ބްރިކްސް ބޭންކުގެ ވައިސް ގަވަރނަރަކަށް އިންޑިއާގެ ރަޖީވް ރަންޖަން

Loading

Facebook
Twitter
WhatsApp

ބްރިކްސްގެ ނިއު ޑިވެލޮޕްމެންޓް ބޭންކުގެ ވައިސް ޕްރެޒިންޓް އަދި ރިސްކް އޮފިސަރގެ މަގާމަށް އިންޑިއާގެ ޑޮކްޓަރ ރަޖީވް ރަންޖަން 5 އަހަރު ދުވަހުގެ މުއްދަތަށް އައްޔަންކޮށްފިއެވެ. މަރުކަޒީ ބޭންކިންގ ދާއިރާގައި 30 އަހަރުގެ ތަޖްރިބާ ލިބިވަޑައިގެން ހުންނެވި ރަޖީވް ރަންޖަން ބޭންކިންގ ދާއިރާއާއި ގުޅިވަޑައިގަތީ 1989 ވަނައަހަރު ރިޒާވް ބޭންކް އޮފް އިންޑިއާގައެވެ. އެންމެފަހުން އޭނާ އަދާކުރައްވާފައިވަނީ ރިޒާވް ބޭންކް އޮފް އިންޑިއާގެ މެމްބަރ އޮފް މަނިޓަރީ ޕޮލިސީ ކޮމިޓީގެ ހައިސިއްޔަތުން އެކޮމިޓީގެ އެގްޒެކެޓިވް ޑިރެކްޓަރގެ މަގާމުގައެވެ.  

                                                           

ރަޖީވް ރަންޖަން އަކީ  ތަފާތު މާލީ އިދާރާތަކުން ތަޖްރިބާ ލިބިވަޑައިގެން ހުންނެވި ބޭފުޅެއްކަމަށާއި އޭގެތެރޭގައި ވޯލްޑް ބޭންކާއި އައި އެމް އެފް އަދި ޖީ-20 އާއި ސާރކްގެ މާލީ އިދާރާވެސް ހިމެނޭކަމަށް ނިއު ޑިވެލޮޕްމެންޓް ބޭންކުން ބުނެފައި ވެއެވެ.                                                   

އިންޑިއާގެ އިގްތިސާދީ އަދި މާލީ ދާއިރާތަކުގެ ޚާރިޖީ ސިޔާސަތާއި އިންޑިއާގެ މައިކްރޯ އިކޮނޮމިކް ސިޔާސަތަށް ރަޖީވް ރަންޖަންގެ ވަރަށްބޮޑު ހިއްސާއެއް ލިބިފައިވާ ކަމަށްވެއެވެ.                               

އިންޑިއާގައި އާންމު ރައްޔިތުންނާ ގުޅުންހުރި ރެއިލްވޭ އާއި ފެން މެނޭޖްކުރުން ފަދަ ކަންކަމުގައި ނިއު ޑިވެލޮޕްމެންޓް ބޭންކުން ގެންދަނީ އެހީތެރިކަން ފޯރުކޮށްދެމުންނެވެ.                           

ނިއު ޑިވެލޮޕްމެންޓް ބޭންކުން އެހީ ފޯރުކޮށްދޭ މަޝްރޫއުތަކުގެ ތެރޭގައި ތިމާވެށި ރައްކާތެރިކުރުމާއި ސާފު ވަޔާއި ހަކަތައިގެ މަޝްރޫއުތަކާއި ފެނާއި ނަރުދަމާ އަދި ދަތުރުފަތުރުގެ ޚިދުމަތްތައް ހިމެނެއެވެ.         

ނިއު ޑިވެލޮޕްމެންޓް ބޭންކުގެ ޑޭޓާތަކަށްބަލާއިރު އިންޑިއާގައި 7.5 ބިލިއަން އެމެރިކާ ޑޮލަރުގެ ބިޔަ މަޝްރޫއުތަކެއް އަދި ޗައިނާގައި 8.1 ބިލިއަން އެމެރިކާ ޑޮލަރުގެ މަޝްރޫއު ހިންގަމުން ގެންދެއެވެ. އެން ޑީ ބީ އިން ގްލޯބަލް ސައުތުގައި އަމިއްލަ ފަރުދުން ހިންގާ މަޝްރޫއުތަކަށްވެސް މާލީ އެހީތެރިކަން ފޯރުކޮށްދިނުމަށް އިންޑިއާގެ މާލީ ވަޒީރު ނިރްމަލާ ސީތާރާމް މި ހުސްވިމަހު ވަނީ ގޮވާލައްވާފައެވެ.       

އެހެން ޚަބަރެއްގައި އިންޑިއާއިން ރަޝިޔާގެ ތެޔޮގަތުން ދެމެހެއްޓުމާގުޅިގެން ދެވޭ އަދަބެއްގެ ގޮތުގައި އެމެރިކާއަށް އެތެރެކުރާ އިންޑިއާގެ އުފެއްދުންތަކުން %50 ޑިއުޓީ ނަގަން ވަނީ ނިންމަފައެވެ. އެމެރިކާއިން މިވަރުގެ ހަރުކަށި ފިޔަވަޅެއް އަޅާފައިވަނީ ހަމައެކަނި ޗައިނާ ތުރުކީ އަދި އިންޑިއާއަށެވެ.   

Loading

Leave a Reply

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.

ފަހުގެ އަޕްޑޭޓް