އުތުރު ކޮރެއާއިން އެ ގައުމުގެ އިރުމަތީ އައްސޭރިފަށުގެ ކަނޑަށް މިއަދު ބެލިސްޓިކް މިސައިލެއް ފޮނުވާލާފައިވާއިރު، އެ މިސައިލް 700 ކިލޯމީޓަރަށް ވުރެ ދުރަށް ދަތުރުކުރި ކަމަށް ދެކުނު ކޮރެއާއިން ބުނެފިއެވެ.

ދެކުނު ކޮރެއާގެ ޖޮއިންޓް ޗީފްސް އޮފް ސްޓާފުން ބުނީ މި މިސައިލް ފޮނުވާލާފައިވަނީ ކޮރެއަން ޕެނިންސިއުލާގެ އިރުމަތީ އައްސޭރީގައި އޮންނަ ބަނދަރު ސިޓީއެއް ކަމަށްވާ ވޮންސާނުން ކަމަށެވެ. މި މިސައިލް ފޮނުވާލުމާ ގުޅިގެން ހާލަތު ވަޒަންކުރުމަށްޓަކައި ސޯލްގެ ރިޔާސީ ގައުމީ ސަލާމަތާ ބެހޭ އޮފީހުން ވަނީ ކުއްލި ބައްދަލުވުމެއް ބާއްވާފައެވެ.

އިތުރު މިސައިލްތަކެއް ފޮނުވާލަފާނެ ކަމަށް ބަލައި ދެކުނު ކޮރެއާގެ އަސްކަރިއްޔާއިން އެލާޓް ލެވެލް މަތިކޮށްފައިވާއިރު، އެމެރިކާ އާއި ޖަޕާނާއި މައުލޫމާތު ހިއްސާކުރާނެ ކަމަށް ވަނީ ބުނެފައެވެ. އަދި ޖަޕާނުން ވެސް ކުއްލި އިންޒާރެއް ނެރެމުން ބުނެފައިވަނީ އުތުރު ކޮރެއާއިން ބެލިސްޓިކް މިސައިލެއް ކަމަށް ޝައްކުކުރެވޭ އެއްޗެއް ފޮނުވާލާފައިވާ ކަމަށެވެ.

ޔޫއެސް ޕެސިފިކް ކޮމާންޑުން ބުނީ މިސައިލް ފޮނުވާލިކަން އެނގިފައިވާ ކަމަށާއި، ބައިވެރި ގައުމުތަކާ އެކު މަޝްވަރާ ކުރަމުންދާ ކަމަށެވެ. އަދި ފުރަތަމަ ބެލި ބެލުމުން މި ހަމަލާއަކީ އެމެރިކާގެ ސިފައިންނަށް، ނުވަތަ އެ ގައުމުގެ ސަރަހައްދަށް، ނުވަތަ އެކުވެރި ގައުމުތަކަށް އޮތް ސީދާ ނުރައްކަލެއް ނޫން ކަމަށް ދައްކާ ކަމަށް ވެސް ބުނެފައިވެއެވެ.

މި މިސައިލް ފޮނުވާލާފައި މިވަނީ، ދެ ގައުމުގެ ބޯޑަރު ކައިރީގައި ފަހަކުން ހިނގި ބޮން ގޮވުންތަކާއި ގުޅިގެން މާފަށް އެދުމަށް ދެކުނު ކޮރެއާއިން ކުރި ޑިމާންޑްތައް އުތުރު ކޮރެއާގެ ލީޑަރު ކިމް ޖޮންގް އުންގެ ކޮއްކޮ ކިމް ޔޯ ޖޮންގް ދޮގުކޮށް، އެކަން ބަލައިނުގަތްތާ އެއްދުވަސް ފަހުންނެވެ.

މި ފަހުގެ ހަރަކާތަކީ ފާއިތުވި ހަފުތާތަކުގައި އުތުރު ކޮރެއާއިން ހިންގި އަސްކަރީ ހަރަކާތްތަކުގެ ތެރެއިން އެއް ހަރަކާތެވެ. މީގެ ތެރޭގައި މިސައިލް ޓެސްޓްކުރުމާއި، ވަގުތުން ބަޑިޖެހުމުގެ ތަމްރީނުތަކާއި، އަލަށް ބަނދެވުނު ހަނގުރާމަމަތީ މަނަވަރެއް ޚިދުމަތަށް ނެރުން ހިމެނެއެވެ.