އުތުރު އަޔަރލޭންޑުގެ އިނގިރޭސި ނަސްލުގެ ރައްޔިތުންގެ އާބާދީ ގިނަ ޝަހަރުތަކުގައި އުފެދިފައިވާ މަޒްހަބީ ތަފާތު ފާއިތުވެގެން މިދާ ދުވަސްތަކުގެ ތެރޭގައި ބިރުވެރި ހާލަތަށް ބަދަލުވެ އެކަމުގެ ނުރައްކާތެރިކަން އެ ޝަހަރު ތަކުގައި ދިރިއުޅޭ ބައިމަދު މުސްލިމުންގެ އާބާދީންވެސް ކުރިމަތި ލާން ޖެހިއްޖެ ކަމަށް އިއްޔެ އެސޯޝިއޭޓެޑް ޕްރެސްގެ ޚަބަރުގައި ބުނެފައި ވެއެވެ. 

އުތުރު އަޔަރލޭންޑުގައި އުފެދިފައިވާ މަޒްހަބީ ދެކޮޅުވެރިކަމަކީ ޒަމާންތަކަށް ދެމިގެންދާ ދެކޮޅުވެރި ކަމެކެވެ. 1998 ވަނަ އަހަރު ކޮންމެވެސް ވަރަކަށް ހަމަޖެހުމެއް ލިބިގެންދިޔަ ކަމުގައިވިޔަސް އިނގިރޭސިންނަށް ތާއީދުކުރާ ޕްރޮޓެސްޓުންނާއި އައިރިޝް ފިކުރުގެ ކެތޮލިކުންގެ މި ރުޅިވެރިކަން ހިތުތެރޭގައި އޮތީ ބިންވަޅުނެގި ފުރުސަތަކަށް ބަލަބަލައެވެ. އުތުރު އަޔަރލޭންޑް މިހާރުވެސް އޮންނަނީ އިނގިރޭސި ވިލާތުގެ ބައެއްގެ ގޮތުގައެވެ. އަދި އެގޮތުގައި ދެމިއޮތުމަށް ޕްރޮޓެސްޓުން ތާއީދުކުރަމުން ގެންދާއިރު އައިރިޝް ފިކުރު ކެތޮލިކުން ބޭނުންވަނީ ދެކުނު އަޔަރލޭންޑް ( އިނގިރޭސީންގެ ބާރުގެ ދަށުން ވަކިވުމަށްޓަކައި އެތައް އަހަރަކު ހަނގުރާމަ ކުރުމަށްފަހު ރިޕަބްލިކް އޮފް އަޔަރލޭންޑް ގެ ނަމުގައި މިނިވަން ދައުލަތެއް ލިބުނު ފަދައިން ) މިނިވަން ދައުލަތެއް އުފެއްދުމަށެވެ. އެކަމަށް ހުރަސް އަޅަނީ އިނގިރޭސި ފިކުރުގެ ޕްރޮޓެސްޓުންނެވެ. ނަސާރާ މަޒްހަބުގެ މި 2 ފެކްޝަންގެ ރުޅިވެރިކަމުގެ މައިގަނޑު ސަބަބަކީ މިއީ ކަމުގައި ބެލެވެއެވެ. 

ނަސާރާއިންގެ މަޒްހަބީ ދެބަސްވުންތަކުގައި ތަންތަން ރޯކުރަމުން ގެންދާއިރު ތަނެއް ދޮރެއް ނުބަލައެވެ. އެއީ ނަސާރާ މަޒަހަބުގެ މީހެއްގެ މިލްކެއްތޯ  ނޫންތޯވެސް ބަލާކަށް ބޭނުމެއް ނުވެއެވެ. ހަމައެކަނި މަގްސަދަކަށް ވެފައިއޮތީ އެ ޝަހަރުތަކުގައި ދިރިއުޅޭ މީހުންގެ ހިތްތަކަށް ބިރުވެރިކަން ވެއްދުމެވެ.

ބެލްފާސްޓުގައި ދިރިއުޅޭ ބަޝީރު ގެ ސުޕަރމާރކެޓްގައި ރޯކޮށްލައި އަޅިއަށް ހަދާލާފައިވާ ކަމަށާއި އަދި އެ ޝަހަރުގެ މިސްކިތެއްގައިވެސް ވެސް ރޯކޮށްލާފައިވާ ކަމަށް އޭ އެފް ޕީ އަށް އޭނާ ކިޔާދިނެވެ. މިހާރު ކުރިޔަށްދާ ދެކޮޅުވެރިކަމުގެ ކުރިތައް ފަޅައިގެންދާއިރު މުސްލިމުންނަށްވެސް ރައްކާރެތިކަމެއް ނުލިބޭނެކަމަށް ބެލެވެއެވެ. ބޭރުގެ ގައުމުތަކުން އުތުރު އަޔަރލޭންޑަށް ހިޖުރަ ކޮށްފައިތިބި މީހުންގެ ގެދޮރާއި މުދަލަށް ގެއްލުން ދިނުމުގެ ބޭނުމަކީ އެމީހުންގެ ތާއީދު ވަކި ފަރާތަކަށް ލެނބިގެން ހިގަނއިދާނެތީ ބިރުވެރިކަން އުފެއްދުންކަމަށް ލަފާކުރެވެއެވެ.

ބަޝީރުގެ ސުޕަރމާރކެޓް އަލުން ހުޅުވުމުގެ ވިސްނުން ގެންގުޅޭތޯ އޭ އެފް ޕީ އިން ސުވާލުކުރުމުން ޖަވާބުގައި ބުނެފައިވަނީ މިހާރު އުފެދިގެން މިއުޅޭ ރުޅިވެކަން ކުރިއަށްދާގޮތުން މާދަމާ ދިރި ދުނިޔޭގައި ހުރެވިދާނެކަމަށްވެސް އުންމީދެއް ނެތް ކަމަށެވެ. 

މިހާރުވެސް ފެންނަމުން އެ ދަނީ މުސްލިމިން ވިޔަފާރި ކުރާތަންތަނަށް ތަފާތު ގެއްލުންތައް ދެމުންގެންދާތަނެވެ. މިދިޔަ ހޮނިހިރު ދުވަހު ސޭންޑީ ރޯވް ސަރަހައްދުގައި ހުރި ތުރުކީ އަށް ނިސްބަތްކުރެވޭ މީހެއްގެ ވިޔަފާރި އެއޮތީ ފުނޑުއަރުވާލަފައެވެ. 

މެދުއިރުމަތީގެ ގިނަބަޔަކު ޒިޔާރަތްކުރަމުންގެންދާ ސަހާރާ ޝިސްތާ ކެފޭ ގެ ކުރިމަތީގައި އިށީންދެލައިގެން އިނދެ 64 އަހަރުގެ ތުރުކީގެ ޝެފް ޔިލްމަޒް ބާތޫ އެސޯޝިއޭޓެޑް ޕްރެސްއަށް ކިޔާދީފައިވާގޮތުގައި އުތުރު އަޔަރލޭންޑުގައި މީގެކުރިން މުސްލިމުންނަށް މިގޮތަށް ދިމާކޮށްފައެއް ނުވެއެވެ. 

ނަސާރާއިންގެ ތެރޭގައި އުފެދިފައިވާ ދެކޮޅުވެރިކަމުގެ ތެރެއަށް މުސްލިމުން ވައްދަމުން ގެންދަނީ މި މަހު 3 ވަނަދުވަހުން ފެށިގެން އިނގިރޭސި ވިލާތުގައި އެހެން ގައުމުތަކުން ހިޖުރަކޮށްފައިތިބި މީހުންނާ ދެކޮޅަށް މުޒާހަރާތައް ކުރަންފެށުމާ ގުޅިގެންނެވެ.

ބެލްފާސްޓުގެ ކުއީން ޔުނިވަރސިޓީގެ ފަރާތުން ޕީޓަރ މެކްލޮގްލިން އެސޯޝިއޭޓެޑް ޕްރެސްއާ ވާހަކަ ދައްކަމުން އޮޅުންފިލުވާދީފައިވަނީ އިނގިރޭސި ވިލާތާއި ބެލްފާސްޓުގައި އެހެންގައުމުތަކުން ހިޖުރަކޮށްފައިވާ މީހުންނާ ދެކޮޅަށް އުފެދިގެން މިއުޅޭ ރުޅިވެރިކަމުގެ އަސްލަކީ ދޮންމީހުންނަކީ މާމޮޅު ބައެއްކަމަށް ދުށުމުގެ ވިސުނުމުން އުފެދިގެން ދިއުމެވެ.

ޕްރޮ-އައިރިޝް ކެތޮލިކުން މުސްލިމުންނާދޭތެރޭ ނުރުހުން ވެފައިވަނީ އެމީހުން ޕްރޮޓެސްޓުންނާ ގުޅުން ބަދަހި ކުރުމުގެ ތުހުމަތުގައެވެ. މި ތުހުމަތުތަކަށް ރައްދު ދިނުމުގެ ގޮތުން އުތުރު އަޔަރލޭންޑުގެ މުސްލިމް ކައުންސިލުން ބުނެފައިވަނީ އެއީ މައުލޫމާތު ހޯދުމަކާ ނުލައި ދޭތެރެ ޖެއްސުމަށް ހިންގަމުންގެންދާ ހަރަކާތެއް ކަމަށެވެ. 

މަޒްހަބީ ތަފާތު ކުރުމުގެ އޮށް އިންދުމަށްފަހު ވަރަށް އަވަހަށް އޭގެ ކުރިތައް އެކިދިމަދިމާލުން ދައްކާލާތަން ފެންނާން ފަށާނެއެވެ. މުސްލިމް) އުންމަތުގެ މިއަދު ހާލަތަށްވުރެން ފާޅުކަން ބޮޑު އެހެން ހަގީގަތެއް ނުފެންނާނެއެވެ. ސުންނީންނާއި ސުންނީންނެވެ. ސުންނީންނާއި ޝިއާއީންނެވެ. ގިނަ އިލްމުވެރިން ނެރެމުން ގެންދާތަން ފެންނަނީ އެއް މައްސަލައެއްގައިވެސް ތަފާތު ރައުޔު ތަކެކެވެ. ކިޔަވަނީ އެއް ފޮތަކުންނެވެ. ފިލާވަޅުތައް ލިއެފައި ހުރީ އެންމެނަށް އެނގޭ ބަހުރުވައަކުންނެވެ.)