އެމެރިކާއިން އެގައުމުގެ ”އަމަލުތައް އިސްލާހުކުރަންދެން“ ހޯރްމުޒް ކަނޑުއޮޅި ބަންދުކޮށްފައި އޮންނާނެ ކަމަށް އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލުން އިއުލާނުކޮށްފިއެވެ. އަދި މި މުހިންމު ކަނޑުއޮޅިއާ ގުޅޭގޮތުން ކުރިއަށްދާ މަޝްވަރާތަކަށް ހުރަސްއެޅޭ ފަދަ ބޮޑެތި އާ ޝަރުތުތަކެއް އީރާނުން ވަނީ ހުށަހަޅާފައެވެ. ކައުންސިލްގެ ސެކްރެޓަރީ އަދި ރިވޮލިއުޝަނަރީ ގާޑްގެ ކޮމާންޑަރު މުހައްމަދު ބާގިރު ޒުލްގަދަރު ނެރުއްވި ބަޔާނެއްގައި ބާރުއަޅުއްވާފައިވަނީ، އީރާނާއި އެގައުމާ ގުޅިފައިވާ ބާރުތަކާ ދެކޮޅަށް އެމެރިކާއިން ކުރާ ހަނގުރާމަ ދާއިމީކޮށް ހުއްޓާލުމަށާއި، އީރާނުގެ ބަނދަރުތަކަށް އަޅާފައިވާ ކަނޑުގެ ބްލޮކޭޑް ނައްތާލުމަށާއި، ސަރަހައްދުގައިވާ ހުރިހާ އަސްކަރީ ބާރުތަކެއް ބޭރުކުރުމަށެވެ.

މީގެ އިތުރުން ހަނގުރާމައިގެ ގެއްލުމުގެ ބަދަލު ފުރިހަމައަށް ދިނުމަށާއި، ދަތިކުރުމުގެ ފިޔަވަޅުތައް އުވާލައި، ހިފަހައްޓާފައިވާ އީރާނުގެ ފައިސާތައް އެއްވެސް ޝަރުތަކާ ނުލައި ދޫކޮށްލުމަށް ވެސް ވަނީ ގޮވާލާފައެވެ. އެމެރިކާއިން އަދި މިކަމަށް ރަސްމީ ޖަވާބެއް ދީފައި ނުވާއިރު، އެގައުމުން ބުނަމުންދަނީ ބްލޮކޭޑް އުވާލުމުގެ ކުރިން ކަނޑުއޮޅިއާ ގުޅޭ އަމަލީ އެއްބަސްވުމެއް ނިންމަން ބޭނުންވާ ކަމަށެވެ.

މި ޝަރުތުތައް ކުރިމަތިކުރީ ކަނޑުމަތީގެ ނުތަނަވަސްކަން އިންތިހާއަށް އިތުރުވެފައިވާ ދަނޑިވަޅެއްގައެވެ. ޔޫއޭއީގެ ކަމާބެހޭ ފަރާތްތަކުން ބުނި ގޮތުގައި، އަބޫދާބީގެ ދައުލަތުގެ ތެޔޮ ކުންފުނި އެޑްނޮކް ގެ އުޅަނދަކަށް ހޮނިހިރު ދުވަހުގެ ފަތިހު ހޯރްމުޒް ކަނޑުއޮޅިން ދަތުރުކުރަނިކޮށް އީރާނުގެ މިސައިލް ހަމަލާއެއް ވަނީ އަރާފައެވެ. ނަމަވެސް މި ހަމަލާގައި އެއްވެސް މީހަކަށް އަނިޔާވެފައި ނުވާ ކަމަށް އެފަރާތުން ބުނެއެވެ. ފެބްރުއަރީ މަހު އެމެރިކާ-އިސްރާއީލުން އީރާނާ ދެކޮޅަށް ފެށި ހަނގުރާމައަށްފަހު، އެޑްނޮކްގެ 12 އަށްވުރެ ގިނަ އުޅަނދަށް މިސައިލާއި ޑްރޯން ހަމަލާ އަމާޒުވެ، ފަޅުވެރިއަކު މަރުވެ 20 މީހުންނަށް އަނިޔާވެފައިވާ ކަމަށް އެ ކުންފުނީގެ ތަފާސްހިސާބުތަކުން ދައްކައެވެ. މީގެ އިތުރުން، އޮމާންގެ ޚަސަބް ކައިރިން ދަތުރުކުރި އެހެން އުޅަނދަކަށް ހަމަލާއެއް އަރައި އަލިފާން ރޯވި ކަމަށް އިނގިރޭސިވިލާތުގެ މެރިޓައިމް ޓްރޭޑް ވޮޗްޑޮގުން ރިޕޯޓުކޮށްފައިވެއެވެ. ނަމަވެސް ފަހުން އަލިފާން ނިއްވާލާފައިވާއިރު، ހުރިހާ ފަޅުވެރިންގެ ހާލުވެސް ރަނގަޅެވެ. ބެލެވޭ ގޮތުގައި މިއީ އެޑްނޮކްގެ އުޅަނދަށް ދިން ހަމަލާގެ ރިޕޯޓެވެ.

މި ހަމަނުޖެހުންތަކުގެ ތެރޭގައިވެސް، ކުރިން ބައިނަލްއަގުވާމީ ސަރަހައްދެއްގެ ގޮތުގައި ބެލެވުނު މި ކަނޑުއޮޅި ގުޅިގެން ބެލެހެއްޓުމަށް އީރާނާއި އޮމާނުން އެއްބަސްވުމަކާ ގާތްވެފައިވާ ކަމަށް ރިޕޯޓުތައް ބުނެއެވެ. އޮމާނުން ވަނީ އުޅަނދުތަކަށް ދޭ ހަމަލާތައް ކުށްވެރިކުރަމުން، މި މަޝްވަރާތަކަކީ ”އުންމީދީ އަދި ބިނާކުރަނިވި“ މަޝްވަރާތަކެއްގެ ގޮތުގައި ސިފަކޮށްފައެވެ.

މި މިސައިލް ހަމަލާތަކަކީ އީރާނުގެ ތާއީދު އޮންނަ ޔަމަނުގެ ހޫތީ ހަނގުރާމަވެރިން ދާދިފަހުން ދިން ހަމަލާތަކުގެ ބަދަލުހިފުމެއް ކަމަށް ބެލެވެއެވެ. ޔަމަނުގެ އަސްކަރީ ތަރުޖަމާނު ކާނަލް މާޖިދު އަލް-ނަޒީލީ ވަނީ އެކި ފްރަންޓްލައިންތަކުގައި ހޫތީންގެ މަރުކަޒުތަކަށް ރައްދު ހަމަލާ ދީފައިވާކަން ކަށަވަރުކޮށްދީފައެވެ. އދ. އިން ޔަމަނަށް ކަނޑައަޅާފައި ހުންނަ މަންދޫބު ހާންސް ގްރަންޑްބާގް އިންޒާރު ދެއްވާފައިވަނީ، 2022 ވަނަ އަހަރުގެ ސުލްހައިގެ އެއްބަސްވުމަށްފަހު އެގައުމު ފުރިހަމަ ހަނގުރާމައަކަށް ދިއުމުގެ ބިރު މިހާރު އޮތީ އެންމެ މަތީ ދަރަޖައިގައި ކަމަށެވެ.

ސަރަހައްދީ އެހެން ކަމަކަށް ބަލާއިރު، ތުރުކީގެ ޕާލަމެންޓުން ވަނީ ކުރުދީ ހަނގުރާމަވެރިންނާއެކު ސުލްހަ ގާއިމުކުރުމުގެ ބިލެއް ހޮނިހިރު ދުވަހު ކުރިއަށް ގެންގޮސްފައެވެ. މީގެ ތެރޭގައި މިދިޔަ އަހަރު ހަތިޔާރު ބެހެއްޓުމަށް ވީ ވައުދުގެ ދަށުން، ޕީކޭކޭ ގެ ކުރީގެ ހަނގުރާމަވެރިންނަށް ޝަރުތުތަކަކާއެކު މައާފު ދިނުން ހިމެނެއެވެ. އަންނަ ހަފުތާގައި މަޖިލީހުން ފާސްވާނެ ކަމަށް ބެލެވޭ މި ގާނޫނަށް އަމަލުކުރަން ފަށާނީ، ޕީކޭކޭ އިން ފުރިހަމައަށް އުވާލައި ހަތިޔާރު އުކާލާފައިވާކަން ތުރުކީން ކަށަވަރުކުރުމުންނެވެ. މިއީ 1980 ގެ އަހަރުތަކުން ފެށިގެން އެތައް ހާސް ބަޔަކު މަރުވެފައިވާ މި ހަމަނުޖެހުމަށް ނިމުމެއް ގެނައުމަށް އެޅޭ ފިޔަވަޅެކެވެ.