ފަށްކަނޑަށް މީހަކާ އިންކަމުގެ ކުށުގައިދެ ފަރާތުން ކުރެ ކޮންމެ ފަރާތެއް 5,000 ރުފިޔާއިން ޖޫރިމަނާކޮށްފިއެވެ.
ފެމެލީ ކޯޓުން މިއަދު ބުނީ އެ ދެ މީހުން ޖޫރިމަނާކުރީ އާއިލާއާބެހޭ ގާނޫނުގެ 66 ވަނަ މާއްދާގެ ދަށުން ކަމަށެވެ.
މި ނިންމުން ނިންމުމުގައި މައްސަލާގައި ހިމެނޭ އަންހެނާ ކުރިން ކޮށްފައިވާ ކައިވެނި ރޫޅި ތިންފަށްވެފައި ވަނިކޮށް ކައިވެނިކޮށްފައިވުމާއި ކާވެނީގެ ޢަޤްދުވުމުގެ ކުރިންނާއި އޭގެފަހުން ދެ ފަރާތުން އަމަލުކޮށްފައިވާ ގޮތަށާއި ކާވެނީގެ ޢަޤްދުގެ މަތީގައި ހޭދަކޮށްފައިވާ ވަގުތަށާއި ވަރިކުރި ކަމަށް ބުނެފައިވާ ސަބަބުގެ އިތުރުން ދެ މީހުން ރާވައިގެން ވަރިކުރުމުގެ އިންތިޒާމު ދުރާލައި ހަމަޖެއްސުމުގެ ގޮތުން ކޮށްފައިވާ ކަންކަމަށް ވެސް ޝަރީއަތުން ވަނީ ރިއާޔަތްކޮށްފައެވެ.
އަދަބު ކަނޑައަޅާފައިވަނީ ފަށް ކެނޑުމަށްޓަކައި ކައިވެނި ރޫޅާލުމަށް ދުރާލައި ދެފަރާތުން ރާވައިގެން ކައިވެނި ކޮށްފައިވާކަން އެނގޭތީކަމަށް ފެމިލީ ކޯޓުން ބުންޏެވެ.
އާއިލާއާ ބެހޭ ގާނޫނުގެ 66 ވަނަ މާއްދާގައި ބަޔާންކޮށްފައިވާ ގޮތުން ތިންފަށްވެފައި އިން އަންހެނަކު ފަށް ކެނޑުމުގެ ގަސްތުގައި މީހަކާ އިނުމާއި މީހަކު ބުނެގެން ނުވަތަ އަގެއް ނުވަތަ ހަދިޔާއެއް ދީގެން ނަމަވެސް އެއްވެސް މީހަކު ފަށްކެނޑުމަށްޓަކާ މީހަކާ އިނުމަކީ ކުށެކެވެ.
