އެމެރިކާގެ ކުރީގެ ރައީސް ޑޮނާލްޑް ޓްރަމްޕްގެ މައްޗަށް ނިއުޔޯރކުގައި އުފުލާފައިވާ މަކަރާ ޙީލަތް ހެދުމުގެ ދައުވާގެ އިސްތިއނާފް މަރުޙަލާގައި ދައްކަންޖެހޭ ގާތްގަނޑަކަށް ބައި ބިލިއަން ( 454 މިލިއަން ) އެމެރިކާ ޑޮލަރު ދެއްކޭނެ ގޮތެއްނެތި ހާސްވެ ދެލޯ މުދުނަށް އަރައިފިކަމަށް ސީ. އެން. އެން. އިން ޚަބަރު ދީފިއެވެ.       

ޓްރަމްޕުގެ ގާނޫނީ ވަކީލުން ސީ. އެން. އެން. އަށް ޔަގީންކޮށް ދީފައިވަނީ ކުރީގެ ރައީސް ޓްރަމްޕަށް ދަރަންޏަށްވިޔަސް އެ ފައިސާ ލިބޭނެމަގެއް ފެނޭތޯ ކުރަމުން ގެންދާ މަސައްކަތަށް މިހާތަނަށް އެއްވެސް އަލިމަގެއް އަދި ފެނިފައި ނުވާކަމަށެވެ.                                                          

ޓްރަމްޕް އުންމީދު ކުރައްވައިގެން ހުންނެވީ އީ. ޖީން ކެރޯލްގެ ޙުކުމްގައި ބުނެފައިވާ 91.6 މިލިއަން އެމެރިކާ ޑޮލަރ ދުނިޔޭގެ އެންމެބޮޑު އިންޝޫރެންސް ކުންފުނި ޗަބް އިން ލިބޭނެ ކަމަށެވެ. އެކަމަކު އެކުންފުނިން މިހާރު ބުނެފައިވަނީ އެކަން ހަމަޖައްސައިދެވެން ނެތްކަމަށެވެ.                                      

ޓްރަމްޕުގެ ޓީމުން ގެންދަނީ ވީހާވެސް އަވަހަށް އެބޭފުޅާގެ އަގުބޮޑު ބައެއް މިލްކިއްޔާތުތައް ވިއްކާލެވޭނެ ގޮތެއްވެސް ބަލަމުންނެވެ. އެހެންނަމަވެސް މިހާތަނަށް އެއްވެސް މަގެއް ނުފެނުމުގެ ސަބަބުން ރިޕަބްލިކަން ރިޔާސީ ކެންޑިޑޭޓް ޑޮނާލްޑް ޓްރަމްޕް ހުންނެވީހަދާނެގޮތް ހުސްވެފައެވެ.                                        

މިހިނގާ މާރޗް މަހުގެ 25 ވަނަ ދުވަހު (މާދަމާ)ގެ ކުރިން އެ ފައިސާ ދައްކަން ޖެހޭނެއެވެ. ކުރީގެ ރައީސް ޓްރަމްޕުގެ އަގުބޮޑު މިލްކިއްޔާތުތައް ވިއްކާލުމަށް އެޅިފައިވާ އެންމެ ބޮޑު ހުރަހަކީ އެމިލްކިއްޔާތު ތަކުން ބައިއެޅޭ މީހުން ތިބުމާއިއެކު އެއިން ފަރާތަކުން އިޢުތިރާޒު ކުރުމުގެ ފުރުސަތު ހުޅުވިފާ އޮތުމެވެ.                       

ފައިސާ ދައްކާ ޚަލާސްކުރަން ފަނޑިޔާރު ކުރެއްވި ޙުކުމަށް ބަންޑާރަ ނައިބު ހަމައެކަނި 30 ދުވަހުގެ މުޙުލަތެއް ދިނުމުގެ ސަބަބުން ނިއުޔޯރކުގެ ބަންޑާރަ ނައިބު ލެޓިޓިއާ ޖޭމްސް އަދި ފަނޑިޔާރު އާރތަރ އެންގްރޯން އާއި ދެބޭފުޅުންނަށް ޓްރަމްޕް ގެންދަވަނީ އަމިއްލަގޮތުންވެސް ރުޅިގަނޑު ބާލަމުންނެވެ.                    

ޓްރަމްޕުގެ ދަރަނި އަދާކުރުމަށްޓަކައި އެހެން އެއްވެސް ގޮތެއް ފެންނާން ނެތުމުން އެ ފައިސާހޯދުމަށްޓަކައި އޭނާގެ އަގުބޮޑު މުދާތައް ނުއަގުގައި ވިއްކާލަން ޖެހޭނެތީ އެކަމުގެ ރުޅިގަނޑު މިދިޔަ އަންގާރަ ދުވަހު ސޯޝަލް މީޑިއާ ޕްލެޓްފޯރމުގައި 2 ގަޑިއިރު ތެރޭގައި 8 ފަހަރު ޓްރަމްޕުގެ ފާޅުކުރިކަމަށް ވެއެވެ.  އިސްތިޢުނާފުގައި އަހަރެންނަށް ކާމިޔާބު ލިބުނުކަމުގައި ވިޔަސް އެ މުދާތައް އަހަރެންނަށް ގެއްލިގެންދިޔައީއެވެ. މިއަށް ކިޔާނީ މުސްކުޅި އަންހެނަކު ލައްވާ ސިހުރުހެދުން ނޫނީ ދެން ކީކޭ ހެއްޔެވެ؟ ސޯޝަލް މީޑިއާގައި ޓްރަމްޕް ބުނެފައިވެއެވެ.            

ޓްރަމްޕުގެ ގާނޫނީ ވަކީލުން މިހާރު މަސައްކަތްކުރަނީ އެ ދަރަނި އަދާކުރުމުގެ މުއްދަތު ދަންމާލެވޭތޯ ނުވަތަ ފުރަތަ 100 މިލިއަން ޑޮލަރ ދައްކާފާ ފަހުން ބާކީ ދެއްކޭ ކަހަމަ ޙުކުމެއް ލިބޭތޯއެވެ.                      

ޓްރަމްޕުގެ މައްސަލާގައި އޭނާއަށް ލުޔެއް ނުލިބިގެން އުޅެނީ އޭނާގެ ބަސްމަގު ހުތުރު ކަމުންނެވެ. ބަންޑާރަ ނައިބާ ފަނޑިޔާރުންނަށްވެސް އެއްވެސް އިޙުތިރާމެއް ނުކުރެއެވެ. އޭނާގެ ކެމްޕޭނު ޓީމުގެ އިސް ފަރާތްތަކުގެ ބަސްމަގުވެސް ހުންނަނީ ހަމަ މިގޮތަށެވެ. 

ދާދިފަހުން ބޭއްވުނު ކެމްޕޭނު އެއްވުމެއްގައިވެސް އޭނާގެ ތަރުޖަމާނު ބުނެފާއިވަނީ ފައިސާދައްކަން އެންގި އެގުމަކީވެސް ބޮޑު “ ގެރިގުއި “ ތަފާލެއް ކަމަށެވެ. ހަމައެއާއިއެކު ބަންޑާރަ ނައިބާއި ފަނޑިޔާރު މަނިކުފާނާއި ދިމާލަށް ޓްރަމްޕް ބުނެފައިވަނީ “ ކަލޭމެން މުސްކުޅި އަންހެނަކު ލައްވާ ސިޔާސީ ސިހުރު ހަދަނީ “ ކަމަށެވެ.

ޓްރަމްޕާއި އޭނާގެ ގާނޫނީ ޓީމުގެ އެންމެ ފަހު އުންމީދަކީ ފުރަތަމަ 100 މިލިއަން ޑޮލަރު ދެއްކުމަށްފަހު ބާކީ ފައިސާދައްކަން މުޙުލަތެއް ލިބުމެވެ. އެކަން ކާމިޔާބު ނުވެއްޖެނަމަ ޓްރަމްޕް ގަސްދުކޮށްފައި އޮތީ އަމިއްލަ ނަފުސު އިފްލާސްކުރުން ޢިއުލާނު ކުރުމަށެވެ.

ޓްރަމްޕުގެ ގާނޫނީ ޓީމުން އެންމެ ފަހުން ކޯޓުގައި ބުނެފައިވަނީ ތިރީހަކަށް އަންޑަރރައިޓަރުން ކައިރީގައި އެ ފައިސާދެއްކޭނެ ގޮތެއް ހަމަޖައްސާދިނުމަށް ކުރީގެ ރައީސް ޓްރަމްޕް އެދިވަޑައިގެންފައިވާކަމަށެވެ. އެހެންނަމަވެސް އެއްވެސް ފަރާތަކުން އެކަމުގައި އަލިމަގެއް ދައްކާފައެއް ނުވެއެވެ.                              

މިހުސްވިމަހު ޓްރަމްޕްގެ މައްޗަށް 355 މިލިއަން ޑޮލަރ ރަހުނު ކޯޓުން ޙުކުމް ކޮށްފައިވަނީ ނުހައްގުން ހޯދާފައިވާ މުއްސަނދި ކަމުގެ މައްސަލާގައެވެ. އެ ޙުކުމްގައި ބުނެފައިވަނީ ޓްރަމްޕާއި އޭނާގެ ބޮޑެތިވެފައިތިބި ފިރިހެންދަރިންވެސް ހިމެނޭގޮތުގައި މަކަރާ ޙީލަތުން ފައިސާހޯދައި އަދި ސަރުކާރަށްވެސް ދޮގުމަޢުލޫމާތު ހުށައަޅާފައިވާކަމަށެވެ. މިގޮތަށް ހޯދާފައިވާ ފައިސާގެ އަދަދު 450 މިލިއަން ޑޮލަރށްވުރެން ގިނަކަމަށް އެ ޙުކުމްގައި ބުނެފައިވެއެވެ.

ޓްރަމްޕުގެ އިސްތިއުނާފު މައްސަލަ ނިމެންދެން ދައުލަތުން އެ ޙުކުމް ތަންފީޒުކުރުވުން ލަސްކުރަން ޓްރަމްޕް ބޭނުންވާނަމަ 450 މިލިއަން ޑޮލަރު ސަރުކާރުން ކަނޑައަޅާ އިދާރާއެއްގައި ރަހުނު ކުރަން ޖެހޭނެއެވެ. މީގެ ތެރެއިން 91.6 މިލިއަން ޑޮލަރ މިހާރު ވަނީ ރަހުނުކޮށްފައެވެ. ބާކީ ފައިސާ ލިބޭނެ ކަމުގެއެއްވެސް އުންމީދެއް ނެތެވެ. މިޙާލަތުގައި އަމިއްލަ ނަފުސު އިފްލާސްކުރުން ނޫން އެހެން ގޮތެއް ޓްރަމްޕް އަށް ނެތްކަމަށް ބައެއް ބޮޑެތި އިންވެސްޓްމެންޓް ބޭންކުތަކުންވެސް ބުނަން ފަށައިފިއެވެ.                          

ދާދިފަހުން ޑެލަސްގައިއޮތް ކެމްޕޭން ބައްދަލުވުމެއްގައި ރައީސް ބައިޑަން ވަނީ ކުރީގެ ރައީސް ޑޮނާލްޑް ޓްރަމްޕް އަށް މަލާމާތުގެ ބަސްތަކެއް ރައްދުކޮށްފައެވެ. އެ މަލާމާތުގެ ތެރޭގައި “ އެއްދުވަހަކު މީހަކުއައިސް އަހަރެން ދަރާ ވިކިއްޖޭ.. އަތުގައި އެއްވެސް އެއްޗެއްނެތޭބުނެ އިސްދަށަށް ޖަހާލައިގެން ހުއްޓި ހުރެއްޖެއެވެ. އަހަރެން ބުނީމެވެ. ޑޮނާލްޑް އެވެ، އަހަރެން އަތުގައި ދޭނެ އެއްވެސް އެއްޗެއް ނެތެވެ. ވަރަށް ދެރައެވެ ”.  މި ނޫނަސް ވަރަށް ގިނަ މަލާމާތްތައް ރައީސް ބައިޑަން ކުރީގެ ރައީސް ޑޮނާލްޑް ޓްރަމްޕަށް ނިސްބަތްކޮށްބުނެފާހުރިކަން ވައިޓްހައުސްގެ ޓްރާންސްކްރިޕްޓް ތަކުންއެނގެއެވެ.

މިޙާލަތުގައި ޓްރަމްޕްއަށް އެމެރިކާގައި މިއަންނަ ރިޔާސީ އިންތިޚާބުގައި ބައިވެރިވެވުމާއިމެދު ޝައްކެވެ.