އީރާނާއި ދެކޮޅަށް އިތުރު އަސްކަރީ ފިޔަވަޅު އެޅުމުގެ ބަދަލުގައި މަޝްވަރާ ކުރުމަށް ބާރުއަޅުއްވައި، ސައޫދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ޑޮނަލްޑް ޓްރަމްޕަށް ފޯނުން ގުޅުއްވީ، ރޭވިފައިވާ ހަމަލާތައް ހުއްޓާލިކަން ޓްރަމްޕް އިއުލާން ކުރެއްވުމުގެ ކުޑަވަގުތުކޮޅެއް ކުރިންނެވެ. ސައޫދީ ޕްރެސް އެޖެންސީން ބުނި ގޮތުގައި، ގަލްފުގެ ސަލާމަތް ރައްކާތެރިކުރުމަށާއި، ދުނިޔެއަށް އޭގެ ނޭދެވޭ އަސަރު ފޯރާފާނެ ފަދަ ފުޅާ ދާއިރާއެއްގެ ހަނގުރާމައަކުން ދުރުހެލިވުމަށް އެމް.ބީ.އެސް ބާރުއެޅުއްވިއެވެ.

މި ފޯން ކޯލަކީ، ދެވަނަ ބޮޑު ހަނގުރާމައަށްފަހު ނުފެންނަ ފަދަ ބާރުގަދަ ހަމަލާއެއް ދިނުމަށް އެމެރިކާ އޮތީ ”ލޮކްޑް އެންޑް ލޯޑަޑް“ ނުވަތަ ގަދަޔަށް ތައްޔާރަށް ކަމަށް ވިދާޅުވެ، އޭގެ އެއްދުވަސް ކުރިން ޓްރަމްޕް ގެންގުޅުއްވި ހަރުކަށި ސިޔާސަތާ މުޅިން އިދިކޮޅު ނިންމުމެކެވެ. އާދީއްތަ ދުވަހާ ހަމައަށް އައިއިރު، ހަމަލާ ނުދީ މަޑުޖައްސާލި ސަބަބެއް ކަމަށް އޭނާ ފާހަގަކުރެއްވީ، ހޯރްމޫޒް ކަނޑުއޮޅި އަލުން ހުޅުވާލުމާއި، އިޒްރޭލުގެ ތާއީދާއެކު އީރާނުގެ ނިއުކްލިއާ ނުރައްކާ ނައްތާލުމަށް އެކުލަވާލެވެމުންދާ އެއްބަސްވުމެކެވެ. ނަމަވެސް، އީރާނުގެ ދައުލަތުގެ މީޑިއާއިން ވަނީ ހަމަލާތައް މަޑުޖައްސާލުމަށް ތެހެރާނުން އެދުނު ކަމަށް ބުނާ ވާހަކަތައް ދޮގުކޮށް، އެއީ ހަދައިގެން އުޅޭ ވާހަކައެއް ކަމަށް ބުނެފައެވެ.

އެމް.ބީ.އެސްގެ ފޯން ކޯލުގެ މައުލޫމާތު އެނގޭ މަސްދަރަކުން ބުނި ގޮތުގައި، ވަލީއަހުދުގެ އެންމެ ބޮޑު ކަންބޮޑުވުމަކީ އެމެރިކާއިން އީރާނުގެ ހަކަތައިގެ އިންފްރާސްޓްރަކްޗަރަށް ހަމަލާދީފިނަމަ، ބަދަލުހިފުމުގެ ގޮތުން އީރާނުން ގަލްފުގެ ތެޔޮ ވަސީލަތްތަކަށް ހަމަލާދީފާނެތީއެވެ. ސައޫދީ އަރަބިއްޔާގެ އިރުމަތީ ސަރަހައްދުގައި ހުރި ތެޔޮ މަރުކަޒުތަކަށާއި ރިޔާޟަށް އަމާޒުކޮށް ފޮނުވާލި ޑްރޯންތައް މިހާރުވެސް ސައޫދީން ވަނީ ހުއްޓުވާފައެވެ. ހަމައެއާއެކު، ޔަމަނުގެ ހޫތީން ވަނީ ސައޫދީގެ ތެޔޮ އިންފްރާސްޓްރަކްޗަރަށް ހަމަލާދީ، ރަތް ކަނޑު ބަންދުކުރާނެ ކަމުގެ އިންޒާރު ދީފައެވެ.

މި ހަނގުރާމަ ފެށުނީ ފެބްރުއަރީ 28 ވަނަ ދުވަހު، އީރާނުގެ މިސައިލް ޕްރޮގްރާމާއި ނިއުކްލިއާ އުންމީދުތައް ނައްތާލުމަށް އެމެރިކާ އާއި އިޒްރޭލު ސިފައިން ދިން ހަމަލާތަކާ ގުޅިގެންނެވެ. ޖޫން މަހު ގާއިމުކުރި ހަނގުރާމަ ހުއްޓާލުމުގެ އެއްބަސްވުން، ހޯރްމޫޒް ކަނޑުއޮޅީގެ ދަތުރުފަތުރުގެ މައްސަލައިގައި ހަފުތާތަކެއްގެ ތެރޭގައި ރޫޅި، ޖުލައި މަހު އަލުން ކުރިމަތިލުންތައް ފެށުނެވެ. ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، ދިން ހަމަލާތަކުގެ ސަބަބުން އީރާނުގެ ކަނޑުގެ ސިފައިންނާއި، ވައިގެ ސިފައިން އަދި މިސައިލް ދިފާއީ ނިޒާމުތައް ބަލިކަށިވެފައިވާ ކަމަށާއި، މީގެ ކުރިން އޮތް ”އާދައިގެ ދިފާއީ އައްޑަނަ“ މިހާރު އީރާނަށް ގެއްލިފައިވާ ކަމަށެވެ. މިއީ ވޮޝިންޓަނަށް މަޝްވަރާގެ މޭޒުމަތީގައި ލިބުނު ކުރިއެރުމެއް ކަމަށް އޭނާ ވިދާޅުވިއެވެ.

ޔުނިވާސިޓީ އޮފް ވިސްކޮންސިން-އޯ ކްލެއާގެ ޕްރޮފެސަރު މާލިން ހާޑިންގާ ވިދާޅުވި ގޮތުގައި، ގަތަރާއި، ޕާކިސްތާން އަދި އޮމާންއާ ގުޅިގެން ސައޫދީން ކުރި މެދުވެރިކަމުގެ މަސައްކަތްތަކުގެ ސަބަބުން، ސަރަހައްދީ ލީޑަރުންނަށް އިސްނެގުމުގެ ފުރުސަތު ލިބި، ޓްރަމްޕްގެ ނިންމެވުން ބަދަލުވުމަށް މަގުފަހިވިއެވެ. އިސްލާމްއާބާދާއި ދޯހާގައި ތިއްބެވި ޑިޕްލޮމޭޓުން ބުނާ ގޮތުގައި، މެދުކަނޑާލާފައިވާ މަޝްވަރާތައް ކުރިއަށް އޮތް ދުވަސްތަކުގައި އަލުން ފެށިދާނެ ކަމުގެ އުންމީދު އެބައޮތެވެ. ނަމަވެސް، ރަސްމީ ސިފައެއްގައި އެއްވެސް ކުރިއެރުމެއް ލިބިފައިވާކަން އަދި ކަށަވަރެއް ނުވެއެވެ.