އެއީ ތެދެކެވެ. އިސްރާއީލާއި އެގައުމުގެ މަސްލަހަތު އޮންނަ ކުންފުނިތައް ބޮއިކޮޓް ކުރުމަށް ބައިނަލްއަޤްވާމީ ފެންވަރުގައި ހިންގަމުން އަންނަ ބޮއިކޮޓް ހަރަކާތުގެ ނަތީޖާ ފެންނަން ފަށައިފިއެވެ.
މަޝްހޫރު ކުޅިވަރު ސާމާނާއި އަންނައުނު އުފައްދާ ބްރޭންޑެއް ކަމަށްވާ، ޕޫމާއިން އިސްރާއީލު ފުޓުބޯޅަ އެސޯސިއޭޝަން (އައިއެފްއޭ) އާއި އެކު އޮންނަ އެއްބަސްވުން އަލެއް ނުކުރާނެއެވެ.
މިއީ، ފަލަސްތީނުގެ ރައްޔިތުންގެ ހައްގަށް ލިބުނު ނަސްރެކެވެ. ބޮއިކޮޓް ހަރަކާތަށް ލިބުނު ކާމިޔާބެކެވެ. ބޮޑެތި ކުށްތަކަށް އަރައިގަނެ، ބޮޑެތި ޖަރީމާތަކުގައި ބައިވެރިވާ ކުންފުނިތަކުގެ ވިޔަފާރި އިނދަޖެހުމުން އެފަރާތްތަކުން ފިޔަވަޅު އަޅަން މަޖުބޫރުވާކަން ސާބިތުވެއްޖެއެވެ. ޣައްޒާއާއި މުޅި ފަލަސްތީނުގެ ހައްޤުގައި މަސައްކަތްކުރާ ފަރާތްތަކަށް މި ނަތީޖާ ވަރަށްވެސް ފޮންޏެވެ. އެމީހުންވަނީ ޕޫމާގެ އޮފީސްތަކާއި، ފިހާރަތަކުގެ ބޭރުގައި މުޒާހަރާ ކޮށްފައެވެ.
އެމީހުންވަނީ އެކިއެކި ޓީމުތަކާއި، ކުޅިވަރު ޝަހްސިއްޔަތުތަކާއި، ފަންނާނުންނާއި، ވިޔަފާރިތަކާއި ގުޅައި ޕޫމާ ދޫކޮށްލުމަށް ބުނެ އެންޓިކެމްޕޭނު ހިންގާފައެވެ. އެމީހުން ޕޫމާގެ އިންބޮކްސް ފުރާލިއެވެ. ޕޫމާގެ ފޯނު ލައިންތައް ބަންދުކޮށްލިއެވެ. އޮންލައިން ވިއުގައިގައި ޕޫމާގެ ހަރަކާތަށް ހުރަސްއަޅައި، ހައިޖެކްކުރިއެވެ. އަދި ޕޫމާގެ ދެފުށްދެގޮތްކަން ދުނިޔެއަށް ފަލީހަތްކޮށްލިއެވެ.
ޕޫމާގެ އުފެއްދުންތައް ބޮއިކޮޓް ކުރުމުގެ އިތުރުން، އެކުންފުނީގެ ސީއީއޯގެ ނުތަނަވަސްކަން ބޮއްސުންލައި އޭނާގެ ދުލުން ބޮއިކޮޓް ހަރަކާތުގެ ވާހަކަ ހިއްސާދާރުންގެ ބައްދަލުވުމެއްގައި ދެއްކުމަށް މަޖުބޫރުކުރުވިއެވެ. މިއީ ބޮއިކޮޓް ހަރަކާތަށް ފާޑުކިޔާ ބަޔަކަށް އިބުރަތްތެރި ފިލާވަޅެކެވެ.
ބައެއްގެ ލާބައަށް، ހައްގު ހިމާޔަތްކުރުމަށްޓަކައި އެކުވެ މަސައްކަތްކުރާ މީހުންގެ މަސައްކަތުގެ އަގު ވަޒަންނުކުރެވޭ މީހުނަށް މިއީ ބޮޑު ފިލާވަޅެކެވެ. ހަމަމިބީދައިން، އިސްރާއީލު ރައްޔިތުންގެ ޕާސްޕޯޓު ދިވެހިރާއްޖޭގައި ބޭނުންނުކުރެވޭ ގޮތަށް މަނާކުރުމަށްވެސް ބޮއިކޮޓް ހަރަކާތުން ކެނޑިނޭޅި މަސައްކަތް ކުރަންޖެހެއެވެ. ސިޔާސީވެރީންނަށް ޕްރެޝަރުކުރަންޖެހެއެވެ.
ބޮއިކޮޓް ހަރަކާތުގެ ނަތީޖާ ފެންނާނީ ކުރާ އެއްވަރެއްގައި މެދުކެނޑުމެއްނެތި އެމަސައްކަތްކުރުމުގައި ގާއިމުވެތިބުމުންނެވެ. ރޭވުންތެރިކަމާއެކު، ރޭވިކަންތައް ފުރިހަމަކުރުމަށް އަޒުމު ކަނޑައަޅައިގެންނެވެ. ކުރު މުސްތަގުބަލުގައްޔާއި، ދުރު މުސްތަގުބަލުގައިވެސް މި ހަރަކާތުގެ ހެލުންތެރިކަން އިތުރުކޮށް، ނަތީޖާ ނެރުމަށް ތަދުބީރީ މަގުން ވިސްނައިގެންނެވެ. މިފަދަ ވަރުގަދަ ހަރަކާތެއްގެ ނުފޫޒުން ބޮޑެތި ބިލިއަން ޑޮލަރުގެ ކުންފުނިތަކާއި ބްރޭންޑެތަކަށް ވެސް ސަލާމަތެއް ނޯންނާނެއެވެ.
One Response
އިސްލާމްދީނަކީ އޯގާތެރިކަމުގެ ދީނެއް. ކިތަންމެ ދުރުގައި ތިއްބަސް މުސްލިމެއްކަމަށްވާނަމަ އެއީ، އެއްއުއްމަތެއްގެ ބައެއް. މުސްލިމު އަޚެއް ނުވަތަ އުޚުތެއް. ކަނާތުން ވާތެއް ބުރިކޮށެއް ނުލެވޭނެ. އެހެން ހަދައިފި ނަމަ އޭގެ ވޭން، ހަށިގަނޑަށް ނުލިބިއެއް ނުދާނެ. މުސްލިމުންގެ ދިފާއުގައި ނުކުންނަންޖެހޭނީ ހަމަ މުސްލިމުން.