ކަޅު ބާޒާރުގައި ޑޮލަރު ވިއްކަނިކޮށް އަތުލައިގަތް ބިދޭސީން ޑީޕޯޓް ކުރުމަށް މޯލްޑިވްސް އިމިގްރޭޝަނުން ނިންމައިފިއެވެ.
އިމިގްރޭޝަން ކޮންޓްރޯލާ މުހައްމަދު ޝައްމާން މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ކަޅު ބާޒާރުގައި ފުޅާ ދާއިރާއެއްގައި ޑޮލަރުގެ ވިޔަފާރި ކުރަމުންގެންދާ ކަމުގެ މައުލޫމާތު ލިބިފައިވާތީ، ފުލުހުންގެ އެހީތެރިކަމާއެކު އިމިގްރޭޝަނުން ހިންގި ހާއްސަ އޮޕަރޭޝަނެއްގައި، އިމިގްރޭޝަންގެ ބެލުމުގެ ދަށަށް ގެނެވުނު ބިދޭސީން ރާއްޖެ ނާދެވޭ ގޮތަށް ޑީޕޯޓް ކުރުމަށް ހަމަޖެހިފައިވާ ކަމަށެވެ.
އިމިގްރޭޝަނުން ބުނީ އެ ބިދޭސީން އަތުލައިގެންފައި ވަނީ އާންމުންގެ ޝަކުވާއާ ގުޅިގެން މިދިޔަ ހަފުތާގައި ހިންގި އޮޕަރޭޝަނެއްގައި ކަމަށެވެ.
މިގޮތުން އަތުލައިގަނެ އިމިގްރޭޝަންގެ ބެލުމުގެ ދަށަށް ގެނެސްފައި ވަނީ ހަތް ބިދޭސީން ކަމަށް އިމިގްރޭޝަނުން ހާމަކުރެއެވެ.
މީގެ އިތުރުން އަތުލައިގަތް ބިދޭސީންގެ ތެރެއިން ބައެއް މީހުންނަކީ ދޫކޮށްފައިވާ ވިސާއާ ހިލާފަށް ރާއްޖޭގައި އުޅެމުންދާ ބައެއް ކަމަށާއި އަނެއް ބައި މީހުންނަކީ ސައްހަ ވިސާ ނެތް މީހުން ކަމަށް އިމިގްރޭޝަނުން ހާމަކުރެއެވެ.
One Response
ސަޅި. މަގުމަތީގައްޔާއި ލައިސަންސް ނަގައިގެން ކަޅުބާޒާރުގައި ޑޮލަރު ވިއްކާމީހުންނާ ހަމަޔަށް ގާނޫނުގެ ދިގުއަތް ފޯރާނީ ކޮންދުވަހަކުންބާ. ފަހަރެއްގައި ލައިސަންސް ނަގައިގެން ކުރީމާ ކުށަކަށް ނުވަނީ ތޯއްޗެއް.