މަހުގެ ހަމަ އަގު ހޯދައިދިނުމަށް ވަރަށް ބޮޑު އިސްކަމެއް ދެއްވައިގެން މަސައްކަތްތަކެއް ކުރައްވާ ކަމަށާ އަމާޒަކީ މަހުގެ އަގު 20 ރުފިޔާގައި ހިފެހެއްޓުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

”ދަ ޕަލްސް“ ޕޮޑްކާސްޓްގެ ސިލްސިލާގެ 2 ވަނަ އެޕިސޯޑްގައި ވާހަކަފުޅުދައްކަވަމުން ރައީސް ވިދާޅުވީ މި ސަރުކަރުން އެންމެ އިސްކަމެއް ދެނީ މުޅި މަސްވެރިކަމުގެ ސިނާއަތް ހަރުދަނާކޮށް އަލުން ނަގާ ކޮޅަށް ޖަހަން ކަމަށެވެ.

އެ މަނިކުފާނު ސަރުކާރާ ހަވާލުވެވަޑައިގެންނެވި އިރު މަސްވެރިކަމުގެ ސިނާއަތް އޮތީ އެއްވެސް ވަރަކަށް އަޅަ ނުލާ ކަމަށާ މި ސިނާއަތަށް ވޭތުވެދިޔަ ސަރުކަރުތަކުން ވަރަށް ބޮޑަށް އިހުމާލުވެފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވީ މަހަށް ހަމަ އަގު ހޯދައި ދިނުމަށްޓަކައި ކުރާ މަސައްކަތުގެ ނަތީޖާ ފެންނަމުންދާ ކަމަށެވެ.

އުންމީދު ކުރައްވަނީ މިހާރު ހުރި އަގުގައި އެންމެ ކުޑަމިނުން 20 ރުފިޔާއަށް ވުރެ ދަށް ނުވަނެ ގޮތަކަށް އަގު ހިފެހެއްޓުން ކަމަށް ރައީސް ވިދާޅުވިއެވެ. އެކަން ކުރުމަށްޓަކާ މަސް ރައްކާ ކުރެވޭނެ ގޮތްތަކާއި މަހަށް ވެލިއުއެޑް ނުވަތަ އަގު އެއްކުރެވޭނެ ގޮތްތައް ގާއިމްވެގެން ދިއުން ވަރަށް މުހިންމު ކަމަށް ރައީސް ވިދާޅުވިއެވެ.

”ދެން ހަމަ މަހުގެ ހަމަ އަގު ހޯދައިދިނުމަށްޓަކާ އެންމެ ބޮޑު އިސްކަމެއްގެ ގޮތުގަ އަގު ފްލޯޓްކޮށްލުން ނޫނިއްޔާ މާކެޓްގަ އެންމެ ރަނގަޅު އަގެއް އެދުވަހަކު ލިބޭ އެންމެ ރަނގަޅު އަގެއް ދިނުމުގެ ސިޔާސަތެއް ތަންފީޒުކުރަން ފެށުމުގެ ނަތީޖާ ވަރަށް ރަނގަޅު 16 ރުފިޔާ އިން ފެށި މިހާރު 20 ރުފިޔާ އާ ހަމަޔަށް އެއީ އެދުވަހުގެ އެންމެ ރަނގަޅު އަގު މާކެޓްގަ ހުރި ޑީމަންޑަށް ބަލާ މަސްބޭނޭ ކެޕޭސިޓީއަށް ބަލާ ކުރިއަށް އޮތް ތާވެސް އަމާޒަކީ ސަރުކާރުން މަސައްކަތް ކުރަނީ 20 ރުފިޔާ އަށް އެންމެ ކުޑަމިނުން ލިބޭ ވަރުގަ ހިފެހެއްޓުން، އެކަން ކުރުމަށްޓަކާ ވަރަށް މުހިންމު މަސް ރައްކާ ކުރެވޭނެ ގޮތްތަކާ މަހަށް ވެލިއު އެޑް ކުރެވޭނެ ގޮތްތައް ގާއިމްވެގެން ދިއުން.“ ރައީސް ވިދާޅުވިއެވެ

ރައީސް ވިދާޅުވީ މަސްވެރިންނަށް ލުއިފަސޭހަ ކޮށްދިނުމަށްޓަކާ ރާއްޖޭގެ އެކި ސަރަހައްދުތަކުގައި އައިސް ލިބޭނެ ގޮތްތަކާ ކޯލްޑް ސްޓޯރޭޖްތައް ގާއިމްކުރުމުގެ މަސައްކަތް މިހާރުވެސް ކުރިއަށްދާ ކަމަށެވެ.