އީރާނަށް ދެމުންދާ އަސްކަރީ ހަމަލާތައް ކުރިއަށްގެންދާނަމަ، އިސްރާއީލު ވަރަށް އަވަހަށް ”އެކަނިވެދާނެ“ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް މިހާތަނަށް ދެއްވި އެންމެ ވަރުގަދަ އެއް އިންޒާރު ދެއްވުމާ ގުޅިގެން، މެދުއިރުމަތީގެ ނާޒުކު ސުލްހަ މިވަނީ ނުރައްކަލެއްގެ ތެރޭގައެވެ.
މި ވަރުގަދަ އިންޒާރު އައިސްފައިވަނީ، އޭޕްރީލް މަހުގެ ހަނގުރާމަ ހުއްޓާލުމުގެ އެއްބަސްވުމަށްފަހު، މެދުކެނޑިފައިވާ ކަމަށް ގިނަ ބަޔަކު ގަބޫލުކުރި ސަރަހައްދީ ހަނގުރާމައެއް އަލުން ފެށިދާނެ ފަދަ ނުރައްކާތެރި މިސައިލް ހަމަލާތަކެއް، އިސްރާއީލާއި އީރާނާ ދެމެދު ބަދަލުކުރަން ފެށުމާ ގުޅިގެންނެވެ.ރިޕޯޓްތައް ބުނާ ގޮތުގައި، މި ފަހަރުގެ ހަމަނުޖެހުންތައް ފެށުނީ ލުބުނާނުގެ ވެރިރަށް ބެއިރޫތަށް އިސްރާއީލުން ދިން ނުރައްކާތެރި ބޮން އެޅުމުގެ ހަމަލާތަކަކާ ގުޅިގެންނެވެ.
އެމެރިކާއާއެކު ވެވޭ ކޮންމެ ސުލްހައިގެ އެއްބަސްވުމެއް ލުބުނާނުގެ ހަނގުރާމަ ހުއްޓާލުމާ ގުޅުވާފައިވާ އީރާނުން ވަނީ، މީގެ ރައްދުގައި އިސްރާއީލުގެ އުތުރަށް ގިނަ އަދަދެއްގެ މިސައިލް ފޮނުވާލާފައެވެ. ގިނަ މިސައިލްތަކެއް ހުއްޓުވި ނަމަވެސް، މުޅި ސަރަހައްދުގައި މަސްލަހަތު ވަނީ ވަރަށް ބޮޑަށް ގޯސްވެފައެވެ.ޓްރަމްޕް ސީދާ ނަތަންޔާހޫއަށް ގުޅުއްވައި، އިތުރު ރައްދު ހަމަލާތައް ނުދިނުމަށް ބާރުއެޅުއްވި ކަމަށް ރިޕޯޓްތައް ބުނެއެވެ. ނަމަވެސް، އިސްރާއީލުގެ ސިފައިން ފަހުން ވަނީ އީރާނުގެ ވައިގެ ދިފާއީ ނިޒާމުތަކަށާއި ޕެޓްރޯކެމިކަލް މަރުކަޒަކަށް އަމާޒުކޮށް ހަމަލާދީފައެވެ. އީރާނުން މީގެ ރައްދު ދިނީ ހައިފާގައި ހުރި އެފަދަ މަރުކަޒަކަށާއި އިސްރާއީލުގެ ދެ ވައިގެ މަރުކަޒަކަށް ހަމަލާދީގެންނެވެ.ހަމަލާތައް ވަރުގަދަވި ނަމަވެސް، ދެ ފަރާތުންވެސް އެއްވެސް މީހަކު މަރުވި ކަމުގެ ރިޕޯޓެއް ލިބިފައެއް ނުވެއެވެ. އެހެންނަމަވެސް، މި ކުރިމަތިލުންތަކުގެ ސަބަބުން ހަނގުރާމަ ހުއްޓާލުމުގެ އެއްބަސްވުން މުޅިން ރޫޅިދާނެ ކަމުގެ ބިރު ވަނީ ބޮޑުވެފައެވެ.އެކްސިއޯސް އަށް ދެއްވި ބަސްދީގަތުމެއްގައި ޓްރަމްޕް ވަނީ ނަތަންޔާހޫއަށް ދެއްވި ސީދާ މެސެޖު ހާމަކުރައްވާފައެވެ. ”ކަލޭ ވަރަށް ބޮޑަށް ސަމާލުވާން ޖެހޭނެ، ނޫންނަމަ ވަރަށް އަވަހަށް ކަލޭ ހުންނަން ޖެހޭނީ އެކަނި..“ ޓްރަމްޕް އިންޒާރު ދެއްވި ކަމަށްވެއެވެ. އަދި ދެ ފަރާތުންވެސް ”ބަޑިޖެހުން“ ހުއްޓާލައި، ކުރިއަށްދާ ސުލްހައިގެ މަޝްވަރާތަކަށް ފުރުސަތު ދިނުމަށް ޓްރަމްޕް ވަނީ އާންމުކޮށް ގޮވާލައްވާފައެވެ.ނަތަންޔާހޫ އިސްރާއީލުގެ އަމަލުތައް ދިފާއުކުރައްވަމުން ވިދާޅުވީ، އަމިއްލަ ނަފްސު ދިފާއުކުރުމުގެ ހައްގު އެ ގައުމަށް އޮތް ކަމަށެވެ. އޭނާ ދައުވާ ކުރެއްވި ގޮތުގައި އީރާނުގެ ހަމަލާތައް ހުއްޓުނީ އިސްރާއީލުން އީރާނުގެ އެތެރޭގެ އަމާޒުތަކަށް ހަމަލާދިނުމުންނެވެ. އަދި ކުރިއަށް އޮތް ތަނުގައި ދޭ ކޮންމެ ހަމަލާއަކަށް ވަރުގަދަ ރައްދެއް ދޭނެ ކަމުގެ އިންޒާރުވެސް އޭނާ ދެއްވިއެވެ.މިދަނޑިވަޅުގައި، އީރާނުން ވަނީ ހަނގުރާމަ ހުއްޓާލުމުގެ މަޝްވަރާތަކުގައި އެމެރިކާ އަދާކުރާ ދައުރުގެ ސަބަބުން، މި ހާލަތުގެ ޒިންމާ އެމެރިކާއިންވެސް އުފުލަންޖެހޭނެ ކަމަށް ބުނެފައެވެ. އީރާނުގެ އޮފިޝަލުން ވިދާޅުވީ ހަނގުރާމަ ހުއްޓާލުމުގެ އެއްބަސްވުމާ ހިލާފުވާ ކޮންމެ އަމަލަކުން ސަރަހައްދުގެ ހަމަޖެހުން އިތުރަށް ގެއްލިގެންދާނެ ކަމަށެވެ.މަސްލަހަތު ގޯސްވެފައިވީ ނަމަވެސް، ސިއްރު ގޮތެއްގައި ޑިޕްލޮމެޓިކް މަސައްކަތްތައް ދަނީ ކުރިއަށެވެ. އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ ތެހެރާނުން މަޝްވަރާތަކަށް ތައްޔާރަށް އޮތް ކަމަށެވެ. އަދި ދެ ގައުމުގެ ޑިޕްލޮމެޓުން މެދުވެރިން މެދުވެރިކޮށް މެސެޖުތައް ބަދަލުކުރަމުންދާ ކަމަށް ރިޕޯޓްތައް ބުނެއެވެ.ޔަމަނުގެ ހޫތީ ހަނގުރާމަވެރިން މި ކުރިމަތިލުމުގެ ތެރެއަށް ވަދެ، އިސްރާއީލަށް މިސައިލް ފޮނުވައި، ރަތް ކަނޑުގައި އިސްރާއީލާ ގުޅުންހުރި އުޅަނދުފަހަރަށް ހަމަލާދޭނެ ކަމުގެ އިންޒާރު ދިނުމާއެކު، ހާލަތު ވަނީ އިތުރަށް ނުރައްކާވެފައެވެ.ދުނިޔޭގެ ލީޑަރުން ކެތްތެރިކަން އިސްކުރުމަށް ގޮވާލަމުންދާއިރު، ބައިނަލްއަގުވާމީ ސިޔާސީ މައިދާނުގައި މިހާރު އުފެދިފައިވާ އެންމެ ބޮޑު ސުވާލަކީ، ޓްރަމްޕްގެ އިންޒާރަކީ ހަމައެކަނި ދެއްކެވި ވާހަކަފުޅެއް ހެއްޔެވެ؟ ނުވަތަ އެއީ އެމެރިކާގެ އެންމެ ގާތް އެކުވެރިޔާއާ މެދު އެމެރިކާގެ ކެތްތެރިކަން ކޮޅުންލަމުންދާ ކަމުގެ ނިޝާނެއް ހެއްޔެވެ؟ މި ސުވާލުގެ ޖަވާބުން މެދުއިރުމަތީގެ މުސްތަގުބަލު ބައްޓަންވެގެންދާނެއެވެ.
