މަރާމާތަށްޓަކައި 18 އޯގަސްޓުން ފެށިގެން ބޮޑުތަކުރުފާނުމަގުގެ ވަކި ސަރަހައްދެއް އެއްގަމު އުޅަނދުފަހަރަށް ބަންދުކުރުމަށް ހަމަޖެހިފައިވާކަމަށް މާލޭ ސިޓީ ކައުންސިލުން ބުނެފިއެވެ.
ސިޓީ ކައުންސިލުން ނެރުނު އިޢުލާނެއްގައި ބުނެފައިވަނީ، އެ މަގު ރަނގަޅު ފެންވަރަކަށް ހެދުމަށްޓަކައި 18 އޯގަސްޓުވާ ހޯމަ ދުވަހުން ފެށިގެން 13 އޮކްޓޯބަރުވާ ހޯމަ ދުވަހުގެ ނިޔަލަށް، އެ މަގުގެ އެއްފަޅި ބަންދުކުރުމަށް ހަމަޖެހިފައިވާކަމަށެވެ.
މިގޮތުން، ބަންދުކުރުމަށް ހަމަޖެހިފައިވާ ސަރަހައްދަކީ މުޙައްމަދު އިސްމާޢީލް ދީދީ ގޯޅިން ފެށިގެން ރަސްމީ ފާލަމާ ހަމައަށް، ބޮޑުތަކުރުފާނުމަގުގެ އެއްފަޅިއެވެ. ބަންދުކޮށްފައި އޮންނަ ދުވަސްވަރު އެ ސަރަހައްދުގައި އެއްގަމު އުޅަނދުފަހަރު ދުއްވޭނީ ހަމައެކަނި އިރުން ހުޅަގަށެވެ.
އަދި ހަމަ މި ސަރަހައްދުގެ ފަޅުތެރެވެސް އެ ދުވަސްވަރު ބަންދުކުރުމަށް ވަނީ ހަމަޖެހިފައެވެ.
މީގެ އިތުރުން، ބާރުބޮޑުވާ ވަގުތުތަކުގައި، ހުސޭނީ ގޯޅިން ފެށިގެން ޗާނދަނީމަގާ ހަމައަށް، އަދި މުޙައްމަދު އިސްމާޢީލް ދީދީ މަގު ކަނޑިދޮންމަނިކު ގޯޅިން ފެށިގެން ބޮޑުތަކުރުފާނުމަގާ ހަމައަށް، ދުއްވާ އެއްޗެއްސަށް އެ މަގު ބަންދުކުރާނެ ކަމަށްވެސް ސިޓީ ކައުންސިލުން ބުނެފައިވެއެވެ.
