މިހާރު ފެންނަމުން އެދަނީ އިސްރާއީލު ސަލާމަތްކުރުމަށްޓަކައި ހުޅަނގުގެ ބާރުތަކުން އެކުވެ ކުރާ މަސައްކަތްތަކެކެވެ.
މެދުއިރުމަތީގެ ހުރިހާ ގައުމަކުން ކަހަލަ ގޮތަކަށް އިސްރާއީލުގެ ހަމާލާތައް ހުއްޓާލައި، ޤަތުލުއާންމު ނިމުމަކަށް ގެނައުމަށް ގޮވާލަމުން ގެންދިޔަ ނަމަވެސް، އެމީހުންނަށް ލިބިފައިވާ އަސްކަރީ ބާރާއި ތެޔޮ ބޭނުންކޮށްގެން މެދުއިރުމަތީގައި އެމެރިކާއިން ބިނާކޮށްފައިހުރި އަސްކަރީ ބޭސްއަކަށް ހަމަލާދީ، އަމަލީ ފިޔަވަޅެއް އަޅާފައެއް ނުވެއެވެ.
އަރަބި ގައުމުތަކުގެ ވެރީން މިމައްސަލާގައި އެއްވެސް އަމަލީ ފިޔަވަޅެއް އަޅަން ބޭނުންވާކަމާމެދު ވެސް ޝައްކުއުފެދެއެވެ. އެމީހުންގެ ސިޔާސީ އަދި އިޤްތިޞާދީ މަސްލަހަތު އޮތީ ދުބާއީއާއި، ދޯހާއާއި އަދި ރިޔާދު މަގުން ވަންނަމުންދާ ފައިސާގައެވެ.
ކުރިއަށް އޮތް ދުވަސްތަކުގައި ކަންތައް ވާނެގޮތެއް، އަދި އިރާނުން އަމަލުކުރާނެގޮތެއް ބިނާވެގެންވަނީ ރަޝިއާއާއި ޗައިނާގެ އެއްބާރުލުމާ އެކުގައި ކަމަށް ގަބޫލުކުރެވެއެވެ. އަދި އިސްލާމީ ގައުމުތަކުން އިރާނާއެކު އެއްސަފެއްގައި ނުކުންނާނެކަމުގެ އެއްވެސް އަލާމާތެއް ފެނިފައެއް ނުވެއެވެ.
އިރާނުން ޔަމަނާއި، އިރާޤް އަދި ސީރިއާގައި އޮތް އެގައުމުގެ މަސްދަރުތައް ބޭނުންކޮށް އެމެރިކާގެ އަސްކަރީ ސަފުތަކަށް ހަމަލާތަކެއް ދީފައިވާއިރު، މިކަމަށް ނިމުމެއް އައުން އޮތީ އިސްރާއީލުން ޣައްޒާއަށް ދެމުންދާ ބޮމުގެ ހަމަލާތަކަށް ނިމުމެއް ގެނެސްގެންކަން ވިސްނައިދިނުމަށްޓަކައި އިރާނުގެ ޚާރިޖީ ވަޒީރު އެކި ގައުމުތަކަށް ވަޑައިގެން ވާހަކަފުޅު ދައްކަވާފައިވެއެވެ.
ހަމައެއާއެކު، ފަލަސްތީނަކީ އެމެރިކާއަށް ”ރަތް ރޮނގެއް“ ކަމަށް ބުނެ އިރާނުން އިންޒާރުދީފައިވެއެވެ. އެމެރިކާގެ އަސްކަރީ ޕޯސްޓުތަކަށް އިރާނުން ދެމުންދާ ހަމަލާތަކުގެ އިތުރުން، އިސްރާއީލުން ޣައްޒާއަށް ފައިމަގުގައި އަރައި ހަމަލާ ދޭން ފެށުމާއެކު، ރައްދު ހަމަލާތައް ފުޅާވެގެން ދާނެކަމަށް އިރާނުން ވަނީ ބުނެފައެވެ.
ޣައްޒާއަށް ނޭރުމަށް އެމެރިކާއިން އިސްރާއީލަށް ނަސޭހަތްތެރިވެފައިވަނީ މި އިންޒާރުގެ ސަބަބުންނެވެ. އެހެންނަމަވެސް، އިސްރާއީލު ސަރުކާރުގެ ނިރުބަވެރި ވެރީން، އެމެރިކާގެ ލަފާ ގަބޫލުކުރުމެއްނެތި، އެމީހުންގެ އަނިޔާވެރިކަމާއިގެން ކުރިއަށް ދިޔުމަށް އެވަނީ ނިންމާފައެވެ.
ގަލްފުގެ ގައުމުތަކުގައި ހުރި އެމެރިކާގެ އަސްކަރީ ބޭސްތައް ބޭނުންކޯށްގެން އެމެރިކާއިން އިރާނުން މަދަދުވެރިވާ ގުރޫޕުތަކަށް ހަމަލާދޭނެކަމަށް ލަފާކުރެވޭއިރު، ޔަމަނުގައި އޮންނަ ހައުތީ އަސްކަރިއްޔާއިން އިސްރާއީލާއި ދެކޮޅަށް ފޮނުވާލި މިސައިލުތަކެއް ސައުދީ އަސްކަރިއްޔާއިން ނައްތާލާފައިވާކަމުގެ ރިޕޯޓުތަކެއް ނިމިދިޔަ ހަފްތާގައި ފެންމަތިވެފައިވެއެވެ.
ސަރަހައްދީ ހަނގުރާމައަކަށް މި ހަނގުރާމަ ބަދަލުވެގެން ހިނގައްޖެނަމަ، އަރަބި ގައުމުތަކުން ފަލަސްތީނާއި އެއްކޮޅަށް އެއްބައިވާނެކަމަކަށް ނުބެލެވެއެވެ. ފަލަސްތީނުގެ ބިމުން ހޯދާފައިވާ މަންފާއިން މުއްސަނދިވެ ތިބި ނަމަވެސް، އަރަބި ސަރުކާރުތަކުން ފަލަސްތީނަށް އިހުމާލުވަމުން ގެންދާތާ އެތައް އަހަރުތަކެއް ވެއްޖެއެވެ.
