އެމްއެމްޕީއާރްސީގެ ބޮޑު ޚިޔާނާތަކީ އެމަނިކުފާނުގެ ވެރިކަމުގައި ”ސިޔާސީ ވަރުގަދަ މަސައްކަތަކަށް ކުރި އިންވެސްޓްމެންޓް“ އެއް ކަމަށް ކުރީގެ ރައީސް ޔާމީން ޢަބްދުލްޤައްޔޫމް ވިދާޅުވެއްޖެއެވެ.

އެމްއެމްޕީއާރުސީގެ ޚިޔާނާތުގެ މައްސަލަ ބައްލަވާނެ ކަމަށާއި ކުށްވެރިންނަށް ހައްގު އަދަބު ދެއްވާނެ ކަމަށް ދާދިފަހުން ރައީސް ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

ޕީއެންއެފްއިން ރޭ ބޭއްވި ޖަލްސާގައި ޔާމީން ވަނީ އެ މައްސަލައިގެ މައްޗަށް އަލިއަޅުވައިލައްވައި ވާހަކަފުޅު ދައްކަވައިފައެވެ.

ޔާމީން ވިދާޅުވީ ދައުލަތުގެ ބޮޑުންގެ ތެރެއިން މަދު މީހަކު ނޫނިއްޔާ ޚިޔާނާތުގެ ލިސްޓުން އުންޏެއް ނުވާނެ ކަމަށެވެ.

“އެމްއެމްޕީއާރުސީގެ މައްސަލަ ހިނގީކީ އެއްގޮތަކަށް ވެސް މީހަކަށް ހެޔޮހިތުން ލާރި ދޭކަށެއް ނޫން. އެއީ ސިޔާސީ ވަރުގަދަ މަސައްކަތަކަށް ކުރި އިންވެސްޓްމެންޓެއް. އެހެންވީމަ އޭގައި ހުންނާނީ ރައްޔިތުންގެ މަޖިލިސް މެންބަރުން އޭގައި ގިނައިން ނަގާފައި ހުންނާނީ އެމްޑީޕީއާ ޕީޕީއެމްގެ. އެއީ އެކަން ހިނގާފައި އޮތް ގޮތް“ ޔާމީން ވިދާޅުވިއެވެ.

ޔާމީން ވިދާޅުވި ގޮތުން އޭގެތެރޭގައި ދެން ހިމެނެނީ ދައުލަތުގެ ބޮޑެތި މުއައްސަސާތަކުގެ މީހުންނަށް ލިބުނު ފައިސާ ކަމަށާއި އެ މަންފާ ލިބުނު ފަރާތްތައް މިވަގުތު ވެސް ރައީސް އޮފީހުގެ އިސް މަގާމުތަކުގައި އެބަ ތިއްބެވި ކަމަށެވެ.

މީގެއިތުރުން ޔާމީން ވިދާޅުވީ އެމްއެމްޕީއާރުސީގެ ޚިޔާނާތް ހިންގީ އޭރުގެ ޓޫރިޒަމް މިނިސްޓަރަލު އަދި ފަހުން އެމަނިކުފާނުގެ ނައިބަކަށް ހުންނެވި އަޙްމަދު އަދީބު ކަމަށެވެ. އަދި އެކަމާ ގުޅޭ ހުރިހާ ކިތާބީ ހެކިތައް އޭނާގެ އަތުގައި ހުންނާނެ ކަމަށާއި އޭނާގެ އަތުގައި ހުރި ހުރިހާ މައުލޫމާތެއް, ފުލުހުންގެ އަތުގައި ވެސް ހުރި ކަމަށް ޔާމީން ވިދާޅުވިއެވެ.

”އަދީބު މިކަން ކޮށްފައި ހުރީ ވަރަށް ރަނގަޅަށް. އެއީ އޭނާ ފައިސާ ދިން މީހަކަށް ފައިސާ ފޮނުވާއި އެވަރުން ނިންމައެއް ނުލާ. އޭނަ އެގްރީމެންޓެއް ނުކުރާނެ. ހަމަ ވަޓްސްއެޕް އެސްއެމްއެސްއަކުން ފޮނުވައިލާނީ, އޭ ބްރޯ މިވެނި ވަރަކަށް ފައިސާ ފޮނުވީމޭ ލިބުނުހޭ. މި ލިބުނު މީހާ އެބަ ބުނޭ, އޭ ބްރޯ ތެންކިޔޫ އޭ, ތިވަރު ލިބިއްޖެޔޭ,“

ޔާމީން ވިދާޅުވި ގޮތުން އެކަން ހިނގާފައިވާ ގޮތް އެންމެ ރަނގަޅަށް އެނގޭނީ ފުލުހުންނަށެވެ. އަދި އޭގެ މައްސަލައަކީ ހުރިހާ މައުލޫމާތެއް ހުރެ ދައުލަތުގެ ސިއްރެއްގެ ގޮތުގައި އޮތް ލިސްޓެއް ގެންދިޔުން ކަމަށް ވެސް ޔާމީން ވިދާޅުވިއެވެ.

ޔާމީން ވަނީ ކުރީގެ ރައީސް އިބްރާހިމް މުޙައްމަދު ޞާލިޙާއި ކުރީގެ ރައީސް މުޙައްމަދު ނަޝީދު އެ ލިސްޓު ގެންދެވި ކަމަށާއި އެ މައުލޫމާތު އެ ބޭފުޅުންގެ އަތުގައި ހުންނަވާނެ ކަމަށް ވެސް ވިދާޅުވެފައެވެ.