ޣައްޒާއަށް ބޭސްފަރުވާއާއި، ޕްރޮސްތެޓިކްސް އަދި އެހެނިހެން ސިއްޙީ ސާމާނު އެތެރެކުރުމަށް ތަކުރާރުކޮށް ކުރިމަތިވަމުންދާ ދަތިތަކާއި ލަސްތަކުގެ ސަބަބުން، ކުއްލި ސިއްޙީ ފަރުވާއަށް ބޭނުންވެފައިވާ ފަލަސްޠީނުގެ ރައްޔިތުންނަށް ”ހިތާމަވެރި ނަތީޖާތަކެއް“ ކުރިމަތިވެދާނެ ކަމަށް ދުނިޔޭގެ ޞިއްޙަތު ޖަމްޢިއްޔާ (ޑަބްލިޔުއެޗްއޯ) އިން އިންޒާރު ދީފިއެވެ.
ފަލަސްޠީނުގައި ހުންނަވާ ޑަބްލިޔުއެޗްއޯގެ މަންދޫބު ރެއިންހިލްޑޭ ވެން ޑި ވީރްޓް ހުކުރު ދުވަހު ވިދާޅުވީ، ހުއްދަ ލިބިފައިވާ އިންސާނީ އެހީގެ ތަކެތި މިހާރު ޣައްޒާއަށް ވެއްދެނީ ކަރަމް އަބޫ ސާލިމް ބޯޑަރު ހުރަސްކޮށް ކަމަށެވެ. އަދި ރަފަޙް ބޯޑަރު މިހާރު ބޭނުންކުރެވެނީ، ބޭރުން ފަރުވާ ހޯދަން ބޭނުންވާ ބަލިމީހުން ހިމެނޭހެން، މަދު އަދަދެއްގެ ބަޔަކު ދަތުރުފަތުރު ކުރުމަށް އެކަނި ކަމަށް އޭނާ ވިދާޅުވިއެވެ.
ވެން ޑި ވީރްޓް ވިދާޅުވި ގޮތުގައި، ޕްރޮސްތެޓިކްސް އަދި އެހީތެރިވެދޭ އެހެނިހެން އާލާތްތައް ހިމެނޭ ޝިޕްމަންޓެއް ވޭތުވެދިޔަ ހަ މަސް ދުވަހުގެ ތެރޭގައި ހަތަރު ފަހަރެއްގެ މަތިން ވަނީ ވެއްދިޔަނުދީ އަނބުރާ ފޮނުވާލާފައެވެ. އޭނާ ވިދާޅުވީ، ކޮންމެ ފަހަރަކު އަނބުރާ ފޮނުވާލުމަކީ، ހަށިގަނޑުގެ ގުނަވަންތައް ގެއްލި، ޕްރޮސްތެޓިކް އެހީތެރިކަމަށް އިންތިޒާރު ކުރަމުންދާ މީހުންނަށް އެހީ ފޯރުކޮށްދިނުން ލަސްވެގެންދާ ކަމެއް ކަމަށެވެ.
އޭނާ ވަނީ މަދު ބޯޑަރު ޕޮއިންޓްތަކަކަށް ބަރޯސާވުމުގެ ބަދަލުގައި، ގިނަ ބޯޑަރުތައް ބޭނުންކުރެވޭނެ ނިޒާމަކަށް ގޮވާލައްވައި، އިންސާނީ އަދި ސިއްޙީ އެހީގެ ސާމާނު އެއްވެސް ހުރަހެއްނެތި، ޔަޤީންކަމާއެކު ވެއްދޭނެ ގޮތް ހަމަޖައްސައިދިނުމަށް އިސްރާއީލުގެ ކަމާބެހޭ ފަރާތްތަކަށް އިލްތިމާސްކުރައްވާފައެވެ.
މީގެއިތުރުން، ފިންޏާއި ފެންބޮޑުވުމުން ރައްކާތެރިވުމަށް ގާތްގަނޑަކަށް ދެ މިލިއަން މީހުން ހިޔާވަހިކަމަށް ބޭނުންވެފައިވާތީ، ފިނި މޫސުމުގެ ސަބަބުން ސިއްޙީ ނުރައްކާތައް އިތުރަށް ގޯސްވެދާނެ ކަމުގެ އިންޒާރުވެސް ޑަބްލިޔުއެޗްއޯ އިން ވަނީ ދީފައެވެ.
ވެން ޑި ވީރްޓް ވިދާޅުވީ އެކަށީގެންވާ ހިޔާވަހިކަމެއް ނެތުމާއި، ރައްކާތެރި ނޫން ފެނާއި، މީދާ ފަދަ ތަކެތި ގިނަވުމުގެ ސަބަބުން، ރައްކާތެރިވެވޭނެ ބަލިމަޑުކަން ފެތުރުމުގެ ނުރައްކާ ބޮޑުވަމުންދާ ކަމަށެވެ.
އދ. ގެ އޮފީސް ފޮރ ދަ ކޯޑިނޭޝަން އޮފް ހިއުމަނިޓޭރިއަން އެފެއާޒްއިން ވެސް ވަނީ، ސާމާނާއި ތެލާއި އެހެނިހެން ވަސީލަތްތަކުގެ ދަތިކަމާއެކު ޣައްޒާ ސިޓީގައި ކުނި ޖަމާވަމުންދާތީ، އާންމު ސިއްޙަތަށް ނުރައްކާވެދާނެ ކަމުގެ އިންޒާރު ދީފައެވެ.
