އިސްރާއީލުން ޣައްޒާގައި ހިންގާ ގަތުލުއާންމާއި ދެކޮޅަށް އިސްރާއީލުގެ މަސްލަހަތު އޮންނަ ކުންފުނިތަކާއި ބްރޭންޑުތައް ބައިނަލްއަޤްވާމީ ފެންވަރުގައި ބޮއިކޮޓް ކުރަމުން ގެންދިޔުމާއެކު، ތުރުކީގެ އާންމުންނާއި، ރައީސް ރަޖަބް ޠައްޔިބް އުރުދުޣާންގެ ސަޕޯޓަރުން އަންނަނީ މި ބޮއިކޮޓަށް އެއްބާރުލުންދީ އިސްރާއީލުގެ މަސްލަހަތު އޮން މުދަލަށް ނޫނެކޭ ބުނަމުންނެވެ.
އެގޮތުން، ތުރުކީގެ ޓީވީ ޗެނަލެއް ކަމަށްވާ ޓީޖީއާރްޓީގައި ހުށައެޅުންތެރިޔެއްގެ ގޮތުން މަސައްކަތްކުރަމުން އައި މެލްޓެމް ގުނޭ، އިސްރާއީލުގެ މަސްލަހަތު އޮންނަ ސްޓާބަކްސް ކުންފުނީގެ ލޯގޯ ފެންނަންހުރި ކޮފީ ތައްޓެއް ހިފައިގެން އޮންއެއަރވުމާއެކު، އޭނާ ވަނީ ވަޒީފާއިން ވަކިކޮށްފައެވެ.
ސްޓާބަކްސްއަކީ އިސްރާއީލަށް ތާއީދުކުރާ އެގައުމުގެ މަސްލަހަތު އޮންނަ ކުންފުންޏެކެވެ. އަދި ޕްރޮގްރާމް ހުށައެޅުމަށް އެރިއިރު ގުނޭ ސްޓާބަކްސްގެ ތައްޓެއް ހިފައިގެން އިން މަންޒަރު ބެލުންތެރީންނަށް ފެނުމާއެކު، އިސްރާއީލަށް ތާއީދުކުރާތީ އޭނާ ވަޒީފާއިން ވަކިކުރުމަށް ވަނީ ގޮވާލާފައެވެ.
