އެމެރިކާއާއި އިސްރާއީލުން އީރާނާ ދެކޮޅަށް އަސްކަރީ އޮޕަރޭޝަންތައް ފެށިތާ ސަތޭކަ ދުވަސް ފަހުން، މި ހަނގުރާމަ ވަނީ ބައިނަލްއަގުވާމީ ސިޔާސަތުތައް ބަދަލުކޮށް، ހަކަތައިގެ ބާޒާރުތަކަށް ބުރޫއަރުވައި، އަދި ދުނިޔޭގެ ލީޑަރުންގެ މެދުގައި ކަންބޮޑުވުން އިތުރުވަމުންދާ ދުނިޔެވީ ކާރިސާއަކަށް ބަދަލުވެފައެވެ.އަސްކަރީ ކުރިމަތިލުމެއްގެ ގޮތުގައި ފެށުނު މި ކަންތައްގަނޑު މިހާރު ވަނީ މެދުއިރުމައްޗަށްވުރެ މާ ދުރަށް އަސަރުކުރާ ހާރިޖީ އަދި އިގްތިސާދީ ގޮންޖެހުމަކަށް ވެފައެވެ. ތެލުގެ އަގު އުފުލުމާއި، މުދާ އުފުލުމުގެ ނިޒާމަށް އެރި ބުރޫތަކާއެކު، ހަނގުރާމަ ނާޒުކު މަރުހަލާއަކަށް ދާއިރު، ދުނިޔޭގެ އެކި ގައުމުތަކުގެ ސަރުކާރުތަކަށް ވަނީ އެ ގައުމުތަކުގެ ސިޔާސަތުތައް އަލުން މުރާޖައާކުރަން މަޖުބޫރުވެފައެވެ.

ގިނަ ގައުމުތަކުން ފުރަތަމަ މިކަމަށް އިޖާބަދިނީ ވަރަށް ބޮޑަށް ސަމާލުވެ ތިބެގެންނެވެ. ހުޅަނގުގެ ބައެއް ބައިވެރިން އެމެރިކާއާއި އިސްރާއީލުގެ ހަމަލާތައް ކުށްވެރިނުކުރި ނަމަވެސް، އެ ގައުމުތަކުން ވަނީ ސީދާ އަސްކަރީ ގޮތުން ބައިވެރިވުމުން ދުރުހެލިވެފައެވެ. އޭގެ ބަދަލުގައި، ލީޑަރުން ގޮވާލެއްވީ ކެތްތެރިކަން އިސްކުރުމަށާއި ހުރިހާ ފަރާތްތަކުން ވެސް ހާރިޖީ ހައްލެއް ހޯދުމަށް މަސައްކަތް ކުރުމަށެވެ.ގަލްފު ސަރަހައްދަށް ބަލާއިރު، ސައުދީ އަރަބިއްޔާ، ގަތަރު، ބަހްރޭން، ކުވެއިތު އަދި ޔުނައިޓެޑް އަރަބް އެމިރޭޓްސް ފަދަ ގައުމުތައް ތިބީ މި ހަނގުރާމައިގެ މެދުގައި ތާށިވެފައެވެ. އީރާނުން އަސްކަރީ އަދި ހަކަތައިގެ ވަސީލަތްތަކަށް އަމާޒުކޮށް ދިން މިސައިލް އަދި ޑްރޯން ހަމަލާތަކުގެ ސަބަބުން މުޅި ސަރަހައްދުގައި ސަލާމަތީ ބިރުވެރިކަމާއި ނުތަނަވަސްކަން އިތުރުވިއެވެ. އެ ގައުމުތަކުގެ ސަރަހައްދުތަކަށް ދޭ ހަމަލާތައް ކުށްވެރިކުރި ނަމަވެސް، ގަލްފުގެ ގިނަ ގައުމުތަކުން ވަނީ ހަމަނުޖެހުން އިތުރަށް ފުޅާވިޔަނުދިނުމަށްޓަކައި މަޝްވަރާކުރުމަށް ބާރުއަޅާފައެވެ.ދުނިޔޭގެ ބޮޑެތި ބާރުތަކުން ވެސް ގެންގުޅެފައިވަނީ ތަފާތު އުސޫލުތަކެކެވެ. ޗައިނާއާއި ރަޝިޔާއިން ވަނީ މި އަސްކަރީ ކެމްޕޭނަށް ވަރަށް ބޮޑަށް ފާޑުކިޔައި، ހަނގުރާމަ ކުރިއަށް ގެންދިއުމުގެ ބަދަލުގައި ވާހަކަދައްކައިގެން ހައްލު ހޯދުމަށް ތަކުރާރުކޮށް ގޮވާލާފައެވެ. މި ދެ ގައުމުން ވެސް އިންޒާރު ދީފައިވަނީ މި ހަނގުރާމައިގެ ސަބަބުން ދުނިޔޭގެ ބާޒާރުތަކުގެ ހަމަޖެހުން ގެއްލި، އިގްތިސާދީ ނުތަނަވަސްކަން އިތުރުވެދާނެ ކަމަށެވެ. މޮސްކޯއިން ތެހެރާނާއެކު ގާތް ގުޅުމެއް ބާއްވަމުންދާއިރު، ބީޖިންގްއިން މަސައްކަތް ކުރަމުންދަނީ ނުތަނަވަސްކަން ކުޑަކުރުމަށް އަމާޒުކޮށް ހިންގާ ހާރިޖީ މަސައްކަތްތަކަށް އެއްބާރުލުން ދިނުމަށެވެ.އެއާއެކު، މެދުއިރުމަތީގެ ހަކަތައަށް ބޮޑަށް ބަރޯސާވާ ގައުމުތައް ކަމަށްވާ ޖަޕާން، އިންޑިއާ އަދި ދެކުނު އިރުމަތީ އޭޝިއާގެ ގިނަ ގައުމުތަކުން ވަނީ ދުނިޔޭގެ އެންމެ މުހިންމު ތެޔޮ އުފުލާ މަގު ކަމަށްވާ ސްޓްރެއިޓް އޮފް ހޯމުޒްއަށް ކުރިމަތިވެފައިވާ ހުރަސްތަކާ މެދު ކަންބޮޑުވުން ފާޅުކޮށްފައެވެ. ތެލުގެ ދަތިކަން ކުރިމަތިވުމާއި އަގުތައް އުފުލުމުގެ ބިރުވެރިކަން ވަނީ ބޮޑު އިގްތިސާދީ މައްސަލައަކަށް ވެފައެވެ.ޕާކިސްތާން ފާހަގަވެފައިވަނީ އެންމެ ހަރަކާތްތެރި މެދުވެރިއެއްގެ ގޮތުގައެވެ. އެ ގައުމުން ދަނީ ހަމަލާ ބަދަލުކުރުން ހުއްޓާލުމުގެ މަޝްވަރާތަކާއި މުހިންމު ފަރާތްތަކުގެ މެދުގައި ހާރިޖީ ގުޅުންތައް ގާއިމުކުރުމަށް އެހީތެރިވަމުންނެވެ. މިސްރު، ތުރުކީ އަދި އެހެން ބައެއް ގައުމުތަކުން ވެސް ވަނީ މަޝްވަރާތަކަށް ބާރުއެޅުމަށް ކުރާ މަސައްކަތްތައް ވަރުގަދަކޮށްފައެވެ.އދ. އިން ތަކުރާރުކޮށް އިންޒާރު ދެމުންދަނީ މި ހަނގުރާމަ ކޮންޓްރޯލުން ނެއްޓިގެން ދިއުމުގެ ފުރުސަތު އޮތް ކަމަށެވެ. ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ އަވަސް ހާރިޖީ ހައްލަކަށް ގޮވާލައްވައި، ހަމަނުޖެހުންތައް ކުރިއަށްދާނަމަ ސަރަހައްދީ އަދި ދުނިޔޭގެ ހަމަޖެހުމަށް ނުރައްކާތެރި ނަތީޖާތަކެއް ކުރިމަތިވެދާނެ ކަމުގެ އިންޒާރު ދެއްވާފައެވެ.ހަނގުރާމައަށް 100 ދުވަސް ފުރޭއިރު، ސާފުކޮށް ފެންނަން އޮތް ބޮޑު ހަޤީޤަތެއް އެބައޮތެވެ. އެއީ، މިހާރު ކުރިއަށްދާ ހަނގުރާމައަކީ، ހަމައެކަނި އީރާނާއި، އިސްރާއީލާއި، އެމެރިކާއަށް އެކަނި އަސަރުކުރާ ހަނގުރާމައެއް ނޫނެވެ. ހަކަތައިގެ އަގު އުފުލުމުން ފެށިގެން ގޮސް ބައްރުތަކަށް ފެތުރިފައިވާ ސިޔާސީ ނުތަނަވަސްކަމާ ހަމައަށް، މީގެ އަސަރު މުޅި ދުނިޔެއަށް ދަނީ ކުރަމުންނެވެ. މި ކާރިސާ ދިގުލައިގެންދާ ވަރަކަށް، އޭގެ ނަތީޖާ މިހާރަށްވުރެ ނުރައްކާވުމުގެ ކުރިން، ސުލްހަވެރި މަގެއް ހޯދުމަށް ދުނިޔޭގެ ލީޑަރުންނަށް ކުރިމަތިވާ ފިއްތުންތައް ދަނީ އިތުރުވަމުންނެވެ.