މާލޭގައި ބިދޭސީއެއްގެ އަތުން 30،000 އަށްވުރެ ގިނަ ފައިސާ ފޭރިގަތް ދެ މީހުންގެ ބަންދަށް 10 ދުވަސް ޖަހައިފިއެވެ.

ފުލުހުން ބުނީ ގުލާބީ ގޯޅީގައި ދެ މީހަކު ވެގެން ބިދޭސީއެއްގެ އަތުން ފޭރުނު މައްސަލަ ރިޕޯޓު ކޮށްފައިވަނީ ރޭ ދަންވަރު 2:12 ހާއިރު ކަމަށެވެ.

އެ ބިދޭސީ މީހާގެ އަތުން އެ ދެ މީހުން 33،500ރ. ފޭރުނު ކަމަށް ފުލުހުން ބުނެފައިވެއެވެ.

މި މައްސަލާގައި ހައްޔަރުކޮށްފައިވާ މީހުންގެ ވަނަވަރު ފުލުހުން މިހާރު ވަނީ އާންމުކޮށްފައެވެ. އެ މައްސަލައާއި ގުޅިގެން ހައްޔަރު ކޮށްފައި ވަނީ ހ. ރެދަން، ފަވާޒް ކަޅުތުއްތު (36އ)، އާއި ތ. ތިމަރަފުށި، ލަކީ ހައުސް، ސޮފްވާން އަލީ (36އ) އެވެ.

މި ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ވަނީ 10 ދުވަސް އިތުރުކޮށްފައެވެ. ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.