ދަ ޓެލެގްރާފްގައި ޝާއިއުކޮށްފައިވާ ތަހުލީލަކުން ދައްކާ ގޮތުގައި، ހަތަރު ހަފުތާ ވަންދެން ޕާން ކެއުން ހުއްޓާލުމަކީ ނުގަޑީގައި ލުއިކާނާ ފަދަ ތަކެތި ކެއުން މަދުކުރުމަށާއި، ބަރުދަން ކޮންޓްރޯލްކުރުމަށާއި، ބަނޑުފުފުމުގެ މައްސަލަ ހައްލުކުރުމަށް އެހީތެރިވެދޭނެ ކަމެކެވެ. ހާއްސަކޮށް ޕާނުގެ ބަދަލުގައި ފައިބަރުން މުއްސަނދި، ޕްރޮސެސްނުކުރާ ކާނާ ބޭނުންކުރާ ނަމައެވެ.
މި ތަހުލީލުގައި، ނޫސްވެރިޔާ މިރަންޑާ މެކްމިން ހަތަރު ހަފުތާ ވަންދެން ޕާން ކެއުން ހުއްޓާލުމުން، ބަނޑުފުފުން ކުޑަވެ، ހަށިގަނޑުގެ ހަކަތަ އެއްވަރެއްގައި ހިފެހެއްޓި، އަދި ބަރުދަން ލުއިވިކަން ފާހަގަކުރެވުނެވެ. ރަޖިސްޓާޑް ނިއުޓްރިޝަނިސްޓެއް ކަމަށްވާ ކެރެން ރިޗާޑްސް ވިދާޅުވި ގޮތުގައި، ޕާނަށް ބަރޯސާވާ މިންވަރު ކުޑަކުރުމަކީ މީހުންނަށް އިތުރަށް މިންހެޔޮ ކާނާ އިހުތިޔާރުކުރުމަށް ހިތްވަރު ލިބިގެންދާނެ ކަމެކެވެ.
ޕާނަކީ އޭގެ ޒާތުގައި ސިއްހަތަށް ގެއްލުންހުރި އެއްޗެއް ނޫނެވެ. ނަމަވެސް ބައެއް ބާވަތްތަކުގައި، ހާއްސަކޮށް މާ ބޮޑަށް ޕްރޮސެސްކޮށްފައި ހުންނަ ހުދު ޕާނުގައި ފައިބަރު ހުންނަނީ ނިސްބަތުން ވަރަށް މަދުންނެވެ. އަދި އެއީ އާދަޔާ ހިލާފަށް ގިނައިން ކެވިދާނެ އެއްޗެކެވެ. ރިޗާޑްސް ވިދާޅުވާ ގޮތުގައި، ޕްރޮސެސްކޮށްފައިވާ ޕާނުގެ ސަބަބުން ލޭގައި ހަކުރު އެކުލެވޭ މިންވަރު އަވަހަށް މަތިވެގެންދެއެވެ. އަދި އޭގެ ފަހުން ވަރުބަލިކަން އިހުސާސްވެ، ފޮނި ކާނާ ކެއުމަށް ބޭނުންވުން އެކަށީގެންވެއެވެ.
ބަނޑުފުރިފައި ހުންނަ އިހުސާސް ގިނައިރު ވަންދެން ދަމަހައްޓައިނުދީ، ކެއުމުގެ މައިގަނޑު ބަޔަކަށް ޕާން ހަދައިފިނަމަ، އެއީ ބަރުދަން އިތުރުވުމަށް ވެސް މަގުފަހިވާ ކަމެކެވެ. ތޮޅީގެ ބާވަތްތަކާއި، މުގާއި، ކައްޓަލައާއި، ކީންވާ އަދި ރަތް ހަނޑުލަކީ ކާބޯހައިޑްރޭޓްސް ލިއްބައިދޭ ބަދަލު ވަސީލަތްތަކެކެވެ. އަދި އެ ތަކެތީގައި އެކުލެވޭ ފައިބަރުގެ ސަބަބުން ގިނައިރު ވަންދެން ބަނޑުފުރިފައި ހުންނަ ކަމުގެ އިހުސާސް ކޮށްދެއެވެ.
މި ތަހުލީލުގެ ކުރީކޮޅު، މެކްމިން، ޕާނުގެ ބަދަލުގައި ސެލަޑާއި ޕްރޮޓީން ބޭނުންކުރި ނަމަވެސް، އޭނާއަށް ބަނޑުހައިހޫނުކަން އިހުސާސްވަމުން ދިޔައެވެ. ފަހުން އޭނާ ވަނީ ދޮންކޭލާއެކު އޯޓްސް، ތޮޅި އަދި މުގު އެކުލެވޭ ކެއުންތައް ބޭނުންކުރަން ފަށާފައެވެ. މި ބަދަލުތަކުގެ ސަބަބުން އޭނާގެ ބަނޑުހައިހޫނުކަން ކޮންޓްރޯލްވެ، ބިސްކޯދާއި ކޭކު ފަދަ ތަކެތި ކެއުމަށް ހުންނަ އެދުން ކުޑަވިއެވެ.
މި ތަހުލީލުން ހަޖަމުގެ ނިޒާމުގެ ދުޅަހެޔޮކަމަށް ލިބިދާނެ ފައިދާތައް ވެސް ފާހަގަވިއެވެ. ފައިބަރު މަދު ޕާނުގެ ބަދަލުގައި ތޮޅީގެ ބާވަތްތަކާއި، ތަރުކާރީ އަދި އެހެނިހެން ފައިބަރުން މުއްސަނދި ކާނާ ބޭނުންކުރުމަކީ ގޮހޮރުގެ ބެކްޓީރިއާއަށް އެހީތެރިވެދީ، ހަޖަމުގެ ނިޒާމު ރަނގަޅުކޮށްދޭނެ ކަމެކެވެ. ނަމަވެސް، ބަނޑުފުފުމަކީ ޕާނުގެ ސަބަބުން އެކަނި ދިމާވާ ކަމެއް ނޫނެވެ. އަދި ބައެއް ކާނާ އެކި މީހުންގެ ހަށިގަނޑާއި ނުގުޅުމާއި، ސްޓްރެސް އަދި ކެއުމުގެ އާދަތަކަށް ބަލައި ކޮންމެ މީހަކަށް ވެސް މިކަމުގައި ކުރާ އަސަރު ތަފާތުވެދާނެއެވެ.
މާ ބޮޑަށް ޕްރޮސެސްކޮށްފައި ހުންނަ ހުދު ޕާނަށް ވުރެ ބުރައުން ޕާން މާ ރަނގަޅު ކަމަށް ރިޗާޑްސް ފާހަގަކުރެއްވިއެވެ. އަދި ބިސް، މަސް، ނަޓްސް ނުވަތަ ކޮޓެޖް ޗީޒް ފަދަ ޕްރޮޓީން ގިނަ ކާނާއާ އެކު ޕާން ކެއުމަކީ ބަނޑުފުރިފައި ހުރުމަށް އެހީތެރިވެދީ، ހަށިގަނޑަށް ކާބޯހައިޑްރޭޓްސް ދަމައިގަންނަ މިންވަރު ލަސްކޮށްދޭނެ ކަމެކެވެ.
ގިނަ މީހުންނަށް ޕާން ކެއުން އެއްކޮށް ހުއްޓާލުމަކީ ކޮންމެހެން މުހިންމު ކަމެއް ނޫނެވެ. ޕާނުން ލިބޭ ކާބޯހައިޑްރޭޓްސް އަދި އެހެނިހެން މާއްދާތައް ލިބޭނެ އެހެން އެއްޗެއް ބޭނުންނުކޮށް ޕާން ކެއުން ހުއްޓާލައިފިނަމަ ވަރުބަލިވުމާއި، ރުޅިގަދަވުން ނުވަތަ ބަނޑުހިކުން ފަދަ ކަންކަން މެދުވެރިވެދާނެއެވެ.
މުހިންމު ކަމަކީ ޕްރޮސެސްކުރުން މަދު ބާވަތްތައް އިހުތިޔާރުކުރުމާއި، މިންހެޔޮ ކެއުމެއް ކެއުމާއި، ތަފާތު ބާވަތްތަކުގެ ކާނާ ހިމެނޭ ޑައެޓެއް ދެމެހެއްޓުމެވެ. ސިއްހަތަށް ފައިދާހުރި ކެއުމުގެ ވައްޓަފާޅިއެއްގައި އަދިވެސް ޕާން ހިމެނިދާނެއެވެ. ނަމަވެސް އެއީ ކޮންމެހެން ކާންޖެހޭ އަސާސީ އެއްޗެއްގެ ގޮތުގައި ދުށުމުގެ ބަދަލުގައި، އެއީ ކެވިދާނެ ތަކެތީގެ އެއް އިހުތިޔާރު ކަމަށް ބެލުމަކީ ރަނގަޅު ކެއުމުގެ އާދަތައް އަށަގަންނުވަން އެހީތެރިވެދޭނެ ކަމެކެވެ.
