރުގެ އަދަދަށް ބަލާއިރު ޗައިނާގެ ކަނޑުގެ ސިފައިންގެ ފްލީޓް މިހާރު އެމެރިކާގެ ފްލީޓަށްވުރެ ގާތްގަނޑަކަށް 35 އިންސައްތަ ބޮޑެވެ. ޗައިނާއިން މިހާރު ވެސް ތިން އެއާކްރާފްޓް ކެރިއަރު އޮޕަރޭޓްކުރަމުންދާއިރު، ހަތަރުވަނަ އެއާކްރާފްޓް ކެރިއަރެއް ބިނާކުރުމުގެ މަސައްކަތް ދަނީ ކުރަމުންނެވެ. މާހިރުން ލަފާކުރާގޮތުގައި މިއީ ނިއުކްލިއާ ބާރުގައި ދުއްވާ އުޅަނދަކަށް ވުމަކީ އެކަށީގެންވާ ކަމެކެވެ.

ދެކުނު ޗައިނާ ކަނޑާއި، ޖަޕާނާއި ޓައިވާން ކައިރީގެ ކަނޑުގެ ސަރަހައްދުތައް ހިމެނޭހެން، އޭޝިއާގެ މައިގަނޑު ކަނޑުދަތުރުފަތުރުގެ މަގުތަކުގައި ޗައިނާގެ ކަނޑުގެ އަސްކަރިއްޔާގެ ގާތްގަނޑަކަށް 100 އުޅަނދު ކޮންމެ ދުވަހަކުވެސް ހަރަކާތްތެރިވާ ކަމަށް އަންދާޒާކުރެވެއެވެ.

ޗައިނާގެ އަސްކަރީ ފްލީޓް މިގޮތަށް ފުޅާކުރުމަށް އެހީތެރިވެދެނީ އެ ގައުމުގެ ބިޔަ ބޯޓު ބަނުމުގެ ސިނާއަތުންނެވެ. މި ސިނާއަތުން އަހަރަކު ދުނިޔޭގެ ވިޔަފާރި އުޅަނދުފަހަރުގެ ދެބައިކުޅަ އެއްބަޔަށްވުރެ ގިނަ އުޅަނދު އުފައްދައެވެ. 2020 އާއި 2026 އާ ދެމެދު ޗައިނާއިން ވަނީ ބޮޑެތި 71 ހަނގުރާމަމަތީ މަނަވަރާއި ސަބްމެރިން ފްލީޓަށް އިތުރުކޮށްފައެވެ. އޭގެ ތެރޭގައި މިދިޔަ އަހަރު އިތުރުކުރި 19 އުޅަނދު ވެސް ހިމެނެއެވެ.

އަސްކަރިއްޔާ ފުޅާކުރުމުގެ މި މަސައްކަތުގެ ބޮޑުބައެއް ކުރިއަށްދަނީ ޝަންހާއީ ކައިރީގައި އޮންނަ ޗަންގްޝިންގް ރަށުގެ ޝިޕްޔާޑްތަކުގައެވެ. އެތަނުގައި ފަހުގެ ޒަމާނީ އަސްކަރީ އުޅަނދުފަހަރު ދަނީ ބިނާކުރަމުންނެވެ.

ބެއިޖިންގްގެ އަމާޒަކީ އެ ގައުމުގެ ވަށައިގެންވާ ކަނޑުގެ ސަރަހައްދުތަކާއި، މިލްކުވެރިކަމާމެދު ދެބަސްވުން އުފެދިފައިވާ ސަރަހައްދުތަކުގެ އިތުރުން ސްޓްރެޓީޖިކް ގޮތުން މުހިންމު ކަނޑުދަތުރުފަތުރުގެ މަގުތަކުގެ މައްޗަށް އޮތް ބާރުގަދަކުރުމެވެ. މި ދަނޑިވަޅުގައި ވޮޝިންގްޓަނުން މަސައްކަތްކުރަމުން ދަނީ އެ ސަރަހައްދުގައި އެންމެ ބާރުގަދަ އަސްކަރީ ބާރަކަށް ޗައިނާ ވިޔަނުދީ ހިފެހެއްޓުމަށެވެ.

ކަނޑުގެ ސަރަހައްދުތަކުގައި ޗައިނާގެ އަސްކަރީ ހަރަކާތްތައް އިތުރުވަމުން ދިޔުމަކީ ދެ ގައުމުގެ ދެމެދުގައިވާ ސްޓްރެޓީޖިކް ވާދަވެރިކަން އިތުރަށް ވަރުގަދަވެގެން ގޮސްފައިވާ ސަބަބެކެވެ.