އަނބިމީހާ ނުވަތަ ފިރިމީހާއަށް ބިންވެރިޔާ ސްކީމުން ގޯތި ލިބިފައި ވީނަމަވެސް، ގެދޮރުވެރިޔާ ސްކީމުން ލިބިފައިވާ ފުލެޓެއް ނުގެއްލޭނެކަމަށް، އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފިއެވެ.
އެ ވުޒާރާއިން ބުނީ، މިގޮތަށް ބަދަލު ގެންނަން ނިންމާފައިވަނީ، ފުލެޓު ލިބޭނީ ގޯތި ދޫކޮށްލުމުންކަމަށް ބުނެ ވުޒާރާއިން އާންމުކުރި އުސޫލާމެދު އާއްމުން ކަންބޮޑުވުން ފާޅުކުރަމުންދާތީ ކަމަށެވެ.
ކުރީގެ އުސޫލުގައި ވާގޮތުން، ގެދޮރުވެރިޔާ ސްކީމުން ފުލެޓު ލިބޭނީ، ބިންވެރިޔާ ސްކީމުން އެމީހެއްގެ އަނބިމީހާ ނުވަތަ ފިރިމީހާއަށް ލިބިފައިވާ ގޯތި ދޫކޮށްލަން އެއްބަސްވާނަމައެވެ.
އެ ވުޒާރާއިން ބުނީ، ބިންވެރިޔާ ސްކީމުގެދަށުން މާލޭ ސަރަހައްދުން ބިން ދޫކުރުމަށް ހަމަޖެހިފައިވާ ހުޅުމާލޭ ތިންވަނަ ފިޔަވައްސާއި ގިރާވަރުފަޅު ހިއްކުމުގެ މަސައްކަތް ކުރިއަށްދާތީއާއި، އަދި ހިއްކާފައިވާ ބިންތަކުގައި އިމާރާތްކޮށް ދިރިއުޅެން ފެށުމަށް ވަގުތުނަގާނެތީ، އުސޫލަށް ފަހުން ގެނައި ބަދަލަށް ޢަމަލުނުކުރުމަށް ނިންމާފައިވާކަމަށެވެ.
އެހެންކަމުން، 15 ނޮވެމްބަރު 2023ގައި އިޢުލާންކުރި ލިސްޓުގެ ގުރުއަތު ނަގާފައިވާ މީހުންގެ ތެރޭން، ވުޒާރާއިން ފަހުން ބަދަލު ގެނައި އުސޫލާ ގުޅިގެން އެއްވެސް މީހެއްގެ ޝަރުތު ހަމަނުވާކަމުގެ ލިޔުން ފޮނުވާފައި ނުވާނެކަމަށް އެ ވުޒާރާއިން ބުނެފައިވެއެވެ.
