އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު ވިދާޅުވީ، ތެލާއި އެހެނިހެންވެސް މުދާ އުފުލުމުގައި ދުނިޔޭގެ ހުރިހާ ގައުމަކަށްވެސް މުހިންމު ކަނޑުގެ މަގެއް ކަމަށްވާ ހޯރްމުޒް ކަނޑުއޮޅީގެ ”ފުރިހަމަ ކޮންޓްރޯލް“ އެމެރިކާއިން ހޯދާފައިވާ ކަމަށެވެ.

ޖޮއިންޓް ބޭސް އެންޑްރޫސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ އީރާނާއެކު ހިނގަމުންދާ ފަސް މަސްދުވަހުގެ ހަނގުރާމަ ”ރަނގަޅަށް“ ކުރިއަށްދާ ކަމަށާއި، އެ ކަނޑުއޮޅީގެ ސޫރަ މައިގަނޑު ގޮތެއްގައި ބަލަހައްޓަމުންދަނީ އެމެރިކާގެ ކަނޑުގެ ސިފައިން ކަމަށެވެ. ”އަހަރެން އީރާނަކަށް އިތުބާރެއް ނުކުރަން… އެމީހުން މެދުކެނޑުމެއް ނެތި އަހަންނަށް ހެދީ ދޮގު،“ ޓްރަމްޕް ވިދާޅުވިއެވެ.މި އިއުލާނާއެކު، އެމެރިކާގެ އަސްކަރިއްޔާއިން ދަނީ އެ ސަރަހައްދުގެ ބްލޮކޭޑް މުގުރާލަން އުޅޭ އުޅަންދުރަށް ދޭ ހަމަލާތައް ވަރުގަދަކުރަމުންނެވެ. އެގޮތުން، އީރާނުގެ ބަނދަރަކަށް ދަތުރުކުރަނިކޮށް އިންޒާރުތަކަށް ނުކިޔަމަންވި އުޅަނދެއް ކަމަށްވާ ”ވެލާ ނޯވާ“ ގެ މިސްރާބު ބަދަލުކުރާ ބަޔަށް އެމެރިކާގެ އަސްކަރީ ހެލިކޮޕްޓަރަކުން ވަނީ ހެލްފަޔާ މިސައިލް ހަމަލާއެއް ދީފައެވެ. މިއީ ސެންޓްކޮމްއިން މި އުޅަނދުގެ އިންޖީނުގެއަށް ދިން ހަމަލާއަށްފަހު، ޖެހިޖެހިގެން ދެ ދުވަހު މި އުޅަނދަށް ދިން ދެވަނަ ހަމަލާއެވެ.މީގެއިތުރުން، ދަތުރުފަތުރުކުރާ މަގުތަކުގައި ހިނގާ ހަމަނުޖެހުންތައް ދަނީ އެހެން ސަރަހައްދުތަކަށްވެސް ފެތުރެމުންނެވެ. ބާބު އަލްމަންދަބު ކަނޑުއޮޅީގެ މުރާދު ކައިރިން، އީރާނަށް ތާއީދުކުރާ ޔަމަނުގެ ހޫތީން ދިން ކަމަށް ޝައްކުކުރެވޭ ހަމަލާއެއްގައި ”ތިހާމާ“ ނަމަކަށްކިޔާ އުޅަނދެއްގައި އަލިފާން ރޯވެ، ފަޅުވެރިންގެ ތެރެއިން ހަތަރު މީހުން ވަނީ މަރުވެފައެވެ. މި ހަމަލާ ކަށަވަރުވެއްޖެނަމަ، މިއީ ފެބްރުއަރީ މަހު އީރާނު ހަނގުރާމަ ފެށުނު ފަހުން ހޫތީންގެ ހަމަލާއެއްގައި ކަނޑުމަތިން މީހަކު މަރުވި ފުރަތަމަ ފަހަރެވެ.މި ހަމަނުޖެހުންތަކާ ގުޅިގެން ތެލުގެ ބާޒާރަށް ވަނީ ބޮޑު ލޮޅުމެއް އައިސްފައެވެ. އެގޮތުން ބްރެންޓް ކުރޫޑް ފީފާއެއްގެ އަގު 89.63 ޑޮލަރަށް އުފުލިފައިވާއިރު، އެމެރިކާގެ ޑަބްލިއުޓީއައި ކުރޫޑް ފީފާއެއްގެ އަގު ވަނީ 83.91 ޑޮލަރަށް އުފުލިފައެވެ. މިއީ އެމެރިކާއާއި އީރާނާ ދެމެދު ސުލްހައިގެ އެއްބަސްވުމަކަށް އާދެވިދާނެ ކަމުގެ އުއްމީދު ކުޑަވުމާ ގުޅިގެން ހޯމަ ދުވަހުންސުރެ ތެލުގެ އަގަށް އައި %5 ގެ ކުރިއެރުމެކެވެ.ޚާރިޖީ ގޮތުން ބަލާއިރު، ހޯރްމުޒް ކަނޑުއޮޅި އަލުން ހުޅުވާލުމާ މެދު އެމެރިކާއާއި އީރާނާ ދެމެދު ބޮޑެތި ޚިޔާލުތަފާތުވުންތަކެއް އެބަހުއްޓެވެ. އީރާނުން ބުނަނީ ސީދާ ވާހަކައްދައްކަނީ ހަމައެކަނި އޯމާންއާއެކު ކަމަށާއި، ދުނިޔޭގެ ތެލާއި އެލްއެންޖީގެ ފަސްބައިކުޅަ އެއްބައި ދަތުރުކުރާ މި ކަނޑުއޮޅި ދެގައުމު ގުޅިގެން ބެލެހެއްޓުމަށް ހުށަހަޅާފައިވާ ކަމަށެވެ. ނަމަވެސް ޓްރަމްޕް އެދިވަޑައިގަންނަވަނީ ފާއިތުވި ދިހަވަރަކަށް އަހަރު އީރާނާ ގުޅުންހުރި ހަމަލާތަކުގައި މަރުވި މީހުންގެ ބަދަލު ދިނުމަށެވެ. އިރާނުން ބުނަނީ ކަނޑުއޮޅި ހުޅުވާލެވޭނީ ހަނގުރާމައިގެ ގެއްލުމުގެ ބަދަލު ލިބުމުން ކަމަށެވެ.މީގެއިތުރުން، ޕެންޓަގަންއިން އެމެރިކާގެ ކޮންގްރެސްއަށް ހުށަހެޅި ރިޕޯޓެއްގައިވާ ގޮތުން، ފާއިތުވި އޭޕްރީލް މަހު ޔަމަނުގެ ހޫތީންނަށް އަމާޒުކޮށް އެމެރިކާއިން ދިން ވައިގެ ހަމަލާތަކެއްގައި އާންމުންގެ 153 މީހުން މަރުވެ، 243 މީހުން ވަނީ ޒަޚަމްވެފައެވެ.އަނެއްކޮޅުން، ޣައްޒާގެ ”ބޯޑު އޮފް ޕީސް“ ޕްލޭނާ މެދު ޓްރަމްޕާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ދެމެދު އޮތް ނުވަތަނަވަސްކަން ވަނީ ބޮޑުވެފައެވެ. އިސްރާއީލުން އެދެނީ އެންމެ ފުރަތަމަ ހަމާސްގެ ހަތިޔާރު އަތުލުމަށެވެ. މީގެއިތުރުން، ހުޅަނގު ކަރައިގައި އިސްރާއީލު ސިފައިން ވަނީ ފަލަސްތީނުގެ 23 މީހުން ހައްޔަރުކޮށް، 12 ގުދަނާއި އާއިލީ ގެއެއް ސުންނާފަތިކޮށް، 6 މީހުން ޒަޚަމްކޮށްލާފައެވެ.