ޖަޕާނުން ދާއިމީ ރެސިޑެންސީ ހޯދާ މީހުން އަތުން ނަގާ ފީ، 20 ގުނަ އިތުރު ކޮށްފިއެވެ. ގަވާއިދަށް މިގެނައި ބަދަލުގެ ދަށުން ޕަރމަނަންޓް ރެސިޑެންސީ ހޯދަން އެދޭމީހުން މިހާރު 2000،000ޔެން ދައްކަން ޖެހެއެވެ.މީގެ ކުރިން ދައްކަން ޖެހެނީ 10،000 ޔެން އެވެ

.

ބޮޑު ކުރެވުނު ފީގެ އިތުރުން އެފަދަ ފަރާތްތަކުން އާމްދަނީ ހޯދާނެ އިތުރު ގޮތްތަކާއި، ޕެންޝަނަށް ފައިސާ ދައްކާނެ ގޮތް އަދި ޖަޕާންބަސް އިނގޭ މިންވަރުވެސް ހާމަ ކުރަން ޖެހެއެވެ.
އައު ގަވާއިދަށް އަމަލު ކުރަންފެށުމުގެ ކުރިން ރެސިޑެންސީ ހޯދުމަށް ގިނަބަޔަކު އިމިގްރޭޝަން އޮފީހުގެ ކުރިމަތީގައި ދިގުކިއުތައް ހެދިކަމަށް ޚަބަރު ތައް ބުނެއެވެ. އަދި ބައެއް މީހުން ހަތްގަޑިއެއްހާއިރު ކިއުގައި މަޑުކުރި ކަމަށް ވެއެވެ.
ދާއިމީ ރެސިޑެންސީ ހޯދާ މީހުންގެ ގެ އަތުން ނަގާފީ ބޮޑުކުރީ ބޭރުމީހުންގެ އާބާދީ އިތުރު ވަމުން ދާ މައްސަލަ ހައްލު ކުރުމަށް ބޮޑުވަޒީރު ސަނާއޭ ޓަކައީޗީ ގެ ސަރުކާރުން އެޅި ފިޔަވަޅުތަކުގެ ދަށުންނެވެ.
މިދިޔަ ޖުލައިމަހުވެސް ޖަޕާނުން ބޭރު މީހުންގެ ވިސާފީ ފަސްގުނަ އިތުރު ކުރިއެވެ. އެއީ ފާއިތުވި 50 އަހަރު ތެރޭވެސް ވިސާ ފީ އިތުރު ކުރި ފުރަތަމަ ފަހަރު ކަމަށް ވެއެވެ.
ޖަޕާނުގައި ހައުސް މެއިޑުން ފަދަ މަސައްކަތް ތެރިންގެ އަދަދު ވަރަށް ބޮޑަށް މަދުވެފައިވާއިރު އިތުރު ވަމުންދާ މުސްކުޅިންގެ އާބާދީ ބެލުމަށްވެސް ގިނަ އަދަދެއްގެ ބޭރު މަސައްކަތްތެރިން ގެންދާކަމަށް ވެއެވެ.ބޭރު މީހުންގެ އާބާދީ އިތުތުވަނީ މިފަދަ ސަބަބު ތަކާ ހެދިއެވެ.
2025 ވަނަ އަހަރު ނިމުނު އިރު ޖަޕަނުގައި ތިބި ބޭރު މީހުންގެ އާބާދީ ވަނީ 4.12މިލިއަނަށް އަރާފައެވެ.މިއީ އޭގެ ކުރީ އަހަރަށް ވުރެ9.5 އިންސައްތަ އިތުރު އަދަދެއް ކަމަށް ވެއެވެ.
މިދިޔަ އަހަރުގެ އޮކްޓޯބަރުމަހު މަގާމާ ހަވާލުވި ފަހުން ބޮޑުވަޒީރު ޓަކައީޗީ ގެންދަވަނީ އިމިގްރޭޝަންގެ މައްސަލަ ތައް ހައްލު ކުރެއްވުމަށް މަސައްކަތް ކުރައްވަމުންނެވެ.
އޮކްޓޯބަރު 1ވަނަ ދުވަހުން ފެށިގެން ތައާރަފް ކުރެވުނު އައު އުސޫލުގެ ދަށުން، ޖަޕާނުގައި ތިބުމަށް އެދޭ މުއްދަތަށްބަލާ ފީ ގެ އަދަދު މަދުވާ ގޮތެއްވެސް އޮވެއެވެ. އަދި މާލީ ދަތިކަމެއް ކުރިމަތިވެފައިވާނަމަ، އަދި ނޫނީ ރެފިއުޖީންގެ ގޮތުގައި އެތެރެވާ ފަރާތްތަކަށް ޑިސްކައުންޓްދޭ އުސޫލު ތަކެއްވެސް އޮންނަ ކަމަށް ވެއެވެ.