ދުންފަތުގެ އިސްތިޢުމާލުކުރުން ހުއްޓައިލާ ރަށްރަށުގެ ކޮންމެ ރައްޔިތެއްގެ ބެންކު އެކައުންޓަށް އެލަވަންސެއް ޖަމާކުރުމާމެދު ދިރާސާއެއް ހެދުމަށް އަންގަވާފައި ވާނެކަމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނުގެ ފޭސްބުކް ޕޭޖުގައި މިއަދު ކުރެއްވި ޕޯސްޓެއްގައި ވިދާޅުވެފައިވަނީ، މި ހަފުތާގައި ބޭއްވެވި ވަޒީރުންގެ މަޖިލީހުގެ ޖަލްސާގައި ކަމާގުޅޭ ވަޒީރުންނަށް މިކަން ހުށަހަޅުއްވާފައި ވާނެކަމަށެވެ.
އެގޮތުން، އެކަމާ ގުޅޭގޮތުން ދިރާސާއެއް ހައްދަވައި، ކަމާގުޅޭ ކަރުދާހެއް ތައްޔާރުކުރެއްވުމަށް އަންގަވާފައި ވާނެކަމަށް ރައީސް ވަނީ ވިދާޅުވެފައެވެ.
ރައްޔިތުން ދުންފަތާ ދުރުކުރުމުގެ ގޮތުން އެކި ސަރުކާރުތަކުން ވަނީ އެކި ކަހަލަ ފިޔަވަޅުތައް އަޅުއްވައިފައެވެ. އެގޮތުން މީހުން ހޭލުންތެރި ކުރެއްވުމުގެ ޕްރޮގްރާމްތައް ހިންގެވުމާއި، ދުުންފަތުގެ އިސްތިޢުމާލުކުރުން ހުއްޓައިލާ ރަށްރަށަށާއި ރައްޔިތުންނަށް އިނާމު ދެއްވުމާއި، އާންމު ތަންތަނުގައި ދުންފަތުގެ އިސްތިޢުމާލުކުރާ މީހުން ޖޫރިމަނާކުރުމާއި، އަދި މީގެ އިތުރުން ދުންފަތުން ނަގާ ޑިއުޓީ ބޮޑުކުރެއްވުންވެސް ހިމެނެއެވެ.
