ކުރީގެ ރައީސް ޔާމީން ޢަބްދުލްޤައްޔޫމުގެ ޝަރީއަތް ލަސްވާ މައްސަލަ ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށަހެޅުއްވުމަށް އެ ކޮމިޝަނުގެ މެންބަރު އަދި ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ނިންމަވައިފިއެވެ.
އަސްލަމް މިކަން ހާމަކުރެއްވީ ރޭ އައްޑޫ ސިޓީގައި ބޭއްވި ކެމްޕޭން ހަރަކާތެއްގައި ދެއްކެވި ވާހަކަފުޅުގައެވެ.
އަސްލަމް ވިދާޅުވި ގޮތުގައި ހައިކޯޓުގައި އޮތް ޔާމީންގެ އިސްތިއުނާފު މައްސަލައިގެ ޝަރީއަތް ލަސްވަނީ ސަރުކާރުން މައްސަލައިގެ ތެރެއަށް އަތްބާނާތީއެވެ.
އެގޮތުން މިއަދު އެ މައްސަލަ ޖޭއެސްސީއަށް ހުށަަހަޅުއްވާނެ ކަމަށް އަސްލަމް ވިދާޅުވިއެވެ.
ހައިކޯޓުގައި އިސްތިއުނާފުކޮށްފައި އޮތީ ވ.އާރަށުގެ މައްސަލާގައި ޔާމީންގެ މައްޗަށް އިއްވި 11 އަހަރުގެ ޖަލު ހުކުމުގެ މައްސަލައެވެ.
މި މައްސަލަ މިއަދު ޖޭއެސްސީއަށް ހުށަހަޅުއްވައިފިންތޯ “ސަންދާނު“ ގެ ފަރާތުން ސުވާލު ދެންނެވުމުން މަޖިލީހުގެ ރައީސް ވިދާޅުވީ އޭގެ ތަފުސީލު ފަހުން ހާމަކުރައްވާނެ ކަމަށެވެ.
