އެމެރިކާގެ ރިޔާސަތަށް ޓްރަމްޕް ނޫނީ ކަމަލާ ހަރިސް އިންތިޚާބު ކުރެވުނުކަމުގައި ވިޔަސް އިސްލާމީ ދުނިޔޭގެ އާންމެ މަސްލަހަތު ގާއިމުކުރުމަށްޓަކައި ދައްކާނީ ހަމައެކަނި ވާހަކައެވެ. އަމަލު ކުރަމުން ގޮސްފައިވަނީ ދިމާ އިދިކޮޅަށެވެ. ވޯޓު ހޯދަން ޚަރަދުކުރި މީހުން ރުއްސުމަށް އިސްކަން ދިނުމަކީ އެމެރިކާއިން އެކަނި ކުރާ ކަމެއްވެސް ނޫނެވެ. އިންތިޚާބުވުމަށްފަހު ދެން ބަލަން ޖެހެނީ 2 ވަނަ ދައުރެއް ނުވަތަ ތިން ހަތަރުވަނަ ދައުރެއްވެސް ކަށަވަރުކުރުމުގެ މަގުތައް ހުޅުވުމަށެވެ.
އަނެއްކާވެސް ވެއްޓެންޖެހެނީ ވޯޓު ހޯދައިދޭން ފުރުސަތު ލިބިފައި ތިބޭ މަހުޖަނުންގެ ފައިބުޑަށެވެ. އެމެރިކާގައި އިންތިޚާބެއް ކާމިޔާބު ކުރެވޭނީ އެ ގައުމުގެ ޔަހޫދީންގެ ރުހުން ލިބިގެންނެވެ.
2024 ވަނަ އަހަރުގެ ރިޔާސީ އިންތިޚާބު އެއްދުވަހަށް ވެފައިވާއިރު އެންމެ ފަހުގެ ނަތީޖާތަކުން ދައްކަނީ ކުރީގެ ރައީސް ޓްރަމްޕްއާއި މިހާރުގެ ނައިބު ރައީސާ ކަމަލާ ހަރިސްގެ ތަފާތު ވަރަށް ކުޑަކަމަށެވެ.
ސިލްވަރ ބުލެޓިން އާއި ފައިވް ތާރޓީ އެއިޓް އަދި ނިއު ޔޯރކް ޓައިމްސް އިން ހާމަކޮށްފައިވާ ގޮތުގައި ބައެއް ސަރަހައްދު ތަކުގައި ކަމަލާހަރިސް އުޅެނީ ކުޑަ ތަންކޮޅެއް ކުރީގައެވެ.
ޔާހޫ ނިއުސް އާއި ޔޫގަވް ޕޯލުން ދައްކަނީ ދެ ކެންޑިޑޭޓުން އެއްވަރު ކަމަށެވެ. ސްވިންގް ސްޓޭޓް ޕޯލް ގައި ސިލްވަރ ބްލެޓިނުން ދައްކަނީ ބައެއް ސަރަހައްދު ތަކުގައި ޓްރަމްޕް ކުޑަ ތަންކޮޅެއް ކުރީގައި އުޅުއްވާ ކަމަށެވެ.
ފައިވް ތާރޓީ އެއިޓުން ދައްކާ ގޮތުގައި ނޭވާޑާ އަދި އެރިޒޯނާއާއި ޕެންސިލްވާނިޔާއާއި ނޯތު ކެރޮލީނާއާއި ޖޯރޖިއާގައި ޓްރަމްމްޕް އުޅުއްވަނީ ތަންކޮޅެއް ކުރީގައެވެ. އެހެންނަމަވެސް ވިސްކޯސިން އާއި މިޝިގަންގައި ހަރިސް އުޅުއްވަނީ ކުރީގައެވެ.
އެންމެ ފަހުގެ ޚަބަރުތަކުން އެނގިފައިވަނީ ރިޔާސީ އިންތިޚާބުގެ ވޯޓުލުން ހުޅުވާލުމާއެކު ވަރަށްގިނަ ބަޔަކު ވޯޓުލާން ފަށައިފިއެވެ. އަދި ނެވާޑާ ފަދަ ބައެއް ސަރަހައްދުތަކުގައި ވޯޓުލުން މިހާރުވަނީ ނިންމާލާފައެވެ.
އެމެރިކާގެ ރިޔާސީ އިންތިޚާބުގެ ވޯޓުލުން މިއަދު ނިމުނު ކަމުގައިވިޔަސް އެންމެ ފަހުގެ ނަތީޖާ ލިބުމަށް އަދި ދުވަސް ނަގާނެކަމަށް ވެއެވެ.
