ސިންގަޕޫރުގައި ސަރުކާރު މުވައްޒަފުންނަށް ހަޔާތުގެބައިވެރިން ހޯދާދިނުމުގެ ޚާއްސަ ޚިދުމަތެއް ފަށައިފިއެވެ. މި ޕްރޮގްރާމް އަކީ އެގައުމުގައި ކުދިން އުފަންވާ ރޭޓް މާބޮޑަށް ދަށަށް ގޮސްފައިވާތީ އާބާދީ އިތުރ ކުރުމަށް ސަރުކާރުން ފެށި ޕްރޮގްރާމް އެއް ކަމަށް ވެއެވެ.

އުމުރުން 21 އަހަރާއި 35 އަހަރާއި ދެމެދުގެ، މީހުނާއި ނީދެތިބި މީހުންނަށް ޚާއްސަކޮށްގެން މިހަފްތާގައި ”ފަރސްޓް ޑޭޓް“ ގެ ނަމުގައި ފެއްޓި ޚިދުމަތަކީ އެހެން ޑޭޓިންގ ސައިޓް ތަކުން ކުރިމަތިވާ މައްސަލަތަކަށް ހައްލު ހޯދާދޭނެ ޕްރޮގްރާމެއް ކަމަށް ސަރުކާރުން ބުނެފައި ވެއެވެ. މިގޮތުން އެކި ސައިޓް ތަކަށްވަދެ އެތައް ޕްރޮފައިލް ތަކެއް ބެލުމުގެ ބަދަލުގައި ބައިވެރިވާ މީހުން ފުރަންޖެހެނީ ޚާއްސަ ސުވާލު ކަރުދާހެކެވެ. މިގޮތުން ޝައުގްވެރިކަން ހުންނަ ކަންކަމާއި މުހިންމު އާދަކާދަ ތަކާއި ހިފަހައްޓަން ބޭނުން އަގުތައް(ވެލިއުސް) އަދި ހޯދަނީ ކޮން ސިފަ ތަކެއް ހުންނަ މީހެއްތޯ ބުނަން ޖެހެއެވެ. އަދި މިގޮތުން ދެވޭ މައުލޫމާތު ގެ މައްޗަށް ބިނާ ކޮށް ކޮންމެ މީހަކަށްވެސް ބައިވެރިއަކު އިޚުތިޔާރު ކޮށްދިނުމަށްފަހު އީމެއިލް ގެ ޒަރީއާއިން ދެމީހުންނަށް އަންގާ ކަމަށް ވެއެވެ.
ދެމީހުން އެއްބަސްވެ، ބައްދަލް ވުމަށް ވަގުތު ދިނުމަށްފަހު ކުރިޔަށް ދެވޭގޮތް ނުވެއްޖެ ނަމަވެސް އިތުރު ފަރާތްތަކާއި ބައްދަލް ވުމަށްވެސް ފުރުސަތު ހޯދާ ދެއެވެ.
”ފަސްޓް ޑޭޓް“ ޕްރޮގްރާމަށް ސިންގަޕޫރުގެ އާންމުންގެ ފަރާތުން ލިބެމުން ދަނީ ”މިކްސްޑް“ ރައްދު ތަކެއް ކަމަށް ވެއެވެ. ބައެއްމީހުން އެޕްރޮގްރާމަށް ފާޑު ކިޔާއިރު އަނެއްބަޔަކު ޓެސްޓް ކޮށްލާނެ ކަމަށް ބުނެފައިވާ ކަމަށް ވެއެވެ.
ޕްރޮގްރާމްގައި ބައިވެރިވާ މީހުން ”މެޗް“ ކުރުމަށް ބޭނުން ކުރަނީ ނޯބެލް އިނާމު ލިބިފައިވާ ޚާއްސަ ގަވާއިދުތަކެއް(އެލްގޮރިދަމް) އެއް ކަމަށް ވެއެވެ.މި އެލްގޮރިދަމް ބައެއް ބޮޑެތި ސްކޫލްތަކާއި ކޮލެޖް ތަކަށް ކުދިން ވެއްދުމަށްވެސް ބޭނުން ކުރާކަމަށް ވެއެވެ.