އެމެރިކާގެ ޔަގީން އިންސްޓިޓިއުޓާއި ހަމަ އެ ގައުމުގެ ދަ ފެމިލީ އެންޑް ޔޫތު އިންސްޓިޓިއުޓް ގުޅިގެން ކުރިއަށްގެންދިޔަ އާ ދިރާސާއަކުން ދައްކާގޮތުގައި، އެމެރިކާގައި ދިރިއުޅޭ މުސްލިމު އާއިލާތަކުގެ މެދުގައި ކަންބޮޑުވުމާއި ނަފްސާނީ ދުޅަހެޔޮކަން ހުންނަ މިންވަރު ކަނޑައެޅުމުގައި، ގޭގެ ޖާގައާއި ޒީނަތްތެރިކަމަށްވުރެ ބޮޑަށް، ގޭތެރޭގެ އިހުސާސީ މާހައުލު ވަރަށް މުހިންމު ދައުރެއް އަދާކުރެއެވެ.

މި ދިރާސާގައި ބައިވެރިވި މީހުންގެ 74 އިންސައްތައަކީ އަންހެނުންނެވެ. އަދި 67 އިންސައްތައަކީ ކޮލެޖު ނިންމާފައިވާ، އުމުރުން 18 އަހަރާއި 44 އަހަރާ ދެމެދުގެ މީހުންނެވެ. މީގެ ތެރޭގައި ގިނައީ ދެކުނު އޭޝިއާ (56 އިންސައްތަ) އަދި އަރަބި (15 އިންސައްތަ) މުޖުތަމައުތަކަށް ނިސްބަތްވާ މީހުންނެވެ. ދިރާސާކުރެއްވި ޑޮކްޓަރު މަލީހާ ތަހްސީން އާއި އިސްރާ ކިއްލާވީ ވަނީ ގޭތެރޭގެ ދިރިއުޅުމުގެ ތިން ބަޔަކަށް ބައްލަވާފައެވެ. އެއީ އެކުވެރިކަން، އިހުސާސްތައް ފާޅުކުރުން އަދި ނުތަނަވަސްކަމެވެ. އަދި ރެގްރެޝަން އެނަލިސިސް ބޭނުންކޮށްގެން މީގެއިން މާއްދާއެއް ނަފްސާނީ ދުޅަހެޔޮކަމާ ގުޅޭގޮތް މިންކުރެއްވިއެވެ.

ނަތީޖާތައް ފެނުނީ ވަރަށް ހައިރާންކުރުވަނިވި ގޮތަކަށެވެ. އެކުވެރިކަން ބޮޑު، ނުވަތަ ބަދަހިކަމާއި އެކަކު އަނެކަކަށް އެހީތެރިވުމުގެ ރޫހު ވަރުގަދަ އާއިލާތަކުގައި ކަންބޮޑުވުމާއި ޑިޕްރެޝަންގެ މިންވަރު ސާފުކޮށް ދަށްކަން ފާހަގަކުރެވުނެވެ. ގޭގެ އަހުލުވެރިންނަށް އެމީހުންގެ އިހުސާސްތައް މިނިވަންކަމާއެކު ފާޅުކުރެވޭ ގޭގޭގައި ވެސް ޑިޕްރެޝަންގެ މިންވަރު ދަށްވެފައިވެއެވެ. ނަމަވެސް ގާތުން މައްސަލަތައް ޖެހޭ، އެގޮތުން އެކަކު އަނެކަކަށް ތާކުންތާކުނުޖެހޭ ވާހަކަ ދެއްކުމާއި، ރުޅިގަދަވުމާއި، ފާޅުކަން ބޮޑު ގޮތެއްގައި ދުޝްމަންކަން ދެއްކުން ފަދަ ކަންކަން ހުންނަ ގޭގޭގައި މި ދެ ހާލަތު ވެސް ވަރަށް ބޮޑަށް އިތުރުވެފައިވެއެވެ. މިއީ އަބަދު ފާޑުކިއުމާއި ރުޅިވެރިކަމުގެ ތެރޭގައި ބޮޑެތިވާ ކުދިން، އޯގާތެރި، އެހީތެރި މާހައުލެއްގައި ބޮޑެތިވާ ކުދިންނަށްވުރެ ނަފްސާނީ މައްސަލަތަކަށް ހުށަހެޅޭ މިންވަރު ބޮޑުކަން ދައްކާ ސައިކޮލޮޖިކަލް ދިރާސާތަކާ އެއްގޮތް ނަތީޖާއެކެވެ.

މި މަޢުލޫމާތުތަކުގެ އިތުރުން، ދިރާސާކުރެއްވި ބޭފުޅުން ވަނީ ގޭތެރޭގެ އިހުސާސީ މާހައުލު ރަނގަޅުކުރުމަށް އެދޭ ބެލެނިވެރިންނަށް އަމަލީ އިރުޝާދުތަކެއް ދެއްވާފައެވެ. އެކުވެރިކަން އުފެއްދުން ފެށެނީ ކުދިކުދި އާދަތަކުންނެވެ. ހަފުތާ ބަންދުގައި އެކުގައި ވަގުތު ހޭދަކުރުމުގެ އިތުރުން މާނަހުރި ގޮތެއްގައި އެކުގައި ވަގުތު ހޭދަކުރުން، އަދި ކައްކާނެ އެއްޗެއް ނިންމުން ނުވަތަ ދަތުރު ރޭވުން ފަދަ ކަންކަމުގައި އާއިލާގެ ކޮންމެ މެންބަރަކަށް ވެސް ހިއްސާއެއް ދިނުމެވެ. އިހުސާސްތައް ފާޅުކުރުމަށް ހިތްވަރުދިނުމަކީ ހުޅުވާލެވިގެން ސުވާލުކުރުމާއި، މެދުކަނޑާނުލައި އަޑުއެހުމާއި، ކުއްޖަކު ރުޅިއަންނަ ހިނދު ވަގުތުން ރައްދު ދިނުމުގެ ބަދަލުގައި އެކަމުގެ ސަބަބު އޮޅުންފިލުވުމަށް މަސައްކަތްކުރުމެވެ. މައްސަލަތައް ހައްލުކުރުމަށްޓަކައި، އުނދަގޫ އިހުސާސްތަކަކީ އާދައިގެ ކަމެއްގެ ގޮތުގައި ބަލައިގަތުމާއި، ކުދިންނާއި ބޮޑެތިމީހުންނަށްވެސް ރުޅިވެރި އަމަލުތަކަށް ސާފު އިމެއް ކަނޑައެޅުމާއި، މައްސަލައެއް ޖެހުމަށްފަހު އިޚްލާޞްތެރިކަމާއެކު މާފަށްދުމުގެ ރީތި ނަމޫނާ ދެއްކުން ހިމެނެއެވެ.

މި ލިޔުމުގައި މުޅިންވެސް، މުސައްނިފުން ވަނީ އިސްލާމީ އުނގަންނައިދިނުންތައް ހިމަނުއްވާފައެވެ. އެގޮތުން ”ހެޔޮކަންކަމުގައި އެކަކު އަނެކަކަށް އެހީތެރިވުމަށް“ ކީރިތި ގުރުއާނުގައިވާ އިރުޝާދާއި، ކުދިންނާއެކު އުނދަގޫ ވާހަކަތައް ދައްކާއިރު ބެލެނިވެރިންނަށް ނަމޫނާއެއްގެ ގޮތުގައި ކީރިތި ރަސޫލާ (ޞައްލަﷲ ޢަލައިހި ވަސައްލަމަ) ބޭނުންކުރެއްވެވި ރީތި އާދަފުޅުތައް ފާހަގަކުރައްވާފައިވެއެވެ.