ލާމަރުކަޒީ ގާނޫނުގެ އިސްލާހުތަކާމެދު ވިސްނެވުމަށް ރައީސްގެ އަރިހުން ބޮޑުފޮޅުދޫ ކައުންސިލުގެ ރައީސް އެދިވަޑައިގެންފި

Loading

August 20, 2025
profile
Facebook
Twitter
WhatsApp

ލާމަރުކަޒީ ގާނޫނަށް ގެނެސްފައިވާ، އަދި ގެންނަ ބަދަލުތަކާމެދު އިތުރަށް ވިސްނެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހުން، އއ. ބޮޑުފޮޅުދޫ ކައުންސިލުގެ ރައީސް ޝުޖާޢު އާދަމް އެދިވަޑައިގެންފިއެވެ.

އޭނާ މިކަމަށް އެދިވަޑައިގެންފައިވަނީ، ރައީސް މުޢިއްޒު އއ. އަތޮޅަށް ކުރައްވާ ދަތުރުފުޅުގައި މިއަދު ހެނދުނު ބޮޑުފޮޅުދުއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާގައި ޝުކުރު ދެންނެވުމުގެ ގޮތުން ދެއްކެވި ވާހަކަފުޅުގައެވެ.

އޭނާ ވިދާޅުވީ، ކައުންސިލުގެ އިދާރީ އޮނިގަނޑު މިހާރުވެސް އޮންނަނީ ސިވިލް ސަރވިސް ކޮމިޝަނަށް ހުށަހަޅައިގެން އެތަނުގެ އެންޑޯޒްމަންޓް ލިބިގެން ކަމަށެވެ. 

ހަމަ އެއާއެކު، ދާއިމީ މަޤާމަކަށް ނުވަތަ ކޮންޓްރެކްޓް މަގާމަކަށްވެސް މުވައްޒަފުން ނެގެނީ އިދާރީ އޮނިގަނޑުގައި ހިމަނައިގެން، އަދި އެ އަހަރަކަށް ބަޖެޓުވެސް ކޮށްގެންކަން އޭނާ ފާހަގަކުރެއްވިއެވެ.

އޭނާ ވިދާޅުވީ، ކައުންސިލުގެ މަޤާމުތަކަށް މީހުން ނެގުމަށް ހުއްދަ ހޯދަން ސިޓީ ފޮނުވައިގެން ގިނަ ދުވަސްތަކެއް ވަންދެން ތިބެންޖެހުމުން ރައްޔިތުންނަށް ދޭންޖެހޭ ޚިދުމަތްތަކަށް ބުރޫއަރާނެ ކަމަށެވެ.

އެހެންކަމާއެކު، އަލަށް މި ގެންނެވި ބަދަލުތަކާމެދު ފުންކޮށް ވިސްނެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އޭނާ ވަނީ އާދޭހާއެކު ދަންނަވާފައެވެ.

މީގެ އިތުރުން، އަތޮޅު ކައުންސިލް އުވާލެއްވުމަށް ނިންމަވާފައިވާތީއާއި، ރަށު ކައުންސިލުގެ މެންބަރުންގެ އަދަދު ތިނަކަށް މަދުކުރެއްވުމަށް ނިންމަވާފައިވާތީ ޝުޖާޢު ވަނީ ކަންބޮޑުވުން ފާޅުކުރައްވާފައެވެ.

Loading

Leave a Reply

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.

ފަހުގެ އަޕްޑޭޓް