މެންދުރުގެ ފަރީއްކޮޅަކަށްފަހު ރައީސް ޓްރަމްޕް އާއި ރައީސް ޒެލެންސްކީ ރިޕޯރޓަރުންގެ ކުރިމަތީގައި ބައްދަލުކުރެއްވުން ފެށުނުތަނާ ވަރަށް އެކުވެރި ކަމާއެކު ހޭދަވެގެންދިޔަނަމަވެސް ބަންދުކޮޓަރިކޮޅަށް ވެދެވަޑައިގެންނެވުމާއެކު ބޮޑުޒުވާބަކަށް ބަދަލުވެގެން ހިގައްޖެއެވެ.

މީގެ ކުރިންވެސް އެ ދެ ލީޑަރުންގެ ބައެއް ބައްދަލުކުރެއްވުންތައް ދިވެހިންގެ ސިޔާސީ ޖަގަހަތަކުގެ ފެންވަރަށް ވަނީ ވެއްޓިފައެވެ. ތަފާތަކީ އަޅުގަނޑުމެން ހަޅޭއްލަވަނީ ދުރުގައި ތިބެގެންނެވެ. ރައީސް ޓްރަމްޕް އާއި ރައީސް ޒެލެންސްކީގެ ބައެއް ބައްދަލު ކުރެއްވުމުގައި ޒުވާބު ކުރުން ހައްދުންނައްޓަލައިގެން ދިޔަ މަންޒަރުވެސް ވަނީ މީޑިއާތަކުގައި އާންމު ވެފައެވެ.
މިދިޔަ އާދީއްތަދުވަހުގެ އެ ބައްދަލުކުރެއްވުމުގައި ރަޝިޔާގެ ރައީސް އެދިވަޑައިގަންނަވާ ގޮތެއް ގަބޫލުކޮށް ހަނގުރާމަހުއްޓާލަން އެއްބަސްވުމަށް ބާރުއަޅުއްވައި ރައީސް ޒެލެންސްކީއަށް ރައީސް ޓްރަމްޕް އިންޒާރު ދެއްވި އެވެ. ރައީސް ޓްރަމްޕް ވިދާޅުވެފައިވަނީ ރަޝިޔާއިން ޔޫކްރެއިނާ ދެކޮޅަށް އަދިވެސް ހަނގުރާމަ ނުކުރާ ކަމަށާއި ރަޝިޔާއިން ޔުކްރެއިނާ ދެކޮޅަށް ހިންގަމުން ގެންދަނީ ސްޕެޝަލް އޮޕަރޭޝަނެއް ކަމަށެވެ. ރަޝިޔާއިން ހަނގުރާމައެއް ފަށާދުވަހަކުން ޔޫކްރެއިން ވިރާނާވެގެންދާނެކަން ގަބޫލުކޮށް ޑޮންބަސް ސަރަހައްދު އެކުގައި ދީގެންނަމަވެސް ޔޫކްރެއިން ސަލާމަތްކުރަން ޒެލެންސްކީއަށް ވިސްނައިދެވޭތޯ މަސައްކަތްކުރެއްވިކަމަށް ފައިނޭންޝަލް ޓައިމްސް އިން ބުނެފައި ވެއެވެ.
ޑޮންބަސް ސަރަހައްދު ރަޝިޔާއަށް ދީގެން މިވަގުތު ހަނގުރާމަ ހުއްޓާލަން އެއްބަސް ވެއްޖެނަމަ ޒަޕޯރިންޒިއާގެ ބައެއް ކުދިކުދި އަވަށްތަކުން ރަޝިޔާ ސިފައިން ފައިބަން ތައްޔާރުކަމަށް ރައީސް ޕޫޓިން ވިދާޅުވިކަމަށްވެސް ޓްރަމްޕްގެ ވާހަކައިގާ ހާމަކުރެއްވިއެވެ. ޔޫކްރެއިންގެ ޗާޓުން ކޮންމެދުވަހަކު ބައެއް ރަޝިޔާގެ ބާރުގެދަށަށް ގެއްލެމުންދާތަން ބަލަ ބަލާ މިހާރު ފޫހި ވެއްޖެ ކަމަށާއި ރަޝިޔާގެ ބާރު ކެނޑެމުންދާކަމަށް ޔޫރަޕިއަން ޔޫނިއަނުން ދެކެނީ ހުވަފެނެއްކަމަށް ދޭހަވާ މޭރުމަކުންވެސް ރައީސް ޓްރަމްޕް ވާހަކަފުޅު ދެއްކެވިއެވެ.
ރައީސް ޓްރަމްޕްއާއެކު ބޭއްވެވި ބައްދަލުކުރެއްވުމަށްފަހު އެމެރިކާއާއި ޖީ-7 ގެ ގައުމުތަކާއި އަދި ޔޫރަޕިއަން ޔޫނިއަނުން ޔޫކްރެއިންގެ މައްސަލާގައި ތަންކޮޅެއް އޮށްޓަރުހުރި ނިންމުމެއް ނިންމާދޭން ވެއްޖެ ކަމަށް ވިދާޅުވެ ރައީސް ޒެލެންސްކީ ވަނީ ބަޔާނެއް ނެރުއްވާފައެވެ.
ފޮކްސް ނިއުސްގެ މާރިއާ ބާރޓިރޯމޯ ކުރި ސުވާލަކަށް ރައީސް ޓްރަމްޕް ވިދާޅުވީ ރައީސް ޒެލެންސްކީ އެދިވަޑައިގެންފައިވާ ފަދައިން އެމެރިކާއިން ޔުކްރެއިނަށް ޓޯމަހައުކް މިސައިލް ފޯރުކޮށް ދެވެން ނެތްކަމަށާއި އެއީ އެމެރިކާއަށް މިވަގުތު މާބޮޑަށް ބޭނުން ޖެހިފައިވާ ހަތިޔާރެއް ކަމަށެވެ.
އެމެރިކާއިން ޔޫކްރެއިނަށް ސެކިއުރިޓީ ގަރަންޓީ ދިނުމާބެހޭގޮތުން ރައީސް ޓްރަމްޕް މިހާރު ވިދާޅުވާއެއްޗަކުން ހައްތާވެސް އޮޅުން އެރުން ބޮޑުވަނީކަމަށް މައުލޫމާތު އެނގޭ ޔޫކްރެއިން ގެ ދެ އޮފިޝަލަކު ރޮއިޓާރސްއަށް ވަނީ ކިޔާދީފައެވެ. ދެ ލީޑަރުންގެ ބައްދަލު ކުރެއްވުމުގައި ރައީސް ޓްރަމްޕްގެ ހުށައަޅުއްވާފައިވާގޮތަށް ޔޫކްރެއިނުގެ އެންމެ ތަންކޮޅެއްވެސް ރަޝިޔާއަށް ނުދެއްވާނެ ކަމަށް ރައީސް ޒެލެންސްކީ ތަކުރާރުކުރެއްވިއެވެ.
ރައީސް ޒެލެންސްކީއާ ބައްދަލު ކުރެއްވުމަށްފަހު އެއާރފޯސް ވަން ގައި އިންނަވާފައި މީޑީއާތަކަށް ރައީސް ޓްރަމްޕް ވިދާޅުވީ ރައީސް ޒެލެންސްކީއާ އެކު ވަރުގަދަ މަޝްވަރާތަކެއް ކުރެވުނު ކަމަށާއި ރަޝިޔާ ސިފައިން ޔޫކްރެއިންގެ އިތުރު ބިންތައް އަތުލުން ހުއްޓުވޭނެ ހަމައެކަނި މަގަކީ ރައީސް ޕޫޓިން ރުއްސުން ކަމަށާއި ޑޮންބަސް ސަރަހައްދު އެކުގައި ރަޝިޔާއަށް ދިނުމަށްފަހު އަދި ރައީސް ޕޫޓިންގެ ވިސްނުންފުޅު ބަދަލު ނުވަނީސް ޒެޕޯރިންޒާގެ އަވަށްތައް ލިބިގަތުމަށްފަހު ހަނގުރާމަ ހުއްޓާލަން ޒެލެންސްކީ އެއްބަސް ވުމެވެ. ގޮތް ދޫނުކުރައްވައި ހުންނަވައިގެން ރައީސް ޒެލެންސްކީއަށް އިތުރު ގެއްލުން މެނުވީ އެކައްޗެއްވެސް ނުލިބޭނެއެވެ. މިހާރުވެސް ޑޮންބަސްގެ ގާތްގަނޑަކަށް %80 އޮތީ ރަޝިޔާގެ ބާރުގެ ދަށުގައެވެ. އެންމެފަހުން ރައީސް ޓްރަމްޕްގެ އާދައިގެ މަތިން ރައީސް ޒެލެންސްކީއަށް ލައުނަތްލައްވުންއެދި ހަޅޭއްލަވަމުންވެސް ގެންދެވީއެވެ.
މީގެކުރިން ބާރުއަޅުއްވަމުންގެންދެވިގޮތަށް މިހާރަކަށް އައިސް ހަނގުރާމަހުއްޓުވަން ރައީސް ޓްރަމްޕް މާބޮޑަށް ބާރު އަޅުއްވާތަނެއް ނުފެނެއެވެ. މަސައްކަތް ކުރައްވަނީ ރަޝިޔާގެ ކުރިމަތީގައި ޔޫކްރެއިންގެ ނާޒުކު ހާލަތު ޒެލެންސްކީއަށް ވިސްނައިދެވޭތޯއެވެ. އެންމެ ފަހުން ޔޫކްރެއިން ވީރާނާވެ ގަނޑުފެނުގެތެރޭގައި ވަޅުލެވިގެންދާނީކަމަށް ރައީސް ޒެލެންސްކީއަށް އިންޒާރު ދެއްވި ކަމަށްވެސް ޔޫ އެސް ގެ އޮފިޝަލަކު މީޑިއާތަކަށް މައުލޫމާތު ދީފައި ވެއެވެ.