ތުރުކީގެ އެތެރޭގެ އިންތިހާބުގައި ރައީޒް ރަޖަބް ޠައްޔިބް އުރުދުޣާންގެ ސިޔާސީ ވާދަވެރިއެއް ކަމަށްވާ އިސްތާންބުލްގެ މޭޔަރ އަކްރަމް އިމާމޮގްލޫ އާއި ސިޔާސީ އިދިކޮޅަށް ނިސްބަތްވާ ގިނަ ކެނޑިޑޭޓުންނަށް މޭޔަރުގެ މަގާމު ކަށަވަރުކޮށްދިނުމާއެކު ތުރުކީގެ ރައްޔިތުން ގައުމުގެ ރައީސްގެ ކިބައިން ބަދަލު ހިފައިފިއެވެ. 

ދެބައިކުޅަ އެއްބައި ވޯޓު ގުނާފައިވާއިރު، އިމާމޮގްލޫވަނީ ތުރުކީގެ އެންމެ ބޮޑު ރަށް ކަމުގައިވާ އިސްތާންބުލްއިން 10 އިންސައްތައިގެ ކުރިއެރުމެއް ހޯދާފައެވެ. މީގެއިތުރުން، އޭނާގެ ސެކިއުލާ ރިޕަބްލިކަން ޕީޕަލްސް ޕާޓީ (ސީއެޗްޕީ) އިންއަންކާރާ ކާމިޔާބުކުރުމުގެ އިތުރުން، ބޮޑެތި ސިޓީތަކުގެ ތެރެއިން އިތުރު 9 ސިޓީގެ މޭޔަރު ގޮނޑި ކާމިޔާބު ކޮށްފައިވެއެވެ. 

މެލޭޝިއާގެ އޭޝިއާ މިޑްލް އީސްޓް ސެންޓަރުގައި ޚާރިޖީ ސިޔާސަތު ދިރާސާކުރަަ ތިންކްޓޭންކެއްގެ ގޮތުން މަސައްކަތްކުރާ އެނަލިސްޓެއް ބުނެފައިވަނީ، އެހެން ގައުމުތަކޭވެސް އެއްފަދައިން ތުރުކީއަށްވެސް ގިނަ ގޮންޖެހުންތަކެއް އެބަހުއްޓެވެ. ރައީސް އުރުދުޣާނާއި އެއްފަޅީގައި އޮޓޮމަން ރަސްކަމަށް ތާއީދުކުރާ ފަރާތްތައް ތިބިއިރު، އަނެއް ފަރާތުގައި ތިބީ ސެކިއުލަރ ގައުމެއްގެ ގޮތުގައި ތުރުކީ ބޭއްވުމަށް އެދޭ ފަރާތްތަކެވެ. ފާއިތުވެދިޔަ ދިހަ އަހަރު ދުވަހުގެ ތެރޭގައި މިފަދަ ފިކުރީ ބައިބައިވުންތައް ވަނީ އިތުރުވެފައެވެ. އެހެންނަމަވެސް، ރައީސް އުރުދުޣާނަށް މިއިންތިހާބު ގެއްލެން މެދުވެރިވީ އެ ސަބަބާއިހުރެކަމަށް ގަބޫލެއް ނުކުރެވެއެވެ. 

އެގޮތުން، ރައީސް އުރުދުޣާންގެ އޭކޭ ޕާޓީއިން އަބަދުވެސް އިސްލާމިސްޓް އަދި ސެކިއުލަރިސްޓް ފިކުރުގެ މެދުމިން ދަމަހައްޓަން މަސައްކަތްކުރާ ކަމަށް ގަބޫލުކުރާ ބަޔަކު ތިބިއިރު، ގިނަ އަހަރުތަކެއް ވާންދެން އެސިޔާސަތު މަސައްކަތްކޮށްފައިވަނީ އެކަމުގެ ސަބަބުން ތުރުކީގެ އިގްތިޞާދު ވަރުގަދަވެފައި ވާތީއެވެ. އެހެންނަމަވެސް، ބައިނަލްއަޤްވާމީ މައްސަލަތައް އިތުރުވަމުން ދިޔުމާއެކު އޭގެ ސަބަބުން ތުރުކީގެ އިގްތިޞާދަށް އަސަރުކޮށްފައިވީނަމަވެސް، އާންމު ރައްޔިތުންގެ ދިރިއުޅުމުގެ ހަރަދުތައް ބޮޑުވަމުންދިޔުމާއެކު ރިޔާސީ އިންތިހާބުގައި ވީވައުދުތައް ނުފުއްދުމުގެ ސަބަބުން ތުރުކީގެ ރައްޔިތުން މިވަނީ ރައީސް އުރުދުޣާންގެ ކިބައިން ބަދަލު ހިފާފައެވެ. 

ރައީސް އުރުދުޣާނަކީ އިސްލާމްދީން ކުރިއެރުވުމަށް މަސައްކަތްކުރާ ފަރާތެއްގެ ގޮތުގައި ދުނިޔޭގައި މަޝްހޫރުވެފައިވާ ފަރާތެއްކަމަށްވާއިރު، މީގެ މާނައަކީ ދީނަށް ބަލައިގެން ވޯޓުލާ ފަރާތްތަކުން ރައީސް އުރުދުޣާންއަށް ތާއީދު ނުކުރަނީއެއް ނޫނެވެ. މި ނަތީޖާއިން ހަމައެކަނި އެނގޭ ކަމަކީ އެހެންގައުމުތަކޭވެސް އެފަދައިން، އެގައުމެއްގެ ސަރުކާރުން ރައްޔިތުންގެ ބަސްނާހައި، ވައުދާއި ޚިލާފުވުމުން ރައްޔިތުން ހަރުއަޑުން އެކަމުގެ ނުރުހުން ފާޅުކޮށްފިކަމެވެ. 

ހަމައެއާއެކު، ތުރުކީއަކީ ދިމިގުރަަތީ ގައުމެއްކަން މިއިންތިހާބުން ވަނީ ދައްކުވައިދީފައެވެ. އެއީ ސަރުކާރުގެ މަސައްކަތާއި މެދު ރުހޭކަން ނުވަތަ ނުރުހޭކަން ދިމިގްރާތީ ގައުމެއްގެ ރައްޔިތުން ދައްކައިދޭނީ އިންތިހާބުގެ ވަގުތުގައި ލެވޭ ވޯޓުންކަމަށްވުމާއެކު، ތުރުކީގެ ރައްޔިތުން ކެތްތެރިކަމާއެކު އެކަން މިވަނީ ދައްކުވައިދީފައެވެ. 

ހަމަގައިމުވެސް މިއީ އޮޓޮމަން ވެރިކަމަށް ތާއީދުކުރާ ފަރާތްތަކަށް ލިބުނު ބޮޑު ފަސްޖެހުމެކެވެ. ކުރިއަށް އޮތް ފަސްއަހަރު ދުވަހު ތުރުކީގެ ބޮޑެތި މައި ސިޓީތައް އިސްލާމީ ސިޔާސަތުތަކާއި ދުރަށް ޖެހޭތަން ބެލުމަކީ އެފަރާތްތަކަށް ފަސޭހަކަމަކަށް ނުވާނެކަން ކަށަވަރެވެ. ސުވާލަކީ އޭކޭ ޕާޓީއިން ދެން އޮތް ރިޔާސީ އިންތިހާބުގެ ކުރިއަށް އެޕާޓީގެ ކަންކަން އިސްލާހުކުރެވޭނެތޯއެވެ. އަދި ދެން ވާދަ ނުކުރައްވާނެކަން ރައީސް އުރުދުޣާން އިއުލާނުކުރައްވާފައިވަނިކޮށް ޕާޓީގެ މިހާރު އޮތް އޮނިގަނޑާއެކު އިންތިހާބު ކާމިޔާބުކުރުމުގެ ކުޅަދާނަކަން އެޕާޓީގެ އެބަހުރި ހެއްޔެވެ؟