ދަ ވޯލް ސްޓްރީޓް ޖާނަލް ގެ ރިޕޯޓެއްގައި ވާގޮތުން، އެމެރިކާގެ ރައީސް ޑޮނަލްޑް ޓްރަމްޕްގެ އިސް މުޝީރުން ވަނީ، އީރާނާ އެކު ކުރަމުންދާ ހަނގުރާމަ ޓްރަމްޕްގެ މިހާރުގެ ދައުރު ނިމޭ ޖެނުއަރީ 2029 އާ ހަމައަށް ދެމިގެން ހިނގައިދާނެ ކަމުގެ އިންޒާރު ސިއްރިއްޔާތުގައި ދެއްވާފައެވެ.

މި ވަޒަންކުރުމުން ދައްކުވައިދެނީ، ނައިބު ރައީސް ޖޭޑީ ވެންސް އަދި ސެކްރެޓަރީ އޮފް ސްޓޭޓް މާކޯ ރޫބިއޯ ހިމެނިވަޑައިގަންނަވާ ގޮތަށް އިސް އޮފިޝަލުންގެ މެދުގައި އޮތް ކަންބޮޑުވުންތަކެވެ. އެއީ އެމެރިކާގެ ފިއްތުންތަކާ ދެކޮޅަށް އީރާނުން އަދިވެސް ހިފަހައްޓަމުން ގެންދާނެ ކަމަށާއި، އޭގެ ސަބަބުން މި ކުރިމަތިލުން ދިގުދެމިގެންދާ ހަނގުރާމައަކަށް ބަދަލުވެދާނެ ކަމުގެ ކަންބޮޑުވުމެވެ.

މި އިންޒާރަކީ، ނޮވެމްބަރު މަހު ބާއްވާ އެމެރިކާގެ މިޑްޓާމް އިންތިޚާބަށް ފަހު މާ ލަސްތަކެއް ނުވެ ހަނގުރާމަ ނިމިދާނެ ކަމަށް ޓްރަމްޕް ދާދިފަހުން ފާޅުގައި ލަފާކުރެއްވި ކުރެއްވުމާ ފުށުއަރާ ކަމެކެވެ. ޓްރަމްޕް ވިދާޅުވެފައިވަނީ އީރާނުގެ އިޤްތިޞާދު ދަށަށް ދިއުމާއި ކުރިމަތިވަމުންދާ ފިއްތުންތަކުގެ ސަބަބުން، ހަނގުރާމަ ކުރިއަށް ގެންދިއުމަށް ތެހެރާނަށް ދަތިވާނެ ކަމަށެވެ.

އަދި މެދުއިރުމަތީގައި އެމެރިކާގެ އަސްކަރީ ބާރުތައް ދިގު މުއްދަތަކަށް ބޭތިއްބުމަށް ވެސް އެމެރިކާއިން ދަނީ ތައްޔާރުވަމުންނެވެ. ރިޕޯޓުގައިވާ ގޮތުން، ޑިފެންސް ސެކްރެޓަރީ ޕީޓް ހެގްސެތު ވަނީ ސިފައިން ތިބޭ މުއްދަތު 2027 އާ ހަމައަށް އިތުރުކުރައްވާފައެވެ. މިހާރުވެސް އެ ސަރަޙައްދުގައި އެމެރިކާގެ ގާތްގަނޑަކަށް 50،000 ސިފައިންނާއި، ހަނގުރާމަމަތީ މަނަވަރުތަކާއި، ފައިޓާ ސްކޮޑްރަންތަކާއި، ވައިގެ ދިފާޢީ ޔުނިޓްތަކުގެ އިތުރުން ޕެރަޓްރޫޕަރުން އެބަތިއްބެވެ.

މިހާރު ހަތްވަނަ މަހަށް ދެމިގެން ގޮސްފައިވާ މި ހަނގުރާމައިގައި މިހާތަނަށް އެމެރިކާގެ 18 ސިފައިން ވަނީ މަރުވެފައެވެ. ފުރަތަމަ ކުރު އަދި އަވަސް ނަތީޖާއެއް ނެރެވޭނެ އަސްކަރީ ކެމްޕޭނެއްގެ ގޮތުގައި ދެއްކި ނަމަވެސް، މިހާރު މިއީ ދިގުދެމިގެންދާ އަސްކަރީ ކުރިމަތިލުމަކަށް ވަނީ ބަދަލުވެފައެވެ.

އީރާނުގެ އޮފިޝަލުން ވެސް ވަނީ ދިގުދެމިގެންދާ ހަނގުރާމައަކަށް ތެހެރާން އޮތީ ތައްޔާރަށް ކަމަށް އިޝާރާތް ކުރައްވާފައެވެ. އިސްލާމިކް ރިވޮލިއުޝަނަރީ ގާޑް ކޯޕްސްގެ އިސް ޖެނެރަލް މުޙައްމަދު ރިޟާ ނަޤްދީ މިދިޔަ މަހު ވިދާޅުވީ، އެ ޤައުމަށް ޙަމަލާދިނުމަކީ ބޮޑު އަގެއް ދައްކަންޖެހޭނެ ކަމެއްކަން ދެއްކުމުގެ ގޮތުން، އީރާނުން ގަސްދުގައި މި ހަނގުރާމަ ދިގުދަންމާލަފާނެ ކަމަށެވެ.

މި ހަނގުރާމަ ފެށުނީ ފެބްރުއަރީ 28 ގައެވެ. އެއީ އެމެރިކާ އަދި އިސްރާއީލުގެ ފައުޖުތަކުން ގުޅިގެން އީރާނަށް ޙަމަލާދީ، އެ ޤައުމުގެ އެންމެ މަތީ ވެރިޔާ ޢަލީ ޚާމަނާއީ ހިމެނިވަޑައިގަންނަވާ ގޮތަށް އިސް ލީޑަރުންތަކެއް ޝަހީދުކޮށްލުމާ ގުޅިގެންނެވެ. އޭގެ ބަދަލުހިފުމެއްގެ ގޮތުން އީރާނުން ވަނީ މެދުއިރުމަތީގެ އެކި ސަރަޙައްދުތަކުގައިވާ އެމެރިކާ އަދި އިސްރާއީލުގެ އަމާޒުތަކަށް ޙަމަލާދީފައެވެ.

އެންމެ ފަހުގެ އިންޒާރުތަކުން ދޭހަވަނީ، ހަނގުރާމަ އަވަހަށް ނިމޭނެ ކަމަށް ޓްރަމްޕް ފާޅުގައި އިތުބާރާއެކު ވިދާޅުވަމުން ގެންދެވި ނަމަވެސް، އެތައް އަހަރަކަށް ދެމިގެން ހިނގައިދާނެ ހަނގުރާމައަކަށް އެމެރިކާގެ އޮފިޝަލުން ތައްޔާރުވަމުންދާ ކަމެވެ.