ރާއްޖެ އެތެރެކޮށް ބޭނުން ކުރަމުންގެންދާ ބޭސްތަކަކީ ފެންވަރު ރަނގަޅު ރައްކާތެރި ބޭސްކަން ކަށަވަރު ކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީން ކުރަމުން އަންނަ މަސައްކަތަކީ މެދު ނުކެނޑި ކުރަމުން އަންނަ މަސައްކަތެއްކަން ހާމަކޮށް އެ އޮތޯރިޓީން ބުނީ ތަދުކެނޑުވުމަށް ބޭނުންކުރާ ދެ ބޭހެއް ކަމުގައިވާ މެފްނަކް އެސިޑާއި އެކްސެލް މެފެނަމިކް އެސިޑް ބޭނުން ކުރުމާއި އެެތެރެކުރުން އެ އޮތޯރިޓީން މަނާކޮށްފައިވާ ކަމަށެވެ.

އެމްއެފްއޭޑީން މިއަދު ނެރުނު ބަޔާނެއްގައި ބުނީ ރާއްޖޭގެ މާކެޓުގައި ލިބެން ހުންނަ ބޭހަކީ ފެންވަރު ރަނގަޅު، ރައްކާތެރި ބޭސްކަން ކަށަވަރު ކުރުމަށްޓަކައި އެއޮތޯރިޓީން ގިނަގުނަ މަސައްކަތްތަކެއް ކުރަމުން ގެންދާ ކަމަށެވެ. އެހެންކަމުން މާކެޓުން ބޭހުގެ ސާމްޕަލް ނަގާ ސްކްރީން ކުރުމުގެ މަސައްކަތްވެސް މެދުކެނޑުމެއްނެތި ކުރަމުން ގެންދާ ކަމަށެވެ.

އެގޮތުން ރާއްޖޭގެ މާކެޓުން ނަގާ ސްކްރީން ކުރި، ތަދުކެނޑުވުމަށް ބޭނުންކުރާ 2 ބޭސް ކަމުގައިވާ މެފްނަކް އެސިޑާއި އެކްސެލް މެފެނަމިކް އެސިޑް، ނުރައްކާތެރި ކެމިކަލްގެ މާއްދާއެއް ކަމަށްވާ ޑައިއީތަލިން ގްލައިކޯލް (ޑީއީޖީ) އަދި އިތައިލީން ގްލައިކޯން (އީޖީ) އަށް ޕޮސިޓިވް ވެފައި ކަމަށް އެ އޮތޯރިޓީން ހާމަކުރެއެވެ.

މިގޮތުން އެ އޮޓޯރިޓީގެ ފަރާތުުން މި 2 ބޭހުގެ ކޮންފަރމޭޓްރީ ޓެސްޓު ހެދުމަށްޓަކައި ރާއްޖޭން ބޭރަށް ފޮނުވުމުގެ މަސައްކަތް ކުރަމުންދާ ކަމަށްވެސް ބުނެފައި ވެއެވެ.

ވީމާ މި މައްސަލަ އެ އޮތޯރިޓީއިން ބެލުމަށްފަހު ވަކި ގޮތެއް އަންގަންދެން މި ދެ ބޭސް ރާއްޖެ އެތެރެ ކުރުމާއި، ވިއްކުމާއި، އަދި ބޭނުން ކުރުން މަނާ ކޮށްފައިވާ ކަމަށާއި މިވަގުތު ބޭސް ފިހާރަތަކާއި ބޭސް ގުދަން ތަކުގައި ހުރި މި ދެ ބޭސް ވަކިކޮށް ބެހެއްޓުމަށްވެސް ވަނީ އަންގާފައެވެ.