މާލޭގައި އުސްކޮށް ހަދާފައިހުރި ދުވަސްވީ އިމާރާތެއް ވެއްޓި، ބޮޑެތި ގެއްލުންތަކެއް ވެއްޖެއެވެ.
ބިލަބޮންގް ސްކޫލް ކުރިމަތީގައި ހުންނަ މި އިމާރާތަކީ ކުރިން އެޑިއުކޭޝަނަލް ޑިވެލޮޕްމަންޓް ސެންޓަރު ހިންގި އިމާރާތެވެ.
ހޮނިހިރު ދުވަހުގެ މެންދުރު 1.00ހާއިރު ހިނގި މި ހާދިސާގައި އިމާރާތުގެ މަތިން ފެށިގެން ތިރިއަށް، އިމާރާތުގެ އެއް ފަޅި ކަހަލަ ގޮތަކަށް ވެއްޓިފައިވާއިރު، އެ ސަރަހައްދުގައި ޕާކުކޮށްފައި ހުރި އުޅަނދުތަކަށް ވަނީ ބޮޑެތި ގެއްލުންތަކެއް ވެފައެވެ.
މި ހާދިސާ ތަޙުޤީޤުކުރަމުން ދާކަމަށް ފުލުހުން ބުނެފައިވާއިރު، އެ ސަރަހައްދުގައި ދިރިއުޅޭ ބައެއް މީހުން ބުނެފައިވަނީ، މިފަދަ ހާދިސާއެއް ހިނގާފާނެ ކަމަށް ބަލައި ކިތަންމެ ފަހަރެއްގެ މަތިން ކަމާބެހޭ އިދާރާތަކަށް ރިޕޯޓުކޮށްފައި ވާކަމަށެވެ.
ބާވެ ރެނދުލާފައި ހުރި މި އިމާރާތުގެ މައްސަލަ އެކި ފަހަރުމަތިން ރިޕޯޓުކުރިނަމަވެސް އެއްވެސް އިދާރާއަކުން އެކަމާ އަޅާލާފައި ނުވާކަމަށް އެ މީހުން ބުނެއެވެ.
މި އިމާރާތް ވެއްޓުމުގެ ސަބަބުން އެއްވެސް މީހަކަށް ޖިސްމާނީ އަނިޔާއެއް ވެފައި ނުވިނަމަވެސް، އެ ސަރަހައްދުގައި ޕާކުކޮށްފައި ހުރި، މީހުންގެ އަގުބޮޑު ސައިކަލާއި ކާރުފަދަ އުޅަނދުތައް ވަނީ ވަރަށް ބޮޑަށް ހަލާކުވެފައެވެ
