ދުނިޔޭގެ ސަމާލުކަން ހޯރްމުޒް ކަނޑުއޮޅިއަށާއި އެމެރިކާ-އީރާންގެ އިތުރުވަމުންދާ ކުރިމަތިލުންތަކަށް ހުއްޓިފައިވާއިރު، އަސްކަރީ ފިއްތުންތަކަށް ކެތްކުރުމުގައި މާ ބޮޑަށް ފާހަގަނުވާ މަގެއް ވަރަށް މުހިންމު ދައުރެއް އަދާކުރަމުންދާ ކަމަށް ދިރާސާވެރިން ބުނެއެވެ.

އާ ދިރާސާއަކުން ދައްކާގޮތުގައި، ކެސްޕިއަން ކަނޑު ވެފައިވަނީ އީރާނުގެ އިގްތިސާދީ އަދި އަސްކަރީ މައިނާރަށެވެ. މީގެ ސަބަބުން، އެހެން ސަރަހައްދުތަކުގައި ހަނގުރާމަ ހިނގަމުންދާއިރުވެސް، ވިޔަފާރި ދެމެހެއްޓުމަށާއި، ހަތިޔާރު ހޯދުމަށާއި، ބައިނަލްއަގުވާމީ ދަތިކުރުމުގެ ފިޔަވަޅުތަކުން ރެކުމުގެ ފުރުސަތު އެ ގައުމަށް ލިބިގެންދެއެވެ.ފެބްރުއަރީ 28 ގައި އެމެރިކާއާއި އިސްރާއީލުން އީރާނަށް ހަމަލާތަކެއް ދޭން ފެށުމުން، ގިނަ ބަޔަކު ހީކުރީ އެ ގައުމުގެ ސަރުކާރު ބިނދިގެންދާނެ ކަމަށެވެ. އެ އޮޕަރޭޝަނުގައި އަމާޒުކުރީ ސިޔާސީ އަދި އަސްކަރީ މައި މަރުކަޒުތަކަށެވެ. އަދި އޭގެ ބޭނުމަކީ އީރާނުގެ ލީޑަޝިޕްގެ އޮނިގަނޑު ނިކަމެތިކޮށްލުން ކަމަށް ރިޕޯޓުތައް ބުނެއެވެ. ނަމަވެސް މަސްތަކެއް ފަހުންވެސް، އީރާން ދައުލަތް އޮތީ ސާބިތުކަންމަތީގައެވެ. އަދި މުޅި ސަރަހައްދުގައި އެ ގައުމުގެ އަސްކަރީ ބާރު ދައްކަމުންދެއެވެ.މާހިރުން ބުނާގޮތުގައި މީގެ އެއް ސަބަބަކީ، އީރާނާއި، ރަޝިޔާއާއި، އަޒަރުބައިޖާނާއި، ކަޒަކިސްތާނާއި ތުރުކުމެނިސްތާނާ ދެމެދު އޮންނަ ދުނިޔޭގެ އެންމެ ބޮޑު އެތެރެވަރީގެ ކަނޑު ކަމަށްވާ ކެސްޕިއަން ކަނޑު މެދުވެރިކޮށް ހިންގާ ފުޅާ އަދި ސިއްރު ވިޔަފާރީގެ ނެޓްވޯކެވެ. 2022 ވަނަ އަހަރު ރަޝިޔާއިން ޔޫކްރޭނަށް އަރައިގަތް ފަހުން މި މަގުގެ މުހިންމުކަން ވަނީ އިތުރުވެފައެވެ. މޮސްކޯއާއި ތެހެރާނުން ވަނީ ކެސްޕިއަން ސަރަހައްދުގެ ރޭލު މަގުތަކާއި، ކޯރުތަކާއި، ކަނޑުގެ މަގުތައް ގުޅުވައިދޭ ދަތުރުފަތުރުގެ ނިޒާމުތަކަށް ބިލިއަނުން ޑޮލަރު އިންވެސްޓްކޮށްފައެވެ. މި ނެޓްވޯކްތަކުގެ އެހީގައި، ހުޅަނގުގެ ދަތިކުރުމުގެ ފިޔަވަޅުތަކުން ރެކިގެން މުދަލާއި، ތެލާއި، އަސްކަރީ ސާމާނު އުފުލުމުގެ ފުރުސަތު ދެ ގައުމަށްވެސް ލިބެއެވެ.މި ވިޔަފާރި ހުއްޓުވުމަށް ހުރަސްއަޅާ މައިގަނޑު ސަބަބަކީ ”ޝެޑޯ ފްލީޓްސް“ ނުވަތަ ހިޔަނި ފްލީޓްތަކުގެ ބޭނުންކުރުމެވެ. މި އުޅަނދުތަކުން ގިނަ ފަހަރަށް ޓްރެކިންގް ސިސްޓަމްތައް ނިއްވާލައި، އެކި ގައުމުތަކުގެ ދިދަ ބޭނުންކޮށް، އޮޅުވާލައިގެން ނަންތައް ބޭނުންކޮށް ނުވަތަ ކަނޑުމަތީގައި އުޅަނދުތަކުގެ ދެމެދުގައި މުދާ ބަދަލުކުރެއެވެ. މިފަދަ އުކުޅުތަކުގެ ސަބަބުން އެ ތަކެތީގެ ހަރަކާތްތައް މޮނިޓަރ ކުރުމަކީ ނުހަނު އުނދަގޫ ކަމެކެވެ.ކަނޑުމަތީގެ ހަރަކާތްތައް ބަލަމުންދާ ތަހުގީގުވެރިން ވަނީ ރަޝިޔާއާއި އީރާނާ ދެމެދު ވިޔަފާރި ހިންގުމަށް އެހީތެރިވާ ކަމަށް ތުހުމަތުކުރެވޭ ނެޓްވޯކްތަކާ ގުޅުންހުރި އުޅަނދުތަކެއް ފާހަގަކޮށްފައެވެ. ބައެއް އުޅަނދުތަކުން އެތައް ފަހަރަކު ދިދަ ބަދަލުކޮށްފައިވާއިރު، އެ އުޅަނދުތަކަކީ އަސްކަރީ ސާމާނު ހިމެނޭހެން މަނާކޮށްފައިވާ މުދާ އުފުލުމުގައި އެހީތެރިވާ ކަމަށް ތުހުމަތުކުރެވޭ ކުންފުނިތަކާ ގުޅުންހުރި އުޅަނދުތަކެކެވެ.މި ބައިވެރިވުން ދެ ގައުމަށްވެސް ވަނީ ވަރަށް މުހިންމުވެފައެވެ. އީރާނުން ރަޝިޔާއަށް މިސައިލާއި ޑްރޯން ޓެކްނޮލޮޖީ ފޯރުކޮށްދީފައިވާއިރު، މޮސްކޯއިން ވަނީ ވައިގެ ދިފާއީ ނިޒާމުތަކާއި، ހަނގުރާމަމަތީ މަތިންދާބޯޓުތަކާއި، އެޓޭކް ހެލިކޮޕްޓަރު ހިމެނޭހެން ކުރިއަރާފައިވާ އަސްކަރީ ސާމާނު ފޯރުކޮށްދީފައެވެ. ދިރާސާވެރިން ގަބޫލުކުރާ ގޮތުގައި މި މުއާމަލާތްތަކުގެ ސަބަބުން އަސްކަރީ ފިއްތުންތަކާ ކުރިމަތިލުމަށް އީރާނަށް އޮތް ގާބިލުކަން ވަނީ އިތުރުވެފައެވެ.ކެސްޕިއަން ކަނޑަކީ އެމެރިކާގެ ވޮޝިންޓަނަށްވެސް އޮތް ބޮޑު ގޮންޖެހުމެކެވެ. އެހެން މުހިންމު ކަނޑުގެ މަގުތަކާ ހިލާފަށް، މި ސަރަހައްދަކީ އެ ސަރަހައްދު ވަށައިގެންވާ ގައުމުތަކުން ސޮއިކޮށްފައިވާ އެއްބަސްވުންތަކުގެ ދަށުން ބޭރުގެ އަސްކަރީ ބާރުތަކަށް ބަންދުވެފައިވާ ތަނެކެވެ. ނަތީޖާއެއްގެ ގޮތުން، އެމެރިކާގެ ސީދާ އަސްކަރީ ނުފޫޒެއް އެތަނަކު ނެތެވެ.އީރާނުގެ ބަނދަރުތަކާއި އެ ގައުމުގެ އެތެރެވަރީގެ ސަރަހައްދުތައް ގުޅުވައިދޭ ދަތުރުފަތުރުގެ އޮނިގަނޑަށް ހަމަލާދޭން ވޮޝިންޓަނުން މަސައްކަތް ކުރި ނަމަވެސް، އެފަދަ އަމަލުތަކުގައި ބޮޑެތި ނުރައްކާތަކެއް އެކުލެވިގެންވެއެވެ. އޭގެ ތެރޭގައި ރަޝިޔާއާ ގުޅުންހުރި ތަންތަނަށް ހަމަލާ އެރުމާއި، މަސްލަހަތު އިތުރަށް ގޯސްވެގެން ދިއުމުގެ ފުރުސަތު ހިމެނެއެވެ.މިސައިލްތަކާއި، ޑްރޯންތަކާއި އަދި ކަނޑުގެ މަގުތައް ބަންދުކުރުމަށް އެންމެންގެ ސަމާލުކަން ހުއްޓިފައިވާއިރު، ކަމާބެހޭ މާހިރުން އިންޒާރުދޭ ގޮތުގައި އަސްލު މައްސަލަ އޮތީ އެތައް ސަތޭކަ ކިލޯމީޓަރެއް ދުރުގައި އޮތް ކެސްޕިއަން ކަނޑުގައެވެ. އެއީ އީރާނަށް މި ހަނގުރާމައިގައި ދެމިއޮތުމަށް ހިމޭންކަމާއެކު އެހީތެރިވެދޭ ސިއްރު މަގެކެވެ.