ވޮޝިންޓަނުން ތެހެރާނާ ދެކޮޅަށް އެއްވެސް ފިޔަވަޅެއް އަޅައިފިނަމަ، މެދުއިރުމަތީގައިވާ އެމެރިކާގެ އަސްކަރީ މަރުކަޒުތަކަށާއި އެ ގައުމުގެ މަސްލަހަތުތަކަށް ހަމަލާދޭނެ ކަމަށް ބުނެ، އިތުރު ހަމަލާތަކެއް ނުދިނުމަށް އީރާނުން އެމެރިކާއަށް އިންޒާރު ދީފިއެވެ.
އީރާނުގެ ސެމީ-އޮފިޝަލް މެހެރް ނިއުސް އެޖެންސީން ރިޕޯޓްކޮށްފައިވާ މި އިންޒާރު އައިސްފައިވަނީ، ދެމުންދާ ހަމަލާތަކާއި ހޮރްމުޒް ކަނޑުއޮޅީގެ މައްސަލައިގައި ދެ ގައުމުގެ ދެމެދުގައި މަސްރަހު ވަރަށް ބޮޑަށް ހޫނުވެފައިވާ ދަނޑިވަޅެއްގައެވެ.
އީރާނުން ވަނީ ހަނގުރާމަ ނިމުމަކަށް ގެނައުމަށާއި، ސްޓްރެޓީޖިކް ގޮތުން މުހިންމު މި ކަނޑުއޮޅި އަލުން ހުޅުވާލުމަށް އަމާޒުކޮށް ހަތް ދުވަހުގެ ރޯޑްމެޕެއް ހުށަހަޅާފައެވެ. އެ ގައުމުގެ ފޮރިން މިނިސްޓަރު އައްބާސް އަރާޤްޗީ ވިދާޅުވީ، އެމެރިކާއިން އެ ޝަރުތުތަކަށް އެއްބަސްވާނަމަ، އެ ޕްލޭން ތަންފީޒުކުރަން ފެށުމަށް ތެހެރާން އޮތީ ތައްޔާރަށް ކަމަށެވެ.
ނަމަވެސް، އެމެރިކާގެ އޮފިޝަލުން އިޝާރާތް ކުރައްވާފައިވާ ގޮތުގައި އެ ހުށަހެޅުމަށް ޖަވާބު ދިނުމުގައި ވޮޝިންޓަނުން އަވަސް އަރުވާލާކަށް ބޭނުމެއް ނުވެއެވެ. އަލްޖަޒީރާއިން ރިޕޯޓްކޮށްފައިވާ ގޮތުގައި، އެއް ހަފުތާގެ ތެރޭގައި ކަނޑުއޮޅި އަލުން ހުޅުވާލުމަށް އީރާނުން ހުށަހެޅި ހުށަހެޅުން އެމެރިކާގެ ރައީސް ޑޮނަލްޑް ޓްރަމްޕް ވަނީ ދެކޮޅު ހައްދަވާފައެވެ.
އީރާނުގެ ރައީސް މަސްޢޫދު ޕެޒެޝްކިއާން ވެސް ވަނީ މީގެ ކުރިން ކުރެވުނު މަޝްވަރާތަކަށްފަހު ތަކުރާރުކޮށް ދިން ހަމަލާތަކާއި އަޅާފައިވާ ދަތިކުރުމުގެ ފިޔަވަޅުތަކަށް އަލިއަޅުއްވާލައްވައި، ވޮޝިންޓަނާއެކު ދެން ދެއްކޭނެ އިތުބާރު ހުރި ވާހަކައެއް ނެތް ކަމަށް ވިދާޅުވެފައެވެ.
މިދަނޑިވަޅުގައި، ޤަތަރު މެދުވެރިވެގެން ކުރިއަށްގެންދާ މަޝްވަރާތައް އަދިވެސް ކުރިއަށްދާއިރު، ހަމަލާތައް ހުއްޓާލުމުގެ ޝަރުތުތަކާއި އީރާނުގެ ނިއުކްލިއާ ޕްރޮގްރާމާ މެދު ބޮޑެތި ޚިޔާލުތަފާތުވުންތަކެއް ހުރި ނަމަވެސް، ޑިޕްލޮމެޓިކް ދޮރުތައް އަދިވެސް ހުޅުވިފައިވާ ކަމަށް ދެ ފަރާތުންވެސް ބުނެއެވެ.
