ރައްޔިތުންގެ މަޖިލީހުގެ ސާޖެންޓް އެޓް އާމްސްގެ މަގާމަށް އެމްއެންޑީއެފްގެ ކުރީގެ އޮފިސަރެއް ކަމަށްވާ ޠަލްޙަތު ޙަސަން އައްޔަންކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
މަޖިލިސް ޖަލްސާގައި ނެގި ވޯޓުގައި މި މަގާމަށް ޠަލްޙަތު އައްޔަންކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 35 މެންބަރުންގެ އިއްތިފާގުންނެވެ.
ސާޖެންޓް އެޓް އާމްސްއަކީ ރައްޔިތުންގެ މަޖިލީހުގެ އަމީންއާންމުގެ މަގާމާ ޖެހިގެން ދެވަނައަށް އެންމެ އިސް މަގާމެވެ.
މީގެކުރިން ސާޖެންޓް އެޓް އާމްސްގެ މަގާމުގައި ހުންނެވީ މުޙައްމަދު ޙަލީމެވެ. މަޖިލީހުގެ ރައީސާއި ނައިބު ރައީސްގެ އޮފީހުގައި ދައްކާ ވާހަކަތައް ސިއްރުން އަޑުއެހޭނެ ގޮތް ހެދިކަމުގެ ތުހުމަތާއެކު ސަސްޕެންޑް ކުރުމަށްފަހު އޭނާ މަގާމުން ވަކިކުރީ 2022 ގައެވެ.
