ރައީސް ޝީ ޖިންޕިންގެ ދައުވަތަކަށް ހަތް އަހަރަށް ފަހު ފުރަތަމަ ފަހަރަށް އިންޑިއާގެ ބޮޑުވަޒީރު ނަރެންދުރަ މޯދީ ޓިއަންޖިންގައި ބާއްވާ އެސްސީއޯ ސަމިޓުގައި ބައިވެރިވުމަށް ޗައިނާއަށް ވަޑައިގަންނަވާގޮތަށް ހަމަޖެހިއްޖެއެވެ.

މޯދީ ޗައިނާއަށް ދަތުރުކުރެއްވުމަށް ހަމަޖެހިފައިވަނީ އޮގަސްޓް 31 އިން ސެޕްޓެމްބަރު 1 އަށެވެ.

މި ދަތުރާއި ގުޅިގެން އިންޑިއާ ސަރުކާރުން ނެރުނު ބަޔާނުގައި ބުނެފައިވަނީ، ބޮޑުވަޒީރު މޯދީ އެހެން ގައުމުތަކުގެ ވެރިންނާ އެކު އެސްސީއޯ ސަމިޓުގައި ބައިވެރިވެވަޑައިގަންނަވާނެ ކަމަށެވެ.

އަދި އެ ސަމިޓުގައި ހުންނަވާ ދުވަސްވަރު ދެ ގައުމުގެ މަޝްވަރާ ބައްދަލުވުންތަކެއް ބާއްވާނެ ކަމަށް އިންޑިއާ ސަރުކާރުން ބުނެފައި ވެއެވެ.

ޗައިނާ، އިންޑިއާ، ރަޝިޔާ، އީރާން، އަދި މެދުތެރޭ އޭޝިއާގެ ގައުމުތައް ހިމެނޭ ގޮތަށް 2001 ވަނަ އަހަރު އުފެދުނު ސަރަހައްދީ ބްލޮކެއް ކަމަށްވާ އެސްސީއޯގެ ޗެއާމަންޝިޕް މިހާރު އޮތީ ޗައިނާގަ އެވެ.

މި ދަތުރުފުޅަކީ 2018 ވަނަ އަހަރަށްފަހު ޗައިނާއަސް މޯދީ ކުރައްވާ ފުރަތަމަ ދަތުރުފުޅަށް ވާއިރު، އޭޝިއާގެ ދެ ބާރުގެ މެދުގައި އަލުން ގުޅުން ބަދަހިކުރުމަށް އެޅުނު ފިޔަވަޅެއްކަމަށް އިންޑިއާއިން ބުނެއެވެ. ޚާއްސަކޮށް 2020 ވަނަ އަހަރު ބޯޑަރުގައި ހިނގި ހަމަނުޖެހުންތަކާއި ގުޅިގެން ފާއިތުވި އަހަރުތަކުގައި މިދެގައުމުގެ ގުޅުންތައް ގޯސްވެފައިވީ ނަމަވެސް ދާދި ފަހުން ދެ ފަރާތުން ވެސް ވަނީ ގުޅުން އަލުން ބިނާކުރަން ބޭނުންވާ ކަމުގެ އިޝާރާތެއް ކޮށްފައެވެ.

މި ސަމިޓުގައި މޯދީ ބައިވެރިވުމަކީ އެސްސީއޯގެ ތެރޭގައި އިންޑިއާގެ ދައުރު ހާމަކޮށްދޭ ކަމެއް ކަމަށާއި ސަރަހައްދީ ސަލާމަތާއި އިގްތިސާދީ އެއްބާރުލުމާއި ދެގައުމުގެ ގުޅުން ހަމައަކަށް އެޅުވުމަށް ކުރެވޭނެ މަސައްކަތްތަކާ ގުޅޭ ގޮތުން ޗައިނާއާއި މަޝްވަރާ ކުރުމުގެ ފުރުސަތު ލިބިގެންދާނެ ކަމަށް އިންޑިއާއިން ވަނީ ބުނެފައެވެ.