ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށްޓަކައި ފަތުރުވެރިން ގެނެވޭނެ މަންޒިލުތަކަށް ގައުމީ އެއާލައިން މޯލްޑިވިއަންއިން ސީދާ ދަތުރުތައް (ނަން-ސްޓޮޕް ފްލައިޓްސް) ފެށުމަށްޓަކައި ’ވައިޑް-ބޮޑީ އެއަރކްރާފްޓް އޮޕަރޭޝަން‘ ތައާރަފުކުރުމަށް ސަރުކާރުން މިއަދު ނިންމަވައިފިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މި ގޮތަށް ނިންމެވީ މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއިން ހުށަހެޅުއްވި ކަރުދާހުގެ މައްޗަށް މަޝްވަރާ ކުރެއްވުމަށްފަހު ވަޒީރުންގެ ލަފާފުޅާއެކުއެވެ.
ސަރުކާރުން ބުނީ ވައިޑް-ބޮޑީ އެއަރކްރާފްޓް އޮޕަރޭޝަން ފެށުމުން ޗައިނާއާއި ޔޫރަޕާއި ސައުތު އެފްރިކާގެ ބައެއް ސަރަހައްދުތަކަށް މޯލްޑިވިއަންއިން ސީދާ ދަތުރުތައް ފެށިގެންދާނެ ކަމަށެވެ.
މި މަޝްރޫއުގެ ތެރޭގައި އެންމެ އިސްކަމެއް ދޭނެ މަންޒިލްތަކެއްގެ ގޮތުގައި ޗައިނާގެ މަންޒިލުތައް ކަނޑައަޅާފައިވާ ކަމަށާއި މި މަޝްރޫއު ފެށުމާއެކު މަދުވެގެން ހަފުތާއަކު 2 ނުވަތަ 3 ދަތުރު ސީދާ އެ ސަރަހައްދަކާއި ރާއްޖެއާ ދެމެދު ކުރެވޭނެ އިންތިޒާމްތައް ހަމަޖެހިގެންދާނެ ކަމަށް ސަރުކާރުން ވަނީ ބުނެފައެވެ.
ފަތުރުވެރިކަމުގެ ސިނާއަތް ކުރިއަރުވަން ރައީސްގެ މެނިފެސްޓޯގައި ޚާއްސަ ސަމާލުކަމެއް ދީފައިވާއިިރު ވައިޑް-ބޮޑީ އެއަރކްރާފްޓް އޮޕަރޭޝަން ތައާރަފުކުރުމަކީ “ހަފުތާ 14“ މަގުޗާޓުގައި ވެސް ހިމަނާފައިވާ ކަމެކެވެ.
