އަންނަ މާޗު މަހުން ފެށިގެން ރާއްޖެ އާއި ސްރީލަންކާއާ ދެމެދު އެއާ އެމްބިއުލޭންސްގެ ޚިދުމަތް ފަށަން ނިންމައިފިއެވެ.
ޓްރާންސްޕޯޓު އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ކޮލޮމްބޯއަށް ކުރައްވަމުން ގެންދަވާ ދަތުރުގައި މިއަދު ވަނީ ލަންކާގެ ޕޯޓްސް، ޝިޕިން އަދި އޭވިއޭޝަން މިނިސްޓަރު ނިމާލް ސިރިޕަލާ ދި ސިލްވާއާ ބައްދަލުކުރައްވާފައެވެ.
މި ބައްދަލުކުރެއްވުމަށްފަހު މިނިސްޓަރު އަމީން ކުރެއްވި ޕޯސްޓެއްގައި ވިދާޅުވީ، މެޑިކަލް އިވެކިއޭޝަން ފަދަ ކުއްލި ހާލަތްތަކުގައި އޮޕަރޭޓުކުރާ ފްލައިޓުތަކަށް ހުއްދަ ލިބޭނެ ގޮތަށް ފްރޭމްވޯކެއް އެކުލަވާލުމަށް ލަންކާ އިން އެއްބަސްވެފައިވާ ކަމަށެވެ.
އެ ބައްދަލުވުމަށްފަހު ލަންކާގެ ޕޯޓްސް، ޝިޕިން އަދި އޭވިއޭޝަން މިނިސްޓަރު ނިމާލް ސިރިޕަލާ އާ ހަވާލާދީ ލަންކާގެ ނޫހެއްގައި ރިޕޯޓުކޮށްފައިވާ ގޮތުން ރާއްޖޭގައި ހިނގާ ހާދިސާތަކުގައި އަނިޔާވާ މީހުން ކުއްލި ފަރުވާއަށް ލަންކާއަށް ގެންދިއުމާ ގުޅޭ ގޮތުން ގިނަ މަޝްވަރާތަކެއް ދެ ބޭފުޅުންގެ މެދުގައި ކުރެއްވި ކަމަށެވެ.
އެގޮތުން ލަންކާގެ ބަންޑާރަނައިކާ އިންޓަނޭޝަނަލް އެއާޕޯޓަށް އެއާ އެމްބިއުލާންސް ޖައްސާ ގޮތަށް ރާއްޖެއާ ދެމެދު އެ ޚިދުމަތް ފަށާކަން އެ ނޫހުގެ ރިޕޯޓުކޮށްފައި ވެއެވެ.
އެއާ އެމްބިއުލޭންސް ފެށުމަށް ބޭނުންވާ ހުއްދަތައް ލަންކާގެ އެއާޕޯޓު އޮފިޝަލުންނަށާއި ސިވިލް އޭވިއޭޝަން އޮތޯރިޓީއަށް މިހާރު ދީފައިވާ ކަމަށާއި، ކުއްލި ފަރުވާ ބޭނުންވެގެންދާ ދިވެހިންނަށް ޚާއްޞަ ޔުނިޓެއް އެއާޕޯޓުގައި ޤާއިމުކުރުމަށް އަންގާފައިވާ ކަމަށް ވެސް ސިރިޕަލާއާ ހަވާލާދީ އެ ނޫހުގައި ރިޕޯޓުކޮށްފައި ވެއެވެ.
އަންނަ މާޗު 1 އިން ފެށިގެން ރާއްޖެއަށް އަށް އެއާ އެމްބިއުލާންސްގެ ޚިދުމަތް ތައާރަފު ކުރަން ނިންމާފައިވާ ކަމަށް މި ސަރުކާރުން ވަނީ މީގެ ކުރިން ހާމަކޮށްފައެވެ.
