ބޭރު ފައިސާ މާރުކުރުމަށް އެމްއެމްއޭއިން މިހާރު އެކުލަވާލާފައިވާ ގަވައިދަށް އަމަލުކުރުން ވަގުތުން ވަގުތަށް ހުއްޓާލުމަށް ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) ސަރުކާރަށް ގޮވާލައްވައިފިއެވެ.

އުއްޗު މިގޮތަށް އެދިފައި ވަނީ މޯލްޑިވްސް މަނިޓަރީ އޮތޯރިޓީ(އެމްއެމްއޭ) އަށް ފޮނުވި ސިޓީއެއްްގައެވެ.

އެމްއެމްއޭ އަށް ފޮނުވި ސިޓީގައި އުއްޗު ވަނީ ރިސޯޓުތަކަށް އަންނަ ފަތުރުވެރިއެއްގެ ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކްތަކުން ޑޮލަރު މާރުކުރުމަކީ ވިޔަފާރިތަކަށް ބޮޑު ގެއްލުމަކާ ކުރިމަތިވެދާނެ ކަމެއްކަން ފާހަގަކޮށްފައެވެ.

ހަމައެހެންމެ ފަތުރުވެރިކަމުގެ ދާއިރާގެ ވިޔަފާރިތަކަށް ހާއްސަކޮށްގެން މިފަދަ ފިޔަވަޅެއް އެޅުމަކީ ބޭ އިންސާފު ކަމެއް ކަމަށާއި ގަވާއިދުގައި ޓޫރިސްޓުން ރިސޯޓުގައި ހޭދަކުރާ މުއްދަތަށް ބަލާފައި ނެތުމާއި ރިސޯޓުތަކުގެ ފެންވަރަށް ބެލުމެއް ނެތި ހުރިހާ ރިސޯޓަކަށް އެއް ރޭޓެއް ކަނޑައަޅާފައި އޮތުމާއި ހުރިހާ ރިސޯޓަކުން އެގޮތަށް އަމަލުކުރަން ޖެހުމަކީ ވެސް ގަބޫލު ނުކުރެވޭ ކަމެއް ކަމަށް ވަނީ ފާހަގަކޮށްފައެވެ.  

އެހެންކަމުން އެ ގެއްލުން ކުޑަކުރަން ރިސޯޓުތަކަށް އަޅަންޖެހޭނެ ފިޔަވަޅުތަކުގެ ގޮތުގައި އޭނާ ފާހަގަކޮށްފައިވާ ގޮތުން މުވައްޒަފުންނަށް ދޭ ބައެއް އިނާޔަތްތައް ކުޑަކުރުމާއި އެކަމުގެ ސަބަބުން އޭގެ ނޭދެވޭ އަސަރުތައް މުޅި އިގްތިސާދަށް ކުރާނެ ކަމަށްވަނީ ފާހަގަކޮށްފައެވެ. އަދި ދިގު ދިގު މުއްދަތެއްގައި ޓޫރިޒަމް ސިނާއަތުގައި އިންވެސްޓްކޮށްގެން ތިބި ފަރާތްތަކަށް ލިބޭ ފައިދާ ދަށްވެ، އިންވެސްޓަރުންގެ އިތުބާރު މިކަމުގެ ސަބަބުން ރާއްޖޭގެ ޓޫރިޒަމް ދާއިރާއަށް ގެއްލިގެން ދާނެ ކަމަށްވެސް އުއްޗު ވަނީ ފާހަގަކޮށްފައެވެ.

މީގެ އިތުރުން މި ގަވާއިދަކީ ދިވެހި ސަރުކާރުގެ ދަރަނީގެ މައްސަލަ ހައްލުކުރުމަށް ވަގުތީ ގޮތުން ހޯދި ހައްލެއް ކަމަށާއި މިކަމުގެ ސަބަބުން ދިގު މުއްދަތެއްގައި ރާއްޖޭގެ އިގްތިސާދަށް ވަރަށް ބޮޑެތި ނޭދެވޭ އަސަރުތަކެއް ކުރާނެ ކަމަށްވެސް އެ ސިޓީގައި ހާމަކޮށްފައި ވެއެވެ.

ސަރުކާރަށް ބޭނުންވާ މުހިއްމު ކަންކަމުގައި އަބަދުވެސް އެހީތެރިވާނެކަން ފާހަގަކޮށް އުއްޗުގެ ސިޓީގައިވާ ކަންކަމަށް ރިއާޔަތްކޮށް، އެ ގަވައިދަށް އަމަލުކުރުން މިހާރުން މިހާރަށް ހުއްޓާލުމަށް ވަނީ އެދިފައެވެ.