ބަލި އެނދުގައި ތިބޭ ބަލިމީހުންނަށް އެއްވެސް ސިފައެއްގައި އަނިޔާކުރުމަކީ ތަހްޒީބު މުޖުތަމާއެއްގައި ބަލާގަންނާނެ ކަމެއް ނޫނެވެ. އެހެންނަމަވެސް ޑޮކްޓަރުންގެ ތެރޭގައިވެސް މީހުން މެރުމުން އުފާ ލިބިގަންނަ ބަޔަކު އުޅޭކަން ދޭތެރޭ ދޭތެރޭން ފަޅާ އަރަމުން ދެއެވެ. އެފަދަ ބައެއް ހާދިސާތައް އެއީ ޕްރޮފެޝަނަލް އެރަރ އެއްގެ ގޮތުގައި ބަލަމުން ގެންދާތަންވެސް ފެނެއެވެ.

ސަންދާނުގެ ކިއުންތެރިންނަށް މި ގެނެސްދެނީ އެން ބި ސީ ނިއުސް ޑޮޓް ކޮމް އިން މިއަދު ހެނދުނު ގެނެސްދީފައިވާ ޚަބަރެކެވެ.  އެ ޚަބަރުގައި ބުނެފައިވަނީ އެމެރިކާގެ ޓެކްސަސްގެ ހޮސްޕިޓަލެއްގައި މަސައްކަތްކުރާ ހޭނައްތާ ޑޮކްޓަރަކު އެ ހޮސްޕިޓަލްގައި އެޑްމިޓް ކޮށްފައިތިބި ބަލިމީހުންތަކަކަށް ގުޅާފައިހުރި އައި ވީ އަށް ތަފާތު ޑްރަގް އިންޖެކްޓް ކުރި މައްސަލާގައި ކުށް ސާބިތުވުމުން 190 އަހަރަށް ފެޑެރަލް ޖަލަށް ލުމަށް ހުކުމް ކޮށްފި ކަމަށެވެ.

ޑޮކްޓަރ ރޭނާލްޑޯ ރިވޭރާ އޯރޓިޒް ( ޖޫނިއަރ ) ފަސް ފަހަރެއްގެ މަތިން އެގޮތަށް ކަންތައް ކޮށްފައިވާ ކަމާއި އޭގެތެރެއިން އެކަކު މަރުވެ އަނެއް 4 މީހުންގެ ހަށިގަނޑަށް ބޮޑެތި ޒަޚަމްތަކެއް ލިބިފައިވާކަމަށް ކޯޓުގެ ހުކުމްގައި ބުނެފައި ވެއެވެ. އެ މައްސަލަ ސިފަކުރަމުން ދައުލަތުގެ ފަރާތުން ޓެކްސަސްގެ އެޓޯރނީ  ލެއިގާ ސައިމަންޓަން ކޯޓުގައި ބުނެފައި ވަނީ މިއީ އޮޓޯމެޓިކް ބަޑިއެއް ހިފައިގެން ހުރި މީހަކު މީހުންތަކެއް އެއްވެފާ އޮތްތަނަކަށްގޮސް ތަނެއްދޮރެއް ނުބަލާ މީހުން ގަޔަށް ބަޑިޖެހުން ކަހަލަ ކަމެއް ކަމަށެވެ. މައްސަލައިގެ ވީޑިއޯ ހެކިތައްވެސް ވަނީ ކޯޓަށް ހުށައަޅާފައެވެ. 

އެ މައްސަލައިގާ މިދިޔަ ބުދަ ދުވަހު ފެޑެރަލް ކޯޓުން ހުކުމް ކޮށްފައިވަނީ އޯރޓިޒް ކޮށްފައިވާ ކުށުގެ އަމަލުތަކަށް ޖުމުލަ 2280 މަސްދުވަހަށް ފެޑެރަލް ޖަލަށް ލުމަށާއި އަދި އެ ހުރިހާ ކުށެއްގެ ޖަލު ހުކުމުގެ މުއްދަތު އެކުގައި ގުނެމުންދާނެ ކަމަށެވެ. 

ޑޮކްޓަރ ރޭނާލްޑޯ އޯރޓިޒްގެ ވަކީލުން އެ ހުކުމް ގަބޫލު ނުކުރާ ކަމަށްބުނެ އިސްތިއުނާފަށް ދާން ގަސްދުކުރާކަން ވަނީ ހާމަކޮށްފައެވެ. 

ޑޮކްޓަރ އޯޓިޒްގެ  މި ނުރައްކާތެރި އަމަލުގެ ސަބަބުން މަރުވި ކަމަށް ބެލެވޭ އެ ހޮސްޕިޓަލްގެ އެހެން ހޭނައްތާ ޑޮކްޓަރަކު ( ޑޮކްޓަރ މެލަނިކް ކެސްޕަރ ) ބަލިވެގެން އެޑްމިޓްކުރުމުން ގުޅި އައި ވީ ފުޅިވެސް ހުރީ ގަޑުބަޑުކޮށްފައެވެ. ނަތީޖާއެއްގެ ގޮތުން ކުޑައިރުކޮޅެއްގެ ތެރޭގައި އޭނާ ވަނީމަރުވެފައެވެ. އެހެންނަމަވެސް ކޯޓުގެ ހުކުމްގައި އޭނާ މަރުވުން ޑޮކްޓަރ ރޭނާލްޑޯ އޯރޓިޒް އަށް ނިސްބަތް ކޮށްފައެއް ނުވެއެވެ. ކޯޓުގެ ހުކުމްގައި އެ ހާދިސާ ސިފަކޮށްފައި ވަނީ  ޑޮކްޓަރ އޯރޓިޒް މީހަކު މަރުވެދާފަދަ އަމަލެއް ހިންގި ކަމަށެވެ.

އެންމެ ފުރަތަމަ އެ ހޮސްޕިޓަލްގެ ޑޮކްޓަރުންނަށް އައި ވީ ޕެކެޓްތަކުގައި މައްސަލައެއް އުޅޭކަމަށް ޝައްކު ކުރެވުނީ 2022 ވަނަ އަހަރު މޭ މަހާއި އޯގަސްޓް މަހާ ދޭތެރޭގައި ގިނަ ބަލިމީހުންތަކަކަށް ހިތުގެ މައްސަލަތަކެއް ދިމާވާން ފެށުމުންނެވެ. އެންމެ ފުރަތަމަ ދިމާވި ހާދިސާއަކީ އުމުރުން 18 އަހަރުގެ ޒުވާނަކު ސައިނަސް އޮޕަރޭޝަނެއް ކުރުމުގެ ތެރޭގައި މާބޮޑަށް ހާލު ދެރަވީއެވެ. އެ ހާދިސާގައި އައި ވީ ފުޅިވެސް ތަހްލީލު ކުރުމުން ކޮކްޓެއިލް ޑްރަގް އެއަށް އިންޖެކްޓް ކޮށްފައިވާކަން އެނގިގެން ދިޔައެވެ. އެހެންނަމަވެސް ވަކި މީހަކަށް އިނގިލި ދިމާ ކުރެވޭވަރުގެ ހެއްކެއް އެ ފަހަރު ނުލިބުނެވެ.