ކެމަރޫން ދިދައިގާ ދުއްވާ ލިކުވިފައިޑް ނެޗުރަލް ގޭސް ) އުފުލާ އެމް.ވީ ފަލްކަން، ގަލްފު އޮފް އަދަނުގެ ތެރޭގައި އައި ދިމާލެއް ކަށަވަރު ނުކުރެވޭ ހަތިޔާރަކުން ޖެހި ގޮވައިފިއެވެ.

އޭރު ބޯޓު ދަތުރުކުރަމުންދަނީ އޮމާނުގެ ސޯހަރުން ފުރައިގެން ޖިބޫޓީއަށް ކަމަށާއި ބޯޓަށް އެރި ހަމަލާ ތަހްގީގުކުރަމުން ގެންދާކަމަށް އިނގިރޭސި ވިލާތުގެ މެރިޓައިމް ސެކިއުރިޓީ ފާރމް، އެމްބްރޭ އިން ބުނެފައިވެއެވެ. އެމް. ވީ. ފަލްކަންގެ %15 ގައި ރޯވެ އަނދަމުންދާ ކަމަށާއި އެހެންނަމަވެސް އެ ބޯޓަށް އެރި ހަމަލާގެ ބާވަތް މިހާތަނަށް ދެނެގަނެވިފައިނުވާކަމަށް ޔޫރަޕިއަން ޔޫނިއަންގެ ނޭވަލް ފޯސް އެސްޕައިޑްސް އިން ބުނެފައިވެއެވެ. ބޯޓުގައި މަސައްކަތްކުރާ 26 މީހުންގެ ތެރެއިން 24 މީހަކު ސަލާމަތް ކުރެވިފައިވާއިރު 2 މީހުން އަދިވެސް ނުފެންނަ ކަމަށްވެސް އެސްޕައިޑްސް އިން މައުލޫމާތު ދީފައިވެއެވެ.
އެމްބްރޭގެ ރިޕޯޓުގައި ބުނެފައިވާގޮތުން އެމް. ވީ. ފަލްކަން އަކީ އާންމުގޮތެއްގައި ހޫތީ މުޖާހިދުން ހަމަލާދޭނެކަމަށް ކަނޑައަޅާފައިވާ ކެޓަގަރީއަށް ފެތޭ ބޯޓެއް ނޫނެވެ. އެ ބޯޓަށް ދީފައިވާ ހަމަލާގައި ހޫތީ މުޖާހިދުންނާ އެއްވެސް ގުޅުމެއް ނެތްކަން ހޫތީ މުޖާހިދުންގެ ދިފާއީ ވުޒާރާއަށް ހަވާލަދީ ސަބާ ނިއުސް އޭޖެންސީން ބުނެފައިވެއެވެ. އަދި ރައީސް ޑްނާލަޑް ޓްރަމްޕްގެ ހުށައެޅުމަށް ރުހުން ދިނުމާއެކު ހަނގުރާމަ ހުއްޓާލުމަށް އިސްރާއީލާއި ހަމާސްއިން އެއްބަސް ވެފައިވާތީވެ ހޫތީ މުޖާހިދުންގެ ހަމަލާތައްވެސް ވަނީ ހުއްޓުމަކަށް ގެނުވާފައެވެ.
ހޫތީ މުޖާހިދުން އެންމެފަހުން ހަމަލާދީފައިވަނީ ޑަޗް ދިދައިގާ ދުއްވާ އެމް. ވީ. މިނަރވާގްރާޚްޓް އަށެވެ. އެ ހާދިސާގައި ބޯޓުގެ ފަޅުވެރިއަކު މަރުވެ އަދި އެހެން ފަޅުވެރިއަކު ވަނީ ޒަޚަމްވެފައެވެ. ހޫތީ މުޖާހިދުން އެބޯޓަށް ހަމަލާދީފައިވަނީ މިދިޔަ ސެޕްޓެމްބަރ މަހުގެ 29 ވަނަ ދުވަހުއެވެ.
އިސްރާއީލުން ގައްޒާގައި ހިންގަމުންގެންދާ ގަތުލްއާންމު ހުއްޓުމަކަށް ގެނެސްފައިވީ ނަމަވެސް އިސްރާއީލުން ހޫތީ މުޖާހިދުންނަށް ހަމލާދިނުމެއް ނުހުއްޓައެވެ. އެންމެ ފަހުން މިދިޔަ ބުރާސްފަތި ދުވަހު އިސރާއީލުން ދިން ހަމަލާގައި ހޫތީ މުޖާހިދުންގެ މިލިޓްރީ ޗީފް އޮފް ސްޓާފް މުހަންމަދު އަބްދުލް ކަރީމް އަލް ޣަމްމާރީ ވަނީ ޝަހީދުކޮށްލާފައެވެ. އަދި އޭގެކުރިން އޯގަސްޓް 28 ވަނަދުވަހު އިސްރާއީލުން ދިން ހަމަލާގައި ބޮޑުވަޒީރު އަހްމަދު ޣާލިބް އަލް ރަހާވީއާއި އެހެން 9 ވަޒީރުން ވަނީ ޝަހީދު ކޮށްލާފައެވެ. މި ހަމަލާއަށް އިސްރާއީލުގެ ކިބައިން ބަދަލު ހިފާނެކަމަށް ހޫތީ މުޖާހިދުންވަނީ ވައުދު ކަށަވަރު ކޮށްފައެވެ.