އިނގިރޭސިވިލާތުގެ ބޮޑުވަޒީރުގެ ނައިބު އެންޖެލާ ރޭނަރ އޭނާގެ ހޯވް ފްލެޓުގެ ސްޓޭމްޕް ޑިއުޓީގެ ގޮތުގައި ދައްކަންޖެހޭވަރަށްވުރެ 40،000 ޕައުންޑް މަދުކޮށް ޑިއުޓީ ދެއްކި ކަމަށް އެއްބަސްވެވަޑައިގަންނަވައި، އިސްތިއުފާ ދެއްވުމާއި ގުޅިގެން ބޮޑުވަޒީރު ކޭއާ ސްޓާމަރ އޭނަގެ ކެބިނެޓަށް ބޮޑެތި ބަދަލުތަކެއް ގެނެސްފި އެވެ.

އެކަމަނާ ވަޒީރުކަމުގެ ކޯޑާއި ހިލާފުވެފައިވާ ކަމަށާއި، އެކަމުގެ ސަބަބުން އޭނާ އަށް މަގާމުގައި ހުރެވެން ނޯންނާނެކަމަށް ބުނެފައިވަނީ އެތިކްސް ވޮޗްޑޯގަކުންނެވެ.

މިގޮތުން، ޖަސްޓިސް ސެކްރެޓަރީގެ މަގާމާއި ލޯޑް ޗާންސެލާގެ މަގާމު އަދާކުރާ ޑޭވިޑް ލަމީ، ޑެޕިއުޓީ ޕްރައިމް މިނިސްޓަރުގެ މަގާމަށް އައްޔަންކޮށްފައިވާއިރު، ޔިވެޓް ކޫޕަރ ހޯމް ސެކްރެޓަރީގެ މަގާމުން ފޮރިން ސެކްރެޓަރީގެ މަގާމަށް ބަދަލުކޮށް، ޝަބާނާ މަހުމޫދާއި ވަނީ ގާނޫނާއި ގަވާއިދަށް ފޯކަސްކުރުމަށް ހޯމް ސެކްރެޓަރީގެ މަގާމާ ހަވާލުކޮށްފައެވެ.

ރިފޯމް ޔޫކޭ އާއި އިދިކޮޅު އެހެން ޕާޓީތަކުގެ ޕްރެޝަރު ބޮޑުވަމުން އަންނަ ޕޯލްތަކުން ދައްކާ ގޮތުގައި މި ބަދަލަކީ، ސްޓާމަރ އޭނާގެ ސަރުކާރުގެ ކޮންޓްރޯލް ވަރުގަދަކޮށް، ހަރުކަށި އާ ތަސްވީރެއް ދެއްކުމަށް ކުރާ މަސައްކަތެކެވެ. އަދި މިބަދަލުތަކުގެ ސަބަބުން ލޭބަރ ޕާޓީގެ ކަނާތު ފިޔައިގެ ސަޕޯޓަރުންނާއި އެ ޕާޓީގެ ސެންޓްރިސްޓް ކޯއާ ދެމެދު އުފެދިފައިވާ ޓެންޝަންތައް ވެސް ހާމަވެގެންދެއެވެ.

ލޭބަރ ކޮންފަރެންސް ކައިރިވަމުން އަންނައިރު، ކެބިނެޓްގެ އާ ލައިންއަޕްގެ ސަބަބުން އިތުބާރު އަލުން ލިބި، އޭނާގެ ބާރު ވަރުގަދަވާނެ ކަމަށް ސްޓާމަރ ގަބޫލު ކުރާއިރު، އެކަމުގެ ސަބަބުން ޕާޓީގެ ތެރޭގައި ބައިބައިވުންތައް ފުންވެދާނެ ކަމުގެ އިންޒާރު ފާޑުކިޔާ ފަރާތްތަކުން ގެންދަނީ ދެމުންނެވެ.