ދިވެހިރާއްޖޭގެ ގައުމީ ތަރައްގީގެ 20 އަަހަރުގެ މާސްޓަރ ޕްލޭންގެ މަޝްވަރާ ބައްދަލުވުން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އިފުތިތާހުކޮށްދެއްވައިފިއެވެ.

ގައުމީ ތަރައްގީގެ 20 އަަހަރުގެ މާސްޓަރ ޕްލޭންގެ މަޝްވަރާތައް އިފުތިތާހުކޮށްދެއްވީ އެކަމަށްޓަކައި މިއަދު ހެނދުނު ބޭއްވި ރަސްމިއްޔާތެއްގައެެވެ.

މި ރަސްމިއްޔާތުގައި ވާހަަކަފުޅު ދައްކަވަމުން ރައީސް ޑޮކްޓަރު މުޢިއްޒު ވަނީ ސިޔާސީ ފިކުރު އެއްކިބާކޮށް، ގައުމަށާއި އަދި އަންނަން އޮތް ޖީލުތަކަށް ފައިދާވާނޭ ގޮތަށް މި ޕްލޭން ރާވާ، ތަންފީޒުކުރުމުގައި އެންމެހާ ރައްޔިތުންގެ އެއްބާރުލެއްވުމަށް އެދިވަޑައިގެންފައެވެ.

މި ޕްލޭން ރާވާ، ފުރިހަމައަށް ތަންފީޒުކުރެވިއްޖެނަމަ، ރާއްޖެއަކީ 2040 ވަނަ އަހަރުގެ ކުރިން، ފުރިހަމައަށް ތަރައްގީވެފައިވާ ޤައުމެއްގެ ގޮތުގައި ގިންތިކުރެވިގެންދާނޭ ކަމަށް ވެސް ރައީސް ވިދާޅުވިއެވެ.

މީގެއިތުރުން ރައީސް ވިދާޅުވީ ގައުމުގެ ތަރައްގީގެ ޕްލޭންގެ މަަސައްކަތަކީ ވަރަށް ވަރަށް މުހިންމު ކަމެއްދީގެން ކުރަންޖެހޭ ކަމެއް ކަމަށެވެ. ސިޔާސީ އޮއިވަރުގައި ޖެހިގެން އެއިރެއްގައި އޮންނަ ސަރުކާރެއްގެ ވިސްނުމާ އެއްގޮތަށް އަބަދު އަބަދު ބަދަލުތަކެއް އަންނަ ގޮތަށް ގައުމުގެ ތަރައްގީގެ ކަންކަން ގެންދަންވެއްޖެނަމަ، ރައްޔިތުންނަށް އެންމެ ހެޔޮ ގޮތެއް ނުލިބޭނެ ކަމަށާއި، އޭގެ ބަދަލުގައި ރައްޔިތުން ކަނޑައަޅާފައި އޮންނަ މަގަކުން ދާން ބޭނުންވާ މިސްރާބަށް ދެވޭ ގޮތަށް ކަންކަން ބައްޓަންވެއްޖެނަމަ އެންމެ ފުރިހަމަ ގޮތުގައި ރައްޔިތުންނަށް ފައިދާވާނެކަމަށް ވިދާޅުވިއެވެ.

މި ރަސްމިއްޔާތުގައި ހައުސިންގ މިނިސްޓަރު ޑރ. ޢަލީ ހައިދަރު ވިދާޅުވީ މި ޕްލޭން އެކުލަވާލުމުގެ މަސައްކަތުގައި ކަމާބެހޭ ހުރިހާ ފަރާތްތަކާއި، ރައްޔިތުންގެ ބައިވެރިވުމާއި ޚިޔާލާއި، މަޝްވަރާ ވީހާވެސް ފުޅާދާއިރާއެއްގައި ހޯދުމަށް ހަމަޖެހިފައިވާ ކަމަށެވެ. އަދި މި ޕްލޭނަށް ގާނޫނީ ބާރުވެރިކަން ގެނެސްދޭނެ ގައުމީ ތަރައްގީގެ ގާނޫނުގެ ބިލެއް މި މަސައްކަތުގެ ތެރޭގައި އެކުލަވައިލެވި ރައްޔިތުންގެ މަޖިލީހަށް ހުށަހެޅޭނެ ކަމަށް ވެސް މިނިސްޓަރު ވިދާޅުވިއެވެ.

މި ޕްލޭން ދެމެހެއްޓެނިވި ގޮތެއްގައި ތަންފީޒުކުރުމަށް ބޭނުންވާ އިތުރު ބާރުވެރިކަން ގެނައުމަށްޓަކައި، ގާނޫނު އަސާސީއަށް މާއްދާއެއް އިތުރުކުރުމަށް ނިންމާފައިވާ ކަމަށް ވެސް ވިދާޅުވިއެވެ.